20 వ. సర్గ
     రావణుడు సీతతో :
    1.   "ఓ సీతా - ఓ పద్మనేత్ర
            నా చెంత నీకు - ఏల చింత ?
                           ఎక్కడి రాముడు - ఎక్కడి అయోధ్య
                           ఎందుకోస మీ - వనవాస వ్యధ ?
            నవ యౌవ్వనత్రి | లోక సుందరీ
            నీ కెందుకు ఈ | మునివేషధారి?"
                               అని రావణుడు కా | మాంధుడై నిలిచె
                                నోటికి వచ్చిన | దెల్ల పలికె |  ....      ||శ్రీ||
    2.    "సిగ్గెందుకు ఓ - మోహనాంగి
             చేసికొందు నిను - నా అర్ధాంగి |
                                  భయమెందుకు ఇం | దెవ్వరు లేరు
                                  దాచుకొనకు నీ | అందాల తీరు |
            పరకాంతల హ | రించి రమించుట
            పరమ ధర్మము | మా కులమంతట |"
                                అని రావణుడు కా | మాంధుడై నిలిచె
                                నోటికి వచ్చిన | దెల్ల పలికె |  ....      ||శ్రీ||
    3.   "మాసిన పీత వ | సనము దాల్చుట
             నేల బరుండుట - ఉపవాసముంట |
                                 దీనముగా లో | లోన కుందుట
                                  సుముఖముగా మా | టాడకుండుట |
              అందము కాదు ఆ | నందము కాదు
               మళ్ళిన వయసు - మళ్ళీ రాదు"
                                   అని రావణుడు కా | మాంధుడై నిలిచె
                                    నోటికి వచ్చిన | దెల్ల పలికె |  ....      ||శ్రీ||
    4.   "దివ్యసుందరీ - లేరు నీకు సరి
             ముల్లోకముల | నీకు నీవే సరి |
                              సృష్టికర్త తన - చతురతనంతను
                              పొందుపరచి సృ | జించెనో నిను |
              అదను దాటిన - ముదుసలులైన
               నిదుర బోరు నీ - సొగసులు గాంచిన |"
                                  అని రావణుడు కా | మాంధుడై నిలిచె
                                  నోటికి వచ్చిన | దెల్ల పలికె |  ....      ||శ్రీ||
    5.   "బంగరు పాత్రల - మధుర రసాలు
             మణిమయ రత్న సు | వర్ణ భూషలు |
                                  చిత్ర విచిత్రమౌ - దివ్యాంబరములు
                                  కాలగరు సు | గంధ ధూపములు |
              నృత్యగీతములు - మృదుతల్పములు
               నను గూడిపొందు - స్వర్గ సుఖములు |"
                                      అని రావణుడు కా | మాంధుడై నిలిచె
                                       నోటికి వచ్చిన | దెల్ల పలికె |  ....      ||శ్రీ||
    6.   "రాముడు నీకు | సరిగానివాడు
             నిను సుఖపెట్టడు - తను సుఖపడడు 
                                  గతిచెడి వనమున - తిరుగుచుండేనో
                                  తిరిగి తిరిగి తుద | కు రాలిపోయేనో |
              మరచిపొమ్ము ఆ | కొరగాని రాముని
              వలచి రమ్ము నసు | యశోవిశాలుని |"
                                    అని రావణుడు కా | మాంధుడై నిలిచె
                                   నోటికి వచ్చిన | దెల్ల పలికె |  ....      ||శ్రీ||
    7.   "చారు వృత్త ప | యోధర భోగిని
             చలిత లలిత సు | మధ్య విభాగిని |
                              రతి విహార వి | శాల నితంబిని
                              లీలా లోలిత - నీలవేణి |
             ననుగోరని నిను | బలాత్కరించను
              నను కాదను నిను - కనికరించను |"
                                  అని రావణుడు కా | మాంధుడై నిలిచె
                                  నోటికి వచ్చిన | దెల్ల పలికె |  ....      ||శ్రీ||
    8.   "రాముడు వచ్చుట - నన్ను గెల్చుట
             నిన్ను పొందుట - కలలో మాట |
                               బల విక్రమ ధన - యశములందున
                               అల్పుడు రాముడు - నా ముందెందున |
             యమ కుబేర ఇం | ద్రాది దేవతల
              గెలిచిన నాకిల - నరభయమేల ?"
                               అని రావణుడు కా | మాంధుడై నిలిచె
                               నోటికి వచ్చిన | దెల్ల పలికె |  ....      ||శ్రీ||
    9.   "చంద్రముఖి నీ | పైని నా చూపు
             మరలకున్నదే - మరియే వైపు |
                                చేసికొందు నిను - పట్టపురాణిగ
                                చూచుకొందు నా - శుభముల రాశిగ |
             జలధి సమీప కుం - జముల దేలి
              రమియింతము ర | మ్ము మధువును గ్రోలి |"
                                  అని రావణుడు కా | మాంధుడై నిలిచె
                                  నోటికి వచ్చిన | దెల్ల పలికె |  ....      ||శ్రీ|| 
                                     __: 20 వ. స. సంపూర్ణము :__