కరోనా మహమ్మారి తర్వాత ప్రపంచవ్యాప్తంగా ఉద్యోగాల శైలి పూర్తిగా మారిపోయింది. వర్క్ ఫ్రమ్ హోమ్ (డబ్ల్యూఎఫ్‌హెచ్) అనేది ఒక సరికొత్త జీవన విధానంగా మారిపోయింది. అయితే, రిమోట్ ఉద్యోగం చేయడం వల్ల నిజంగానే డబ్బు ఆదా అవుతుందా, లేక తెలియకుండానే ఖర్చులు పెరుగుతున్నాయా అనే సందేహం చాలా మందిలో ఉంది. ఇదే విషయాన్ని ఒక సాఫ్ట్‌వేర్ కన్సల్టెంట్ ఆర్టిఫిషియల్ ఇంటెలిజెన్స్ ప్లాట్‌ఫారమ్ అయిన చాట్‌జిపిటిని అడిగారు. సదరు వ్యక్తి ఢిల్లీలో నివసిస్తూ, హైదరాబాద్‌లోని ఒక ప్రముఖ ఐటీ కంపెనీలో ఎస్ఏపీ (SAP) కన్సల్టెంట్‌గా రూ. 16 లక్షల వార్షిక ప్యాకేజీతో (₹16 LPA) రిమోట్ పద్ధతిలో పని చేస్తున్నారు. ఈ క్రమంలో ఇంట్లోనే ఉంటూ మధ్యాహ్నం 2 గంటల నుండి రాత్రి 11 గంటల వరకు రోజుకు దాదాపు 9 గంటలు విధులు నిర్వర్తిస్తున్నారు. అయితే, ప్రయాణ ఖర్చులు, బయట లంచ్, ఆఫీస్ బట్టల ఖర్చులు తప్పుతున్నాయని భావిస్తున్నప్పటికీ, ఇంట్లో కరెంట్ బిల్లులు, ఇంటర్నెట్, ఆన్‌లైన్ ఫుడ్ డెలివరీలు మరియు సబ్‌స్క్రిప్షన్ల వల్ల తెలియని అదనపు ఖర్చులు ఏమైనా పెరుగుతున్నాయా అని ఆయన చాట్‌జిపిటి ద్వారా విశ్లేషణ కోరారు. ఆ విశ్లేషణలో షాకింగ్ నిజాలు వెలుగులోకి వచ్చాయి.

చాట్‌జిపిటి ఈ రెండు జీవన విధానాల ఆర్థిక సమీకరణాలను క్షుణ్ణంగా లెక్కగట్టింది. ఢిల్లీలో సొంత ఇల్లు ఉండి, తల్లిదండ్రులు, సోదరితో కలిసి నివసించే ఆ ఉద్యోగికి వర్క్ ఫ్రమ్ హోమ్ వల్ల కొన్ని దాగివున్న ఖర్చులు (Hidden Costs) ఉన్నాయని గుర్తించింది. ఇంట్లో నిరంతరం ఏసీ, ల్యాప్‌టాప్, లైట్లు వాడటం వల్ల నెలకు కరెంట్ బిల్లు రూ. 2,500 నుండి రూ. 5,000 వరకు వస్తుంది, అంటే ఏడాదికి ఇది దాదాపు రూ. 30,000 నుండి రూ. 60,000 అవుతుంది. వైఫై ఇంటర్నెట్ కోసం నెలకు రూ. 800 నుండి రూ. 1,500 వరకు, అలాగే టీ, స్నాక్స్ కోసం నెలకు రూ. 2,000 నుండి రూ. 4,000 వరకు అదనంగా ఖర్చవుతుంది. వీటికి తోడు హోమ్ ఆఫీస్ సెటప్, మంచి కుర్చీ, డెస్క్ మరియు ఇతర పరికరాల కోసం ఏడాదికి రూ. 15,000 నుండి రూ. 25,000, ఓటీటీ మరియు ఇతర సబ్‌స్క్రిప్షన్ల కోసం రూ. 10,000 నుండి రూ. 20,000 అవుతుంది. మొత్తంగా చూస్తే, ఇంట్లో ఉండి పని చేయడం వల్ల ఏడాదికి అదనంగా రూ. 90,000 నుండి రూ. 1.70 లక్షల వరకు అదనపు ఖర్చు అవుతుందని చాట్‌జిపిటి లెక్క తేల్చింది.

అదే ఒకవేళ ఆ ఉద్యోగి హైదరాబాద్‌కు బదిలీ అయి ఆఫీస్‌కు వెళ్లి పని చేయాల్సి వస్తే అయ్యే ఖర్చులు ఊహించని విధంగా ఉన్నాయని చాట్‌జిపిటి స్పష్టం చేసింది. హైదరాబాద్‌లో అద్దె ఇల్లు తీసుకోవాలంటే నెలకు రూ. 18,000 నుండి రూ. 30,000 వరకు అంటే ఏడాదికి రూ. 2.20 లక్షల నుండి రూ. 3.60 lakhs కేవలం రెంట్ కోసమే కేటాయించాలి. ప్రతిరోజూ ఆఫీస్‌కు ప్రయాణం చేయడానికి మెట్రో లేదా బైక్/కార్ ఇంధనం కోసం నెలకు రూ. 4,000 నుండి రూ. 8,000 వరకు ఖర్చవుతుంది. ఆఫీస్ లంచ్‌లు, కాఫీల కోసం నెలకు రూ. 4,000 నుండి Room. 7,000, ఆఫీస్ దుస్తులు మరియు గ్రూమింగ్ కోసం ఏడాదికి రూ. 20,000 నుండి రూ. 40,000 ఖర్చవుతాయి. అదనంగా వీకెండ్ పార్టీలు, బయట తిరగడం మరియు ఇతర చిన్నపాటి సౌకర్యాల కోసం నెలకు రూ. 5,000 నుండి రూ. 10,000 ఖర్చవుతాయి. వీటన్నింటినీ కలిపితే హైదరాబాద్‌లో ఆఫీస్ లైఫ్‌స్టైల్ కోసం ఏడాదికి రూ. 4 లక్షల నుండి రూ. 6.50 లక్షల వరకు ఖర్చవుతుందని తేలింది.