ఇద్దరూ గిన్నెనిండా బురద తీస్కుని ఇన్స్ పెక్టర్ అప్పారావింటికి వెళ్ళారు.
"ఏంటీ?....బురద తేడానికింత లేటు?" రుసరుసా చూస్తూ అడిగింది మదన మనోహరి.
చిన్నారావ్ నసుగుతూ ఏదో చెప్పబోయాడు "అంటే మేడం....మరేమో....యింటి దగ్గర్లో బురద దొరకలేదు మేడం....కాస్త దూరం వెళ్ళాక ఓ మురికి గుంట కనిపించింది మేడం....అందులో పందు...."
మిగతా వాక్యం పూర్తి కానివ్వకుండా చిన్నారావ్ పాదం మీద బలంగా ఓ తొక్కు తొక్కాడు రాంబాబు.
"అబ్బా!...." అంటూ బాధగా మూలిగాడు చిన్నారావ్.
"వెధవ!....చూశారా మేడం? కాస్త దూరం నడిచేసరికి ఎలా బాధపడిపోతున్నాడో?!...." అన్నాడు రాంబాబు.
"చెప్తా....చెప్తా!...." క్రూరంగా చిన్నారావ్ వంక చూస్తూ లొపలికి వెళ్ళింది మదన మనోహరి.
"ఏంటీ నా మీద మేడంకి ఎక్కిస్తున్నావ్?" కోపంగా అన్నాడు చిన్నారావ్.
"నీ మొహం....నేనలా టాపిక్ డైవర్ట్ చేయకపోతే నువ్వు ఈ బురదని పందులు పొర్లిన సంగతి ఆమెకి చెప్పి ఉండేవాడివి!....ఆవిడ మనిద్దరి అంతూ చూసుండేది!!" అన్నాడు రాంబాబు.
ఇంతలో మదన మనోహరి లోపలి నుండి వచ్చి తన చేతిలోని చీరల్ని వీళ్ళిద్దరి ముందూ నేలమీద కుప్పగా పడేసింది.
"ఏంటి మేడమ్....ఈ చీరల్ని స్టీల్ సామాన్ల వాడికి వెయ్యాలా?" అడిగాడు రాంబాబు.
"కాదు....మీరు తెచ్చిన బురద వాటన్నింటికీ బాగా పులమండి" చెప్పింది మదన మనోహరి.
"ఏంటి మేడమ్?...." ఆవిడ చెప్పింది తను సరిగా విన్నానా అని సందేహం వచ్చి మళ్ళీ అడిగాడు రాంబాబు.
"ఏం?....చేవుడా?....చీరల నిండా బురద పూయమని చెప్తున్నా.. బయటికి తీస్కెళ్ళి పూయండి!" అనేసి లొపలికి వంకర టింకరగా నడుచుకుంటూ వెళ్ళింది మదన మనోహరి.
ఇద్దరూ చీరల్నీ, బురదనీ ఇంటి బయటికి తీస్కెళ్ళి చీరలకి బాగా బురద పట్టించారు.
"అమ్మగారికి ఈ మధ్య కాస్త పిచ్చి కూడా పట్టినట్టుంది....లేకపోతే నిక్షేపంగా ఉండే చీరలకి బురద పట్టించడం ఏంటి?...."అన్నాడు కానిస్టేబుల్ చిన్నారావ్.
"పోనిద్దూ....ఆవిడ పిచ్చి ఆవిడకానందం....మనకెందుకూ?" చిన్నారావ్ తో అని ఇంట్లోకి చూస్తూ "మేడమ్....మొత్తం బురదంతా చీరలకి పట్టించాం" అంటూ అరిచాడు రాంబాబు.
మదన మనోహరి బయటికొచ్చి "ఆ చీరలన్నింటినీ శుభ్రంగా ఉతకండి....కాస్తంత మురికి కూడా ఉండకూడదు!....లేకపోతే హాయిగా తీరుబడిగా కబుర్లు చెప్పుకుంటూ కూర్చుంటారా?" అనేసి మళ్ళీ లోపలికెళ్ళి పోయింది.
ఇద్దరూ మదన మనోహరిని బండ బూతులు తిట్టుకుంటూ చీరలన్నీ శుభ్రంగా ఉతికారు. అప్పటికి రాత్రి తొమ్మిది గంటలైంది.
ఇన్స్ పెక్టర్ అప్పారావ్ ఇంటికొచ్చాడు. రాంబాబు, చిన్నారావ్ లు అతనికి సెల్యూట్ చేశారు.
"సార్....మేమిక యింటికెళ్ళమా?" అడిగాడు రాంబాబు ఇన్స్ పెక్టర్ అప్పారావ్ ని.
"ఇంటికా?....ఇంటికెళ్ళి ఏం చేస్తారు? మీకు పెళ్ళామా సంసారమా?....స్టేషన్ కెళ్ళి నైట్ డ్యూటీ చెయ్యండి!" క్రూరంగా చూస్తూ అన్నాడు ఇన్స్ పెక్టర్ అప్పారావ్.
స్టేషన్ కెళుతూ దార్లో రాంబాబు ఇలా మండిపడ్డాడు.
"హు....! ఇంతోటి అందగత్తె పెళ్ళాంతో ఇంట్లో వీడేదో పెద్ద పోడిచేసేట్టూ...."
* * * *
అర్దరాత్రి పన్నెండు గంటలు.
పోలీస్ కమీషనర్ లింగారావ్ ఇల్లు....బెడ్ రూంలో మంచంమీద లింగారావ్, శ్రీలక్ష్మి, వాళ్ళమధ్య దీప....ముగ్గురూ గాఢంగా నిద్రపోతున్నారు.
ఆ ఇంటికి కాస్త దూరంలో చీకట్లో ఓ ఆకారం కదులుతోంది. అది మెల్ల మెల్లగా కమీషనర్ లింగారావ్ ఇంటిని సమీపిస్తుంది.
అది గజదొంగ మంగులు ఆకారం....మంగులు భుజం మీద పాత గోనెసంచి....పాత చిత్తుకాగితాలు ఏరుకునేవాడి గెటప్ లో వున్నాడు గజదొంగ మంగులు.
అప్పుడే సెకండ్ షో వదిలినట్టున్నారు. సినిమా జనాలు అప్పుడొకడూ ఇప్పుడొకడూ వస్తున్నారు- సైకిల్ మీద, స్కూటర్ మీద, కారు లోను.
అలా ఎవరయినా ఎదురయినప్పుడు గజదొంగ మంగులు ఫుట్ పాత్ మీద చిత్తుకాగితాలు ఏరుతూ భుజంమీద గోనెసంచిలో వేస్తూ గొప్పగా నటిస్తున్నాడు.
సెకండ్ షో జనం రావటం కూడా ఆగిపోయింది. హమ్మయ్యా....! అనుకుంటూ తేలిగ్గా నిట్టూర్చాడు మంగులు. కానీ అంతలోనే ఓ ఊర కుక్క మంగులుని చూసి "భౌ....భౌ" మంటూ మొరిగింది.
మంగులుకి ఒళ్ళు మండింది.
"ఏయ్....ఛీ!" అంటూ చెయ్యెతాడు మంగులు.
అప్పుడు కుక్కకి అంతకంటే ఒళ్ళు మండింది. అది పళ్ళన్నీ బైట పెట్టి "ఈ...." అంటూ మంగులుని కరవడానికి ముందుకు దూసుకొచ్చింది. అంతటి గజదొంగకి కూడా కుక్క కరవడాని కొస్తుందంటే ఠారె త్తింది. గజదొంగ మంగులు దానికందకుండా పరుగుతీశాడు.
అది మంగులుని వెంబడించింది. అక్కడే వున్న ఓ చెత్త కుండీ మంగులు దృష్టిని ఆకర్షించింది.
మంగులు చెత్తకుండీ వెనక్కి పరుగుతీశాడు. కుక్క మంగుల్ని అనుసరించింది.
