స్నేహం ఖరీదు...?

    'పోస్ట్...' పిలుస్తూనే కాలింగ్ బెల్ కొట్టాడు పోస్ట్ మేన్. సెకండ్ సాటర్ డే...కొంచెం ప్రశాంతంగా టి.వి. చూస్తున్న సుమ లేచి వెళ్ళి తలుపు తీసింది.
మామూలు ఉత్తరాలు కాదు. రిజిస్టర్డ్ లెటర్. సంతకం చేసి లోపలికి వచ్చి కవరు ఓపెన్ చేసింది.
గుండె ఆగినట్లయి మళ్ళీ కొట్టుకుంటోంది వేగంగా... ఎందుకిలా జరిగింది. ఎక్కడుంది పొరపాటు. తనకేనా ఈ కోర్టు నోటీసు.. మళ్ళీ మళ్ళీ చదివింది. తనే... అనుమానం దేనికి? ఇంత స్పష్టంగా కన్పిస్తుంటే...
తార ఎంత పని చేసింది. నమ్మించి మోసం చేయటం ఎంత నీచం. కాని ఎవరో అన్నట్లు నమ్మకం ఉన్నచోటే మోసం ఉంటుంది. నమ్మలేని వాళ్ళని ఎవరు మోసం చేస్తారు?
వళ్ళంతా చెమటలు పట్టినట్లయింది. లేచి చల్లని మంచినీళ్ళు తాగింది సుమ. పిల్లలు ఇంకా కాలేజినించి రాలేదు. ఈ విషయం శ్రీధర్ కి తెలిస్తే ఎంత బాధపడ్తాడు. ఎలా రియాక్టు అవుతాడు. స్నేహితురాలని నమ్మి మూడు లక్షల చిట్ కి ష్యూరిటీ సంతకం ఎంత ప్రేమగా చేసింది తను. అసలు తార ఎందుకిలా చేసింది. రెండురోజుల క్రితం ఫోన్ చేస్తే నెంబరు వాడుకలో లేదని టేప్ వచ్చింది. ఇంటికి వెళ్తే ఇల్లు కూడా ఖాళీ చేశారని వార్త. అయినా ఏదో ఆశ... ఈ నోటీస్ తో ఆ కాస్త ఆశ తేలిపోయింది. కోర్టు దాకా చిట్ ఫండ్ కంపెనీ వాళ్ళు వెళ్ళారంటే అన్ని విధాలా ప్రయత్నం చేశాకే గదా! నిట్టూర్చింది సుజాత. మనసు అంతా చేదుగా ఉంది. టి.వి. ఆపేసి బెడ్ మీద వాలిపోయింది. ఆపినా ఆగని ఆలోచనలు. ఎ.సి. ఉన్నా ఆవిర్లెత్తే ఆలోచనలు గతంలోకి ప్రయాణం చేస్తున్నాయి.
స్కూల్లో చదువుకునే రోజులు. తార గలగలా పారే సెలయేరులా అందంగా... చురుగ్గా... అందరినీ ఆకర్షించేది. సగటు మధ్య తరగతి కుటుంబంలో పుట్టి నలుగురు ఆడపిల్లలో ఒక ఆడపిల్లగా కోరికలు నెరవేర్చుకోలేని సుమకు తార అంటే ఆరాధన. తార తండ్రి ఆ వూళ్ళో కాలేజీలో ప్రొఫెసర్. వాళ్ళకి ఒకే ఒక్క సంతానం తార. అల్లారుముద్దుగా... గారాబంగా ఏది కోరితే అది అందించే తల్లిదండ్రులు.
స్కూల్లో అమ్మాయిలంతా తారని చూసి అసూయ పడేవాళ్ళు. ఆ అమ్మాయి పక్కన కూర్చున్నా మాట్లాడినా తరించి పోయామనుకునే వాళ్ళు... డాన్స్, సంగీతం, వీణ... ఎన్ని విద్యలు తెలుసో... తారే కళ్ళు తిప్పుతూ తన టైమ్ టేబుల్ చెప్పేది. లేచింది మొదలు ఇంట్లో పని లేదు. అవీ ఇవీ నేర్చుకోవటమే. స్కూల్లో యానివర్సరీ ప్రోగ్రామ్స్ లో తార నృత్యం తప్పని సరి. ఆ వయసుకే పట్టు వోణీలు, పట్టు చీరలు కట్టే తార అందరికీ స్వప్న సుందరిలా ఉండేది. కొన్నాళ్ళకి తార తండ్రికి బదిలీ కావటాన ఊరు విడిచి వెళ్ళిపోయింది. ఎక్కడో తిరపతిలో తార బిఎస్సీ చదువుతోందని ఒ గాలి వార్త... పెళ్ళి అయిందని మరో వార్త...
జీవన పోరాటంలో అస్తిత్వ సంఘర్షణలో సుమ ఉద్యోగం వేట మొదలెట్టింది. తండ్రికి అసలు ఇష్టం లేదు. స్త్రీకి ఆర్ధిక స్వేచ్చ ఉండటం మీద సుమ తండ్రికి నమ్మకం లేదు. అయినా సుమ పట్టుదలతో గ్రూప్ -టూ పరీక్ష రాసి హైద్రాబాదులో సచివాలయంలో ఉద్యోగంలో చేరింది. సుమ స్మృతుల్లో తార ఒక స్నేహగీతం. సుమ హైదరాబాద్ లోనే ఓ బ్యాంక్ ఉద్యోగిని పెళ్ళి చేసుకుంది. వాళ్ళకి ఇద్దరు పిల్లలు రమ ఇప్పుడు ఇంటర్, కృష్ణ పదో క్లాసు. దైనందిక జీవన వేగంలో సుమకి ఎవరి గురించి ఆలోచించే తీరిక లేదు.
ఆ రోజు మధ్యాహ్నం పూట. ఆఫీసులో అందరూ క్యాంటీన్ లోనూ... చెట్ల కింద కాసేపు సేద తీరుతున్నారు. సుమ సీటు దగ్గరే మరో ఇద్దరు కొలీగ్స్ తో లంచ్ చేస్తోంది. హఠాత్తుగా ఎక్కడ్నుంచో ఆ పిలుపు.
"హలో సుమా... బాగున్నావా! ఎన్నాళ్ళయిందే నిన్ను చూసి" చొరవగా వచ్చి ఎదుటి సీటులో కూర్చున్న ఆ భారీకాయం... ఎవరబ్బా! ఇంత తెలిసినట్లు మాట్లాడుతోంది!
"బాగానే ఉన్నానండి... మీరు..." పోల్చుకునే ప్రయత్నం చేస్తోంది సుమ.
పెద్దగా నవ్వింది ఆమె. ఆ బుగ్గమీది సొట్ట... అవును అది తారే! చిన్ననాటి నేస్తాన్ని చూసిన ఆనందంతో ఉబ్బితబ్బిబ్బయింది సుమ.
"తారా! నువ్వా! ఎన్నాళ్ళకి ఇలా... ఉండు" చెయ్యి కడుక్కొని వచ్చింది. కొలీగ్స్ నవ్వుతూ వెళ్ళిపోయారు.
"థాంక్స్... నువ్వు నన్ను గుర్తుపడతావో లేదో అనుకున్నా" అంది తార అందంగా నవ్వుతూ.
"నిన్నెలా మర్చిపోతాను. కానీ నేను ఇక్కడున్నానని నీకెలా తెలుసు" సుమ అంది ఉద్వేగంగా.
"మన వూరు వెళ్ళాను పనిమీద. మీ నాన్నగారింటికి వెళ్తే నీ వివరాలు అడ్రసు చెప్పారు."
"అయినా ఆఫీసుకేంటే! ఇంటికి రా" అంది సుమ ఆప్యాయంగా స్నేహితురాలి చెయ్యి పట్టుకుని.
"ష్యూర్! చాలా కబుర్లున్నాయి" అంటూ తార వెళ్ళిపోయింది.
తర్వాత తార తన కారును సుమ ఇంటికి పంపింది.
"అమ్మగారు తీసుకు రమ్మన్నారు" వినయంగా అన్నాడు తార డ్రైవర్. సుమ ఆనందంగా ఆ విదేశీ కారులో తార ఇంటికి వెళ్ళింది. తార బోలెడు కబుర్లు... నవ్వులు... కేరింతలతో తన జీవితాన్ని విన్పించింది.
తార బిఎస్సీ చదువుతుండగానే ప్రేమించి పెళ్ళి చేసుకుంది. ఆమె భర్త సుందర్. ఫోటో చూస్తే నల్లగా పొట్టిగా అందమైన తార పక్కన దిష్టిబొమ్మలా అన్పించాడు పెద్ద బిజినెస్ మాగ్నెట్ ట. అన్నీ తారే గబగబా చెప్పింది.
అయినా తార ప్రేమించి చేసుకుందంటే మంచి వాడయి ఉంటాడు. ఇద్దరు ఆడపిల్లలు. పెద్దమ్మాయి శాంతి. డిగ్రీ చదువుతోంది. రెండో పిల్ల సుగుణ ఇంటర్ లో ఉంది.
"అమ్మ పోయింది సుమా" తార దిగులుగా చెప్పింది.
"నాన్నని హోంలో చేర్చాం" తనే అంది.
"ఎందుకు. నువ్వు చూసుకోలేవా" సుమ అడిగింది.
"ఆయన ఒప్పుకోలేదు. ఆస్తి నాకు రాసి హోంలో చేరారు. అప్పుడప్పుడు వెళ్ళి చూసి వస్తుంటాను" తార సంజాయిషీగా అంది.
"నువ్విలా ఇరవయ్యేళ్ళ తర్వాత నన్ను వెదుక్కుంటూ రావటం నాకు సంతోషంగా ఉంది. ఎప్పుడైనా తీరికగా ఉన్నప్పుడు మనం ఎక్స్ కర్షన్ వెళ్ళినప్పటి సరదాలు సంగతులు, తల్చుకుంటాను. అదేం పాట నువ్వు పాడే దానివి...?" హఠాత్తుగా అడిగింది సుమ.
'అదా! అవన్నీ నువ్వింక మర్చిపోలేదన్న మాట..'
"సయొనారా... సయొనారా... వాదా నిభావుంగీ సయొనారా". తార మళ్ళీ రాగం తీసింది అల్లరిగా.
"ఈ పాట రేడియోలో... టి.వి. లో ఎప్పుడు ఎక్కడ విన్పించినా నువ్వు గుర్తు వస్తావే" సుమ అంది ప్రేమగా.
"మన క్లాస్ మేట్స్ లో ఉష అనే అమ్మాయి ఉండేది చూడు. 'మనసున మనసై' పాట పాడేదీ..." తార గుర్తుచేసింది.
"ఆ! అవును గుర్తొచ్చింది. ఎక్కడుందో" సుమ దిగులుగా అంది.
"మొన్న ఎయిర్ పోర్టులో కన్పించింది. నేనే గుర్తు పట్టి పలకరించాను." తార చెప్పింది ఇన్వెంటివ్ గా.
"చాలా మంచి గొంతు. ఆ రంగంలో కృషి చేసి ఉంటే మంచి సింగర్ అయి వుండేది" సుమ నిట్టూర్చింది.
"నన్ను చూడు... అన్ని నేర్చుకున్నా ఏదీ లేదిప్పుడు... ఇల్లు... పిల్లలు... బిజినెస్ అంతే..." పక పకానవ్వింది తార.