జోహార్లందుకో శ్రీశ్రీ

                                                                   కె.సి

    చుక్కల్లో కలిశాడు శ్రీశ్రీ!
        సూర్యునిలో వెలిశాడు శ్రీశ్రీ
    అందుకో ! అందుకో !
        అమరుడా జోహార్లు అందుకో
    శ్రీశ్రీ జోహార్లు అందుకో !
    సుత్తీ కొడవలి నీవు    
        శ్రామికశక్తివి నీవు
    జనం గుండెమంటల్లో రగులుతున్న
        నిప్పు నీవు                                                                         || అందుకో ||

    నీ రక్తాన్ని సిరాజేసి కార్మిక బ్రతుకులు రాసి
    సమసమాజ స్థాపనకై శక్తినంతా ధారపోసి
    వంటినెత్తురింకిపోయి వల్లకాడు చేరిన
    శ్రీశ్రీవై మాచెంతనే చిరంజీవిగున్నావు                                                  || అందుకో ||

    కార్మికులకు కర్షకులను విద్యార్థి మేధావికి
    చారిత్రక స్థితిగతులను వెన్నుతట్టి తెలిపావు
    ఈ వ్యవస్థ మారాలని ఈ దోపిడి కూల్చాలని
    కలం పట్టి కాలంపై క్రాంతి రేఖ విసిరావు                                               || అందుకో ||

    అనుక్షణం నిరంతరం యువతరాన్ని కదిలించి
    మరో ప్రపంచానికి పోరు మార్గాన్నే చూపించి
    ఎర్రజెండా ఎగరాలని ఎలుగెత్తి చాటావు
    శాంతిలేని నీవు విశ్రాంతి కొరకు వెళ్లావా                                                || అందుకో ||

    ఈ శతాబ్ది కాలానికి తాళాన్నే వేశావు
    యుగయుగాల గడచినా ఈ జగము విడువలేవు
    విరసం స్థాపకుడా నక్సలైటు ప్రేమికుడా
    ఎర్రజెండా వెలుగువై ఎల్లకాలం ఉంటావు                                                || అందుకో ||

    పతితులారా భ్రష్టులారా ! దగాపడిన తమ్ములారా!
    ఏడ్వకండేడ్వకండి శ్రీశ్రీ మనకు లేడని.
    వ్యక్తికాదు శ్రీశ్రీ మహాశక్తి అని తెలువదా
    మరో ప్రపంచంలో మనల కలుసుకుంటాడు.                                            || అందుకో ||    

    నీ రక్తం నీ త్యాగం వృథా మేం కానీయం
    నీ కలమే మాచేతిలో కత్తి అయ్యి కదిలింది.
    ప్రజాయుద్ధపంథాలో పోరాటం సాగిస్తాం
    మరో ప్రపంచం కొరకు మరఫిరంగులవుతాము                                          || అందుకో ||

    ('జనం పాటలు', జనసాహితీ ప్రచురణ ఏప్రిల్, 1997)

                      యిప్లవం యాడుందిరా
              ఆడనే నీ కూడుందిరా - నీ గూడుందిరా
    (మరోప్రస్తానం...'ఎరుపు' విరసం బులెటిన్, 1974)