21 వ. సర్గ
     సీత రావణునితో :
    1.   నిరతము పతినే - మనమున దలచుచు
           క్షణమొక యుగముగ - కాలము గడపుచు |
                                   రావణ గర్వమ | దంబుల ద్రుంచు
                                   రాముని శౌర్య ధై | ర్యముల దలచుచు |
           శోక తప్తయై - శిరమును వంచి
           తృణమును ద్రుంచి - తన ముందుంచి |
                                మారు బల్కె సీ | త దీన స్వరమున
                                తృణముకన్న రా | వణుడే హీనమన .....   ||శ్రీ|| 
    2.   "నను కామించుట - మహా పాపము
            నీ కాంతలతో - పొందుము సుఖము |
                                నీ కాంతలు పరు | ల పాలైనపుడు
                                యోచించుము నీ - మనసెంటులుండు ?
            నీ సతులందున - తనివి నొందిక
            పరకాంతల ఆ | శించి నశించకు |"
                                అని పల్కె సీత - దీన స్వరమున
                                తృణముకన్న రా | వణుడే హీనమన ....    ||శ్రీ|| 
    3.    "తెలివి బల్కెదవు - అతి వినయముగా
             హితులే లేరా - నిజము దేలుపగా ?
                                సత్యవాక్కు నీ | కు హితము గాదని
                               | విభీషణాదులు - మిన్నకుండిరా ?
             | నీ వంటివాడు | రాజయ్యనేని 
              సర్వనాశము | కాకుండునేమి ?"
                               అని పల్కె సీత - దీన స్వరమున
                               తృణముకన్న రా | వణుడే హీనమన ....    ||శ్రీ|| 
    4.   "రవి లేని కాంతి | ఎటులుండగలదు ?
            సీతారాముల - విడదీయ వలదు |
                               రామచంద్రుని - ప్రియసతి నేను
                               నను కోరుకొని - పొందకు హాని |
            శ్రితజన పాలుని - నా స్వామిని
            శరణు వేడుము - మన్నింపుమని |"  
                                  అని పల్కె సీత - దీన స్వరమున
                                  తృణముకన్న రా | వణుడే హీనమన ....    ||శ్రీ|| 
    5.   "రామ లక్ష్మణులు - లేని సమయమున
             అపహరించితివే - నను ఆశ్రమమున |
                                 పురుష సింహముల - గాలికి బెదిరి
                                  పారిపోతివి - శునకము మాదిరి |
             యమ కుబేర ఇం | ద్రాది దేవతల
              గెలిచిన నీకీ - వంచన లేల ?"
                                అని పల్కె సీత - దీన స్వరమున
                                తృణముకన్న రా | వణుడే హీనమన ....    ||శ్రీ|| 
    6.   "ఓయి రావణా! నా మాట వినుము
             శ్రీరామునితో - వైరము మానుము |
                                శీఘ్రముగా నను - రాముని జేర్చుము
                                త్రికరణ శుద్ధిగా - శరణు వేడుము |
             నిను మన్నించి అ | నుగ్రహింపుమని
              కోరుకొందు నా - కరుణామూర్తిని |"
                               అని పల్కె సీత - దీన స్వరమున
                               తృణముకన్న రా | వణుడే హీనమన ....    ||శ్రీ|| 
             __: 21 వ. స. సంపూర్ణము :__

                                                               రావణుండు కామాంధుడై నిలిచె
                                                               నోటికి వచ్చినదెల్ల పలికె
                                                                            మారుబల్కె సీత దీనస్వరమున
                                                                             తృణముకన్న రావణుడే హీనమున!
                     22 వ. సర్గ
    రావణుడు సీతతో :-
    1.   "ఓ సీతా! నీ వెంత గడసరివే
            ఎవరితో ఏమి - పల్కుచుంటివే |
                               ఎంతటి కర్ణ క | ఠోర వచనములు
                               ఎంతటి ఘోర అ | సభ్య దూషణలు |
            నీపై మోహము - నను బంధించెను
            లేకున్న నిను వ | ధించి యుందును |"
                                  అని గర్జించెను - ఘనతరగాత్రుడు
                                   క్రోధోద్దీప్తుడై - దశకంఠుడు         ...    ||శ్రీ||
    2.   "నీ కొసగిన ఏ | డాది గడువును
            రెండు నెలలలో - తీరిపోవును |
                            అంతదనుక ని | న్నంటగ రాను
                            ఈ లోపున బా | గోగులు కనుగొను |
           నను కాదను నిను - కనికరించను
           పాక శాలకే - పంపించెదను |"
                             అని గర్జించెను - ఘనతరగాత్రుడు
                              క్రోధోద్దీప్తుడై - దశకంఠుడు         ...    ||శ్రీ||