తొంభైవ దశకంలో తన అందం, అభినయంతో కుర్రకారు గుండెల్లో మంటలు రేపిన గ్లామర్ డాల్ రంభ మళ్ళీ వార్తల్లో నిలిచారు. సుదీర్ఘ కాలం తర్వాత వెండితెరకు దూరంగా ఉంటున్న ఈ సీనియర్ హీరోయిన్ తాజాగా విజయవాడలోని కనకదుర్గమ్మను దర్శించుకున్నారు. తన సొంత ఊరు కావడంతో, కుటుంబ సభ్యులతో కలిసి ఇంద్రకీలాద్రిపై అమ్మవారికి ప్రత్యేక పూజలు నిర్వహించారు. ఈ సందర్భంగా మీడియా ప్రతినిధులతో మాట్లాడిన రంభ, తన రీ ఎంట్రీ గురించి వస్తున్న వార్తలపై ఆసక్తికర వ్యాఖ్యలు చేశారు. చాలా కాలంగా సోషల్ మీడియాలో రంభ మళ్ళీ సినిమాల్లోకి రాబోతున్నారనే ప్రచారం జరుగుతోంది. దీనిపై ఆమె స్పందిస్తూ.. ప్రస్తుతం తాను ఏ చిత్రానికి సంతకం చేయలేదని స్పష్టం చేశారు. అయితే, సినిమాల్లో నటించాలనే కోరిక తనకూ ఉందని, కానీ అన్నీ కుదిరితేనే అది సాధ్యమని పేర్కొన్నారు. తన ఇమేజ్‌కు భంగం కలగకుండా, మనసుకు నచ్చే బలమైన పాత్రలు వస్తే తప్పకుండా సెకండ్ ఇన్నింగ్స్ ప్రారంభిస్తానని ఆమె ధీమా వ్యక్తం చేశారు. ఒకప్పుడు చిరంజీవి, బాలకృష్ణ, నాగార్జున వంటి అగ్ర హీరోల సరసన నటించి టాప్ హీరోయిన్‌గా వెలుగొందిన రంభ, దాదాపు వందకు పైగా చిత్రాల్లో మెరిశారు. తెలుగులో ఈవీవీ సత్యనారాయణ దర్శకత్వంలో వచ్చిన ‘ఆ ఒక్కటి అడక్కు’ సినిమాతో ఓవర్ నైట్ స్టార్‌గా మారిన ఈమె, ఆ తర్వాత వెనుదిరిగి చూసుకోలేదు. ‘అల్లుడా మజాకా’, ‘హిట్లర్’, ‘బావగారు బాగున్నారా’ వంటి చిత్రాలు రంభ కెరీర్‌లో మైలురాళ్ళుగా నిలిచిపోయాయి. వివాహం తర్వాత విదేశాల్లో స్థిరపడిన రంభ, అప్పుడప్పుడు బుల్లితెరపై కొన్ని రియాలిటీ షోలలో జడ్జిగా కనిపిస్తూ ప్రేక్షకులను అలరిస్తున్నారు. కానీ వెండితెరపై ఆమెను చూడాలని ఫ్యాన్స్ ఎంతో ఆత్రుతగా ఎదురుచూస్తున్నారు. ఇప్పటికే విజయశాంతి, టబు వంటి సీనియర్ తారలు సెకండ్ ఇన్నింగ్స్ లో అదరగొడుతుండటంతో, రంభ కూడా త్వరలోనే ఒక మంచి ప్రాజెక్టుతో ముందుకు రావాలని అభిమానులు ఆశిస్తున్నారు. ప్రస్తుతానికి కొన్ని కథలు విన్నప్పటికీ ఏవీ ఓకే చేయలేదని రంభ చెప్పడంతో, ఆమెను మళ్ళీ స్క్రీన్ పై చూడాలంటే మరికొంత కాలం వేచి చూడాల్సిందే. ఏదేమైనా రంభ రీ-ఎంట్రీ ఇస్తే మాత్రం బాక్సాఫీస్ వద్ద పాత జ్ఞాపకాలు మళ్ళీ మెరవడం ఖాయమని సినీ విశ్లేషకులు భావిస్తున్నారు. మరి ఈ గ్లామర్ క్వీన్ ఏ దర్శకుడి సినిమాకి గ్రీన్ సిగ్నల్ ఇస్తుందో చూడాలి!

రఘు కుంచే టైటిల్‌ పాత్ర పోషిస్తున్న చిత్రం ‘గేదెలరాజు’. కాకినాడ తాలుకా సినిమా ట్యాగ్‌లైన్‌. రఘు కుంచే తో పాటు రామచంద్రం పుణ్యమూర్తుల, వికాస్, టీనా శ్వావ్య, మౌనిక, రవి చిన్నిబిల్లి తదితరులు నటించిన ఈ సినిమా టీజర్, ట్రైలర్, పాటలు విడుదలై మంచి విజయాన్ని అందుకున్న సంగతి తెలిసిందే. మోటూరి టాకీస్‌ పతాకంపై రఘు కుంచే సమర్పిస్తున్న ఈ చిత్రానికి చైతన్య మోటూరి దర్శకత్వం వహించారు. వాణి రవికుమార్‌ మోటూరి నిర్మిస్తున్నారు. ఈ సినిమా ఈ నెల 24న గ్రాండ్ థియేట్రికల్ రిలీజ్ కు వస్తోంది. ఈ నేపథ్యంలో తాజాగా హైదరాబాద్ లో ఈ సినిమా ప్రీ రిలీజ్ ఘనంగా నిర్వహించారు. ఈ కార్యక్రమంలో ముఖ్య అతిథులుగా ప్రముఖ దర్శకులు వీవీ వినాయక్, వీఎన్ ఆదిత్య, నిర్మాత, రైటర్ కోన వెంకట్ పాల్గొన్నారు.  ఈ సందర్భంగా డైరెక్టర్ వీవీ వినాయక్ మాట్లాడుతూ - రఘు కుంచె ఇండస్ట్రీలో అందరికీ మిత్రుడు. ఎంతోమంది స్నేహితులను సంపాదించుకున్నాడు. మా కన్నా ఇండస్ట్రీకి ముందు వచ్చాడు. ఆర్టిస్టుగా, హీరోగా ప్రయత్నించాడు. మ్యుజీషియన్ గా , సింగర్ గా పేరు తెచ్చుకున్నాడు. సోలో హీరోగా నటించాలనే ఆయన కల ఈ చిత్రంతో నెరవేరుతోంది. రిలీజ్ కు మంచి డేట్ దొరికింది. సినిమా నచ్చి మైత్రీ లాంటి సంస్థ రిలీజ్ చేయడమే ఈ సినిమాకు మొదటి విజయం. రఘు కుంచె క్యారెక్టర్ నే టైటిల్ గా పెట్టి ఎంతో ప్యాషనేట్ గా చేశారు. ఈ సినిమా విజయం సాధించి రఘుకు గొప్ప పేరు తీసుకురావాలని కోరుతున్నా. అలాగే దర్శకుడు చైతన్యకు సక్సెస్ దక్కి, పెద్ద దర్శకుడు కావాలని మనస్పూర్తిగా కోరుకుంటున్నా. అన్నారు. రైటర్, ప్రొడ్యూసర్ కోన వెంకట్ మాట్లాడుతూ - ఇంతమంది ఫ్రెండ్స్ ఉండటం రఘు కుంచె సంపాదించుకున్న ఆస్తి. ఆయన తన కొడుకును త్వరలో హీరోను చేయబోతున్నాడు. ఆ లోగా తను హీరోగా సినిమా చేసేశాడు. గేదెలరాజు సినిమా కంటెంట్ నేను చూశాను చాలా బాగుంది. ఈ రోజు స్టార్ హీరో కొత్త వాళ్లు అనే తేడా లేదు. కంటెంట్ బాగుంటే ఆ సినిమా తప్పకుండా సక్సెస్ అవుతుంది. కంటెంట్, ప్యాషన్ తో రఘు ఈ సినిమా చేశారు. సినిమా తీసేందుకు డబ్బు కంటే ముఖ్యం కంటెంట్, ప్యాషన్. అవి రెండు ఈ టీమ్ లో కనిపిస్తున్నాయి. ప్రతి టెక్నీషియన్ లో 24 క్రాఫ్టుల గురించి ఎంతోకొంత అభిరుచి, అవగాహన ఉంటాయి. అలాంటి టెక్నీషియన్స్ అంతా తమ బెస్ట్ వర్క్ ఈ సినిమాకు ఇచ్చారు. సినిమాకు ఐపీఎల్ అని, పైరసీ అని చాలా అడ్డంకులు ఉంటాయి. కానీ మంచి సినిమాను ఇవేమీ ఆపలేవు. మనం రిలీజ్ చేసే ట్రైలరో పాటో ఆడియెన్స్ నచ్చితే సినిమా చూస్తారు. మా బ్యాండ్ మేళం మూవీ ఇటీవల దీన్ని ప్రూవ్ చేసింది. గేదెలరాజు సినిమా కూడా మంచి విజయం సాధించి, ఈ టీమ్ లోని వారికి ఇంటిపేరుగా మారాలని కోరుకుంటున్నా. అన్నారు.  దర్శకుల సంఘం ప్రెసిడెంట్ వీఎన్ ఆదిత్య మాట్లాడుతూ - గేదెలరాజు సినిమా ట్రైలర్ నాకు బాగా నచ్చింది. రఘు కుంచె గారు మంచి నటుడు. ఆయన సినిమాలు సెన్సార్ లో చూసి ఫోన్ చేసే అభినందించేవాడిని. రఘు గారి మొహంలో అనేక ఎమోషన్స్ పలుకుతాయి. నటుడిగా ఆయన పెద్ద కెరీర్ బిల్డ్ చేసుకోవచ్చు. ఈ చిత్ర నిర్మాత వాణి గారు తన కొడుకు చైతన్యను డైరెక్టర్ ను చేయడం గొప్ప విషయం. సినిమా ఇండస్ట్రీకి వద్దనే తల్లిదండ్రులను చూస్తుంటాం. కానీ ఆమె తమ సొంత డబ్బులతో కొడుకును దర్శకుడిని చేశారు. ఈ సినిమా పరీక్షలు పూర్తయి హాలీడేస్ వచ్చిన మంచి టైమ్ లో రిలీజ్ అవుతోంది. మైత్రీ సంస్థ రిలీజ్ చేస్తోంది. ఈ సినిమా మంచి విజయం సాధించాలి. ఈ చిత్రంలోని పాత్రధారులు అందరికీ గుర్తింపు రావాలని కోరుకుంటున్నా. అన్నారు. యాక్టర్ రఘు కుంచె మాట్లాడుతూ - కళారంగమైన సినిమా ఇండస్ట్రీకి తమ వారసులు వెళ్లాలని కోరుకునే తల్లిదండ్రులు చాలా తక్కుమంది ఉంటారు. ఎందుకంటే ఇక్కడ ఎవరికీ గ్యారెంటీ ఉండదు. ప్రతి శుక్రవారం జీవితాలు మారిపోతుంటాయి. పైకి ఎదిగినవాళ్లు కిందపడటం, కిందనున్న వాళ్లు పైకి వెళ్లడం చూస్తుంటాం. మా డైరెక్టర్ చైతన్య పేరెంట్స్ మాత్రం అతన్ని చిత్ర పరిశ్రమకు తీసుకొచ్చారు. నేను చిన్నప్పుడు చదువుకున్న భగవద్గీత శ్లోకం ఒకటి బాగా గుర్తుంది. జీవితంలో ప్రతిరోజూ మనం కురుక్షేత్ర యుద్ధం చేయాల్సిందే. గెలిస్తే రాజభోగం ఓడిపోతే వీరస్వర్గం. ఈ రెండే ఉంటాయి. అలాగని మనం యుద్ధం చేయకుండా ఉండొద్దు. మన సినిమా ఇండస్ట్రీ పద్మవ్యూహం లాంటిది. ఇందులోకి రావడమే గానీ బయటకు వెళ్లడం ఉండదు. ఏది ఏమైనా ఇక్కడే ఉండి ప్రయత్నాలు చేస్తుంటాం. అలా సినిమా ఇండస్ట్రీ అనే పద్మవ్యూహంలోకి అభిమన్యుడిలా వచ్చిన దర్శకుడు మా చైతన్య మోటూరి గెలవాలని, మంచి విజయం సాధించాలని కోరుకుంటున్నా. ఆయన తల్లిదండ్రులు ఈ సినిమా కోసం ఎంత కష్టపడ్డారో, ఎన్ని ఆశలు పెట్టుకున్నారో చెప్పాలంటే ఒక పుస్తకం రాయాలి. ఈ శుక్రవారం వారు కోరుకున్న ప్రతిఫలం దక్కాలని ఆశిస్తున్నా. మా సినిమా గురించి చెప్పాలంటే దాదాపు అందరం కొత్తవాళ్లమే. కొత్త వాళ్ల సినిమాలో చూసేందుకు ఏముందని మీరు అనుకోవచ్చు. ఈ మూవీలో ఒక మంచి కథ ఉంది. అది మన నేటివిటీ ఉన్న కథ. కాకినాడ అనే పట్టణంలో ఉండే ఒక రౌడీ, అతని క్యారెక్టర్ చుట్టూ అల్లుకున్న కథ. గేదెలరాజు చుట్టూ ఉన్న అనేక కథలు ఆకట్టుకుంటాయి. సినిమా చివరి 20 నిమిషాల్లో అద్భుతమైన ట్విస్ట్ ఉంటుంది. మొదటి నుంచి సినిమా చూస్తున్న ప్రేక్షకుడు ఊహించని ట్విస్ట్ అది. ఆ ట్విస్ట్ కు వచ్చే సర్ ప్రైజింగ్ రియాక్షన్ సినిమాను కాపాడుతుందని నమ్ముతున్నాను. మైత్రీ సంస్థ వందకుపైగా స్క్రీన్స్ లో మా సినిమాను రిలీజ్ చేస్తోంది. ఎగ్జిబిటర్స్ మీ సినిమాను అడుగుతున్నారు అని మైత్రీ శశి గారు అనడం సంతోషాన్నిచ్చింది. మీరు సినిమా చూస్తే తప్పకుండా మరికొందరికి బాగుందని చెబుతారు. అన్నారు. నిర్మాత రవికుమార్ మాట్లాడుతూ - ఇండస్ట్రీలో పేరున్న పెద్దలతో కలిసి ఈ వేదిక పంచుకోవడం సంతోషంగా ఉంది. ఈ అవకాశం మా అబ్బాయి చైతన్య వల్లే మాకు కలిగింది. నా శ్రీమతి మా ఇంటికి మూలస్తంభం. ఆమె సపోర్ట్ తోనే ఈ సినిమాను ప్రొడ్యూస్ చేయగలిగాను. రఘు కుంచె గారు ఒక సోదరుడిలా మాకు సహకారం అందించారు. ఈ సినిమా మంచి విజయం సాధించి మాకు పేరు తీసుకువస్తుందని ఆశిస్తున్నాను. అన్నారు. దర్శకుడు చైతన్య మోటూరి మాట్లాడుతూ - గేదెలరాజు సినిమాతో కొత్త వాళ్లను, నాకు తెలిసిన వాళ్లను ఇండస్ట్రీకి పరిచయం చేస్తున్నాను. మా మూవీ ఇంత పెద్ద స్థాయిలో ప్రమోషన్స్ జరుపుకుని, గ్రాండ్ రిలీజ్ కు వస్తుందని ఊహించలేదు. ఈ రోజు ఇంతమంది పెద్దలు మా సినిమాకు సపోర్ట్ చేసేందుకు అతిథులుగా రావడం సంతోషంగా ఉంది. నా లైఫ్ లో రఘు గారిని కలవడం పెద్ద అదృష్టంగా భావిస్తాను. ఆయన మా సినిమాకు ఎంత సపోర్ట్ చేశారో మా టీమ్ లోని ప్రతి ఒక్కరికీ తెలుసు. ఈ నెల 24న మీ ముందుకు వస్తున్నాం. మా గేదెలరాజు చిత్రాన్ని చూసి ఆదరిస్తారని ఆశిస్తున్నాం. అన్నారు. నటి శ్రావ్య మాట్లాడుతూ - మా గేదెల రాజు సినిమాలో మాస్, ఎమోషన్, లవ్ వంటి అన్ని ఎలిమెంట్స్ ఉన్నాయి. ఈ నెల 24న మీరంతా మా సినిమాకు వచ్చి సక్సెస్ చేయాలని కోరుకుంటున్నా. అన్నారు. నటుడు వికాస్ మాట్లాడుతూ - ఈ చిత్రంలో నేను విజయ్ క్యారెక్టర్ లో నటిస్తున్నాను. ఈ పాత్రకు మంచి లవ్ స్టోరీ ఉంటుంది. గేదెలరాజు సినిమాకు మీరు ఇప్పటిదాకా చూడని ఒక సరికొత్త మిస్టరీ థ్రిల్లర్ కథను చూపించబోతోంది. అన్నారు.  

  -సోషల్ మీడియాలో హల్ చల్ చేస్తున్న జెనీలియా  -మే 1 న  రాజా శివాజీతో రాక  -పిల్లల కోసం పెట్టిన రూల్ ఏంటి భారతీయ చిత్ర పరిశ్రమలో ఉన్న క్యూట్ అండ్ ది బెస్ట్ కపుల్స్ లో ఒకరిగా పేరు తెచ్చుకున్న రితీష్ దేశేముఖ్(Riteish Deshmukh), జెనిలియా(Genelia)మే 1 న 'రాజాశివాజీ'(Raja Shivaji)తో వరల్డ్ వైడ్ గా ఉన్న థియేటర్స్ లో అడుగుపెట్టనున్నారు. శివాజీగా రితీష్ దేశ్ ముఖ్, ఆయన భార్య 'సాయిబాయ్' గా జెనీలియానే చేస్తుంది. తమ శక్తికి మించి రాజా శివాజీని తెరకెక్కించారు. ఈ విషయంపై రీసెంట్ గా జరిగిన 'రాజా శివాజీ' ట్రైలర్ లాంచ్ ఈవెంట్ లో ఆ ఇద్దరు పెట్టిన కన్నీరే సాక్ష్యం. అభిమానులు కూడా ఎంతో భావోద్వేగానికి లోనయ్యారు. ఇప్పుడు ఆ అందర్నీ హుషారు మోడ్ లోకి తీసుకొచ్చే బాధ్యతని జెనీలియా తీసుకొచ్చింది. ఆ డీటెయిల్స్ చూద్దాం. రీసెంట్ గా జెనీలియా ఒక ఇంటర్వ్యూలో మాట్లాడుతు ఒకప్పుడు మాంసాహారాన్ని ఇష్టపడేవాళ్ళం. కానీ ఇప్పుడు పూర్తి శాఖాహారులుగా మారాం. రితేశ్ 2016లో మాంసాహారం మానేయగా, నేను వన్ ఇయర్ తర్వాత మానేసాను. నేను ఒక క్యాథలిక్ కుటుంబంలో పెరిగాను, మా ఇంట్లో నాన్-వెజ్ తప్పనిసరి. కానీ రితేశ్ నిర్ణయం తర్వాత నేను కూడా మారాలని నిర్ణయించుకున్నాను. ఇప్పుడు శాఖాహారం వల్ల మా ఆరోగ్యం చాలా మెరుగుపడింది, మేం చాలా ఉత్సాహంగా ఉంటున్నాం. పిల్లల పెంపకం విషయంలో చాలా జాగ్రత్తగా ఉంటాం. ముఖ్యంగా పిల్లలకి భారతీయ సినిమా గొప్పతనాన్ని తెలియజేయడానికి రితేశ్ ఒక రూల్ పెట్టాడు. ప్రతి వారం ఒక ఐకానిక్ హిందీ సినిమాని పిల్లలతో కలిసి తప్పకుండా చూస్తాం. Also read: chandrababu Naidu: వెండి తెరపై చంద్రబాబు నాయుడు బయోపిక్.. దర్శకుడు ఎవరో తెలిస్తే హ్యాపీగా ఫీలవుతారు వాళ్ళకి సినిమాల పట్ల గౌరవం, భాషపై పట్టు పెంచడమే ఆ రూల్ ఉద్దేశం. అయితే, పిల్లల కంటే రితేశే ఎక్కువగా లీనమైపోతారు. సినిమా రిలీజ్ సమయంలో ఉండే టెన్షన్‌ విషయంలో రితేశ్‌ కి ఒత్తిడి ఎక్కువైతే హాయిగా నిద్రపోతాడు. తను కంగారు పడితే నేను ధైర్యం చెబుతాను, ఒక వేళ నేను టెన్షన్ పడితే తను నాకు అండగా ఉంటాడని జెనీలియా చెప్పుకొచ్చింది. ఇప్పుడు ఈ మాటలు ఆ ఇద్దరి అన్యోన్య దాంపత్యానికి నిదర్శనంగా నిలుస్తున్నాయి.ఇక రాజా శివాజీ  మరాఠా యోధుడు హిందువుల ఆరాధ్య దైవం ఛత్రపతి శివాజీ మహారాజ్ జీవిత కథ ఆధారంగా తెరకెక్కింది.   

ఐకాన్ స్టార్ అల్లు అర్జున్ క్రేజ్ ఇప్పుడు దేశ సరిహద్దులు దాటి ప్రపంచవ్యాప్తంగా మారుమోగుతోంది. 'పుష్ప' సినిమాతో నేషనల్ అవార్డు అందుకున్న మొదటి తెలుగు నటుడిగా చరిత్ర సృష్టించిన బన్నీ, ఇప్పుడు తన వ్యక్తిగత జీవితంలో మరో అద్భుతమైన మైలురాయిని చేరుకోబోతున్నారు. తన అభిరుచికి తగ్గట్టుగా హైదరాబాద్‌లోని అత్యంత ఖరీదైన ప్రాంతం జూబ్లీహిల్స్‌లో ఓ భారీ రాజభవనాన్ని నిర్మించుకుంటున్నారు. సుమారు రూ. 100 కోట్ల భారీ వ్యయంతో నిర్మితమవుతున్న ఈ విలాసవంతమైన మ్యాన్షన్‌కు 'బ్లెసింగ్' (Blessing) అని పేరు పెట్టారు. సుమారు 4 వేల చదరపు గజాల విస్తీర్ణంలో రూపుదిద్దుకుంటున్న ఈ ఇంటి గృహప్రవేశానికి ఏర్పాట్లు ముమ్మరంగా సాగుతున్నాయి. విశేషమేమిటంటే, ఈ కొత్త ఇల్లు మెగాస్టార్ చిరంజీవి నివాసానికి చాలా దగ్గరలోనే ఉండటం మెగా అభిమానుల్లో ఆసక్తిని రేకెత్తిస్తోంది. ఈ ఇంటి నిర్మాణం వెనుక బన్నీ ప్రత్యేక శ్రద్ధ పెట్టారు. ప్రముఖ ఆర్కిటెక్ట్ అమీర్ శర్మ పర్యవేక్షణలో గ్లోబల్ స్టాండర్డ్స్‌తో, మినిమలిస్ట్ వైట్ థీమ్‌తో ఈ భవనం రూపుదిద్దుకుంటోంది. ఇందులో అత్యాధునిక స్విమ్మింగ్ పూల్, స్పెషల్ ఆఫీస్ స్పేస్, పిల్లల కోసం ప్లే ఏరియాతో పాటు ఇంటర్నేషనల్ లుక్‌తో కూడిన ఇంటీరియర్స్ ఉండబోతున్నాయి. ఈ ఏడాది చివరలో బన్నీ తన కుటుంబంతో కలిసి ఈ కొత్త ఇంట్లోకి అడుగుపెట్టనున్నారు. మరోవైపు, అల్లు అర్జున్ ముంబైకి మకాం మారుస్తున్నారనే వార్తలు గత కొద్దిరోజులుగా సోషల్ మీడియాలో చక్కర్లు కొడుతున్నాయి. ఈ వార్తలపై ప్రముఖ నిర్మాత అల్లు అరవింద్ స్పందిస్తూ క్లారిటీ ఇచ్చారు. బన్నీ శాశ్వతంగా ముంబై వెళ్లడం లేదని, కేవలం తన తదుపరి భారీ చిత్రాల షూటింగ్ షెడ్యూల్స్ కోసం అక్కడ తాత్కాలికంగా అపార్ట్‌మెంట్‌ను అద్దెకు తీసుకున్నారని స్పష్టం చేశారు. ప్రస్తుతం బన్నీ చేతిలో క్రేజీ ప్రాజెక్టులు ఉన్నాయి. అట్లీ దర్శకత్వంలో రాబోతున్న 'రాకా' సినిమాతో పాటు, లోకేష్ కనగరాజ్ ప్రాజెక్ట్ కూడా చర్చల్లో ఉంది. ఈ సినిమాల చిత్రీకరణ అధిక భాగం ముంబైలో జరగనుండటంతో, రాకపోకల ఇబ్బంది లేకుండా ఉండటానికే అక్కడ నివాసం ఉంటున్నట్లు సమాచారం. ఏది ఏమైనా బన్నీ శాశ్వత చిరునామా మాత్రం హైదరాబాద్‌లోని 'బ్లెసింగ్' మాత్రమేనని స్పష్టమైంది.

ఒక హీరో కోసం అనుకున్న కథలు మరో హీరో వద్దకు వెళ్లడం సహజమే. కొన్నిసార్లు డేట్స్ కుదరక, మరికొన్నిసార్లు ఇతర కారణాల వల్ల ప్రాజెక్టులు చేతులు మారుతుంటాయి. ఇప్పుడు తాజాగా హీరో విజయ్ దేవరకొండ (Vijay Deverakonda), దర్శకుడు శౌర్యువ్ (Shouryuv) కాంబినేషన్‌లో ప్రకటించిన సినిమా విషయంలోనూ ఇదే చర్చ జరుగుతోంది. ఈ సినిమా నిజానికి జూనియర్ ఎన్టీఆర్ (Jr NTR) చేయాల్సింది అంటూ ఇండస్ట్రీ వర్గాల్లో వార్తలు వినిపిస్తున్నాయి. ఎన్టీఆర్ కాదన్నాడా? 'హాయ్ నాన్న' సినిమాతో మెప్పించిన దర్శకుడు శౌర్యువ్, తన తదుపరి చిత్రం కోసం ఒక పవర్‌ఫుల్ స్క్రిప్ట్‌ను సిద్ధం చేశారు. ఈ కథను ముందుగా ఎన్టీఆర్‌కు వినిపించినట్లు సమాచారం. పాయింట్ నచ్చినప్పటికీ, తారక్ ఇతర ప్రాజెక్టులతో బిజీగా ఉండటంతో.. సమయం కేటాయించలేకపోయారు.  రౌడీ హీరో ఎంట్రీ: ఎన్టీఆర్ ప్రస్తుత కమిట్మెంట్స్ పూర్తయ్యి, ఆయనతో సినిమా చేసే అవకాశం రావాలంటే చాలా సమయం పడుతుందని భావించిన శౌర్యువ్, అదే కథను విజయ్ దేవరకొండకు వినిపించారు. విజయ్ ఈ కథలోని డెప్త్, ఎమోషన్స్‌కు ఫిదా అయి వెంటనే గ్రీన్ సిగ్నల్ ఇచ్చేశారు. అయితే హీరో మారడంతో, విజయ్ బాడీ లాంగ్వేజ్‌కు సరిపోయేలా కథలో శౌర్యువ్ కొన్ని కీలక మార్పులు చేసినట్లు తెలుస్తోంది.  రిపీట్ అవుతున్న సీన్: పెద్ద హీరోలు వదులుకున్న కథలు విజయ్ దేవరకొండ వద్దకు రావడం ఇది మొదటిసారి కాదు. గౌతమ్ తిన్ననూరి దర్శకత్వంలో విజయ్ చేసిన గత చిత్రం 'కింగ్‌డమ్‌' కూడా మొదట రామ్ చరణ్ చేయాల్సింది. చరణ్ తో అనౌన్స్ మెంట్ కూడా వచ్చింది. కానీ, ఏవో కారణాల వల్ల పట్టాలెక్కలేదు. అయితే 'కింగ్‌డమ్‌'తో విజయ్ కి బాక్సాఫీస్ దగ్గర నిరాశే ఎదురైంది. దీంతో ఎన్టీఆర్ వదులుకున్న కథ విజయ్ కి ఎలాంటి ఫలితాన్ని ఇవ్వనుందనే ఆసక్తి నెలకొంది. వైరా ఎంటర్‌టైన్‌మెంట్స్ నిర్మించనున్న ఈ భారీ బడ్జెట్ చిత్రం, ఈ ఏడాది చివరలో ప్రారంభం కానుంది.