స్ఫూర్తిదాత శ్రీశ్రీ
కాటంరాజు
కణకణ మండే సూర్యుడే శ్రీశ్రీ
చిరునవ్వులు చిందే చంద్రుడే శ్రీశ్రీ
చీకటిపై, ఆకలిపై సంధించిన శరమై
దోపిడిపై, రాపిడిపై ధ్వజమెత్తిన హరుడై || కణకణ ||
అన్నార్తుల ఆపన్నుల అసహాయుల ఊతమై
అహరహం తపియించిన మరోజగతి దూతయై
దగాపడిన దీనజనుల చైతన్యపు గీతమై
దోపిడి దుర్గం కూల్చే మరఫిరంగి మ్రోతయై || కణకణ ||
ఆకాశహంసయై విహరించెడి కావ్యకథను
భూమార్గం పట్టించి, భుగభుగలు పుట్టించి
ఈ యుగమే నాదంటూ, జగమే మా వెంటంటూ
నినదించిన కవి సింహం నిప్పులు గ్రక్కిన శౌర్యం || కణకణ ||
కాలమనే కత్తుల వంతెన దాటిన సారథి
కదన కుతూహలం రేపు కవన కవాతు మహారథి
కార్మిక కర్షక వర్గపు కల్యాణ మనోరథి
కలకాలం నిలిచి వెలిగే కవితా శిఖి శ్రీశ్రీ || కణకణ ||
సమభావం సమన్యాయం సమసమాజ ధ్యేయంగా
సాగిన బ్రతుకంతా బాధల సుడిగుండమైన
సడలిపోని ధైర్యానికి సాక్ష్యమైన జీవితం
శ్రీరంగం శ్రీనివాసరావు- కీర్తి మనకు స్ఫూర్తి ! || కణకణ ||
