ఆంధ్రప్రదేశ్ లో అధికార వైసీపీ అరాచకాలకు అంతే లేకుండా పోతోంది. ప్రతిపక్ష నేత, మాజీ ముఖ్యమంత్రి చంద్రబాబు నాయుడి ఇంటిపైకే వైసీపీ ఎమ్మెల్యే దాడికి దిగడం గతంలో కలకలం రేపింది. అసెంబ్లీ వేదికగా నారా భువనేశ్వరిపై అందరూ తలదించుకునేలా అసభ్యకర కామెంట్లు చేశారు అధికార పార్టీ ఎమ్మెల్యేలు. టీడీపీ కార్యకర్తలు దేవాలయంగా కొలుచుకునే పార్టీ ప్రధాన కార్యాలయంపైనా వైసీపీ అల్లరి మూకలు దాడులకు తెగబడ్డాయి. ఇవన్ని వైసీపీ నేతలు, కార్యకర్తల దురాగాతాలకు కొన్ని ఉదాహారణలు మాత్రమే.

వైసీపీ అధికారంలోకి వచ్చినప్పటి నుంచి టీడీపీ నేతలే టార్గెట్ గా దాడులు జరుగుతూనే ఉన్నాయి. టీడీపీ కార్యాలయాలపైనా దాడులు జరిగాయి. టీడీపీ నేతలు ఎన్నిసార్లు ఫిర్యాదు చేసినా పోలీసులు మాత్రం చర్యలు తీసుకోలేదనే విమర్శలు ఉన్నాయి. తాజాగా ఏకంగా ఎన్టీఆర్ విగ్రహాన్ని టార్గెట్ చేశారు వైసీపీ నేతలు. మాచర్ల నియోజకవర్గంలోని దుర్గిలో పట్టపగలే ఎన్టీఆర్ విగ్రహాన్ని ధ్వంసం చేశాడు వైసీపీ నేత. ఎన్టీఆర్ విగ్రహం ధ్వంసం చేసిన ఘటన తీవ్ర దుమారం రేపుతోంది.

దుర్గి ఘటనకు నిరసనగా టీడీపీ రాష్ట్ర వ్యాప్తంగా ఆందోళనలకు పిలుపిచ్చింది. మాచర్లకు వెళ్లేందుకు టీడీపీ నేతలు ప్రయత్నించగా పోలీసులు అడ్డుకున్నారు. ఎన్టీఆర్ విగ్రహం ధ్వంసం చేయడంతో పాటు టీడీపీ నేతల అరెస్టులపై టీడీపీ నేతలు తీవ్రంగా మండిపడుతున్నారు. ప్ర‌భుత్వంపై వెల్లువెత్తుతోన్న‌ ప్ర‌జాగ్ర‌హాన్ని ప‌క్క‌దారి ప‌ట్టించేందుకు దివంగ‌త‌  తార‌క‌రామారావు విగ్ర‌హాల ధ్వంసానికి వైసీపీ తెగ‌బ‌డ‌టం చాలా దుర్మార్గమని టీడీపీ జాతీయ ప్రధాన కార్యదర్శి నారా లోకేష్ అన్నారు. దుర్గి, తాడికొండలో మ‌హానాయకుడు ఎన్టీఆర్ విగ్ర‌హాలని విద్వేషంతో ప‌గ‌ల‌గొట్టారన్నారు. వైసీపీ అధికారంలోకి వ‌చ్చిన నాటి నుంచి ప్ర‌తిప‌క్షంపైనా, ప్ర‌శ్నించే ప్ర‌జ‌ల‌పైనే కాదు.. దేవతామూర్తులు, మ‌హ‌నీయుల విగ్ర‌హాల‌పైనా దాడులు స‌ర్వ‌సాధార‌ణ‌మైపోయాయని నారా లోకేష్ విమర్శించారు. ఎన్టీఆర్ విగ్ర‌హాల విధ్వంసంతో వైసీపీ త‌న ప‌త‌నాన్ని తానే కొని తెచ్చుకుంటోందన్నారు. అధికార‌ మ‌దంతో ర‌హ‌దారిపై ఉన్న విగ్ర‌హాల‌ను కూల‌గొడుతున్న జ‌గ‌న్‌రెడ్డి అండ్ కో... ప్ర‌జ‌లు త‌మ గుండె గుడిలో క‌ట్టుకున్న ఎన్టీఆర్ విగ్ర‌హాన్ని ఎప్ప‌టికీ కూల‌దోయ‌లేరని నారా లోకేష్ అన్నారు. 

దుర్గిలో ఎన్టీఆర్ విగ్రహాన్ని వైసీపీ నేత ధ్వంసం చేయడంపై టీడీపీ రాష్ట్ర అధ్యక్షులు అచ్చెన్నాయుడు తీవ్రస్థాయిలో మండిపడ్డారు.  రాష్ట్రంలో నీ తండ్రి విగ్రహాలు తప్ప మహానుభావులవి ఉండకూడదా అంటూ సీఎం జగన్‌ను ప్రశ్నించారు. విగ్రహ ధ్వంసానికి పాల్పడి, మారణాయుధాలతో ప్రజలను భయపెట్టిన వారిపై ఐపీసీ 294, 427 లాంటి నామమాత్రపు కేసులు పెట్టారన్నారు. హత్యాయత్నం కేసు ఎందుకు నమోదు చేయలేదని ప్రశ్నించారు.  విగ్రహ ధ్వంసాన్ని నిరసిస్తూ ఆందోళన తెలిపిన వారిపై క్రిమినల్ కేసులు బనాయిస్తారా అని మండిపడ్డారు. టీడీపీ వారిపై పెట్టిన కేసులను తక్షణమే పోలీసులు వెనక్కి తీసుకుని, అరెస్టు చేసిన వారిని వదిలిపెట్టాలని డిమాండ్ చేశారు. 

రాష్ట్రంలో అల్లర్లు సృష్టించేందుకు వైసీపీ ప్రభుత్వం కుట్ర చేస్తోందని మాజీ మంత్రి పత్తిపాటి పుల్లారావు పేర్కొన్నారు. పరిపాలన చేతగాక దుర్మార్గాలకు సీఎం జగన్ విధ్వంసాలకు పాల్పడుతున్నాడన్నారు. వైసీపీ వ్యూహకర్త ప్రశాంత్ కిషోర్‌ని రంగంలోకి దించి రాష్ట్రంలో విధ్వంసాలకు కుట్ర చేస్తున్నారన్నారు. తాడికొండ, దుర్గి లలో ఎన్టీఆర్ విగ్రహాలను ధ్వంసం చేయడం... చిత్తూరులో టీడీపీ దిమ్మె ధ్వంసం వంటి ఘటనలే దీనికి సాక్ష్యమని ప్రత్తిపాటి పేర్కొన్నారు. పోలీసులను అడ్డుపెట్టుకొని బెదిరించాలని చూస్తే భయపడేది లేదన్నారు. ఎన్టీఆర్ విగ్రహాన్ని ధ్వంసం చేయడం తెలుగు ప్రజల మనోభావాలను దేబ్బతీయడమేనని టీడీపీ పొలిట్ బ్యూరో సభ్యుడు కాల్వ శ్రీనివాసులు పేర్కొన్నారు. వైసీపీ విధ్వంసక చర్యల కొనసాగింపుగానే విగ్రహాన్ని ధ్వంసం చేశారన్నారు. జగన్ ఆటవిక పాలనలో సామాన్యులతో పాటు మహానుభావుల విగ్రహాలకూ రక్షణ కరవైందన్నారు. సీఎం జగన్ తెలుగు ప్రజలకు వెంటనే క్షమాపణలు చెప్పి, ప్రభుత్వ ఖర్చుతో ఎన్టీఆర్ విగ్రహాన్ని ఏర్పాటు చేయాలని కాల్వ శ్రీనివాసులు డిమాండ్ చేశారు. 

దుర్గి గ్రామంలో అన్న ఎన్టీఆర్ విగ్రహాన్ని పట్టపగలు జనం చూస్తూ ఉండగా ఇనుప మలాట్‌తో పగులకొట్టడం అమానుషమని టీడీపీ పొలిట్‌‌బ్యూరో సభ్యులు వర్ల రామయ్య మండిపడ్డారు. అక్కడ పోలీసులు ఏమీ చేయరన్న ధైర్యంతో చేసిన పని అది అని అన్నారు. స్థానిక పోలీసులు అధికార పార్టీతో కుమ్ముక్కవడం వల్లే ఇలాంటివి జరుగుతున్నాయని ఆరోపించారు. ఈ ఘటనపై స్థానిక అధికారులపై  జిల్లా ఎస్పీ విషాల్ గున్ని చర్యలు తీసుకోవాలని డిమాండ్ చేశారు. స్థానిక ఎస్‌ఐపై ఇప్పటికే చాల ఆరోపణలున్నాయని వర్ల రామయ్య తెలిపారు.