వరాలస్వామి
శ్రీమాత అనసూయ ప్రేమాంకమున చిఱు
నవ్వులు చిందు చిన్నారి స్వామి;
అత్రి మహాముని ఆశ్రమాంగణ మందు
పారాడు మేలి బంగారు స్వామి;
బ్రహ్మ విష్ణు మహేశ్వర స్వరూపమ్ములు
మేళవించిన రతనాల స్వామి;
విశ్వకుటుంబియై వెలుగుచు బ్రహ్మచ
ర్యమును పాటించు వరాలస్వామి;
శ్రుతులు శునకత్వమూని సంస్తుతు లొనర్ప
వేద వేదాంత వేద్యుడై వెలయు స్వామి;
సకల భువనాంతరాళ విశ్రాంత కీర్తి;
శాంతమూర్తి; దత్తాత్రేయ చక్రవర్తి.
మూర్తి యొక్కటే ముగ్గురు మూర్తులగుచు
పరిఢవిల్లెను "హరి హర బ్రహ్మ" లనగ;
వారు మువ్వురు నొక్కరైనారు మరల
అత్రి కోర "దత్తాత్రేయ" డనెడిపేర.
