నీతికీ కట్టుబడిన వాళ్ళందరూ
నాలుక పిడచకట్టుకు పోతూ
ఎడారి దారుల పోతూవుంటే
ఒక హంతకుడు ఉరిశిక్ష తప్పి

ఉయాల లూగుతాడు
ఒక దురహంకారి నిముషాని
కొక పాకిస్తాన్ సృష్టిస్తాడు
ఒక వినాయకుడు నాయకుడై
జోహార్లు అందుకుంటాడు
అదృష్టపు గెడసాని అపాంగ
వీక్షణ ఎవరికి ఎవరికి
క్యూలో నిలబడండి జనులారా
ముసలివాడు మూర్ఛరోగి
మొద్దు ఎద్దు మానవుడు దానవుడు
అందరూ స్వయంవరానికి రావచ్చును
అర్హత లవసరం లేదు

కాయ్ రాజా కాయ్
కాస్తేవుంది చూస్తేలేదు
ఒకటికి మూడు రెట్లు
స్వర్గానికివే మెట్లు
క్షణంలో సగంలో కుబేరుడివి
కనురెప్ప పాటులో కుచేలుడివి
బెదిరిపోకు భీతావహులకిచట స్థానంలేదు
బెదురుగుండె సరితీసుకు
మండే అగ్నిగుండాన దూకు
చివరికి మిగిలిన బూడిదలో
చిన్న మెత్తు స్వర్గం దొరకదు
చినిగిన స్వప్నపు సంచీలో
చితికిన భాష్పం నిలవదు
అందుకే నేస్తం జీవితమే ఒక జూదం
ఖేదానికి మోదానికి లేదసలే భేదం

          *     *     *                        ---1958