బేసిగ్గా అష్టమి, నవములు కష్టమి రోజులని అంటారు. మే 10, ఆదివారం ఉదయం 10 గంటలకు విజయ్ ప్రమాణ స్వీకార ముహుర్తం.. సెంటిమెంటు ప్రకారం ఇది నవమి. మరి ఆయన జాతకానికి జ్యోతిష పరంగా ఎలాంటి ఆటంకాలు ఏర్పడుతాయి? అసలే సంకీర్ణ ప్రభుత్వం, దీన్నిఆయనకున్న జాతక బలం ఎలా హ్యాండిల్ చేస్తుంది?

సాధారణంగా శుభకార్యాలకు నవమిని రిక్త తిథిగా పరిగణిస్తారు. రాముడు పుట్టింది నవమి రోజే కదా? అని కొందరు సమర్థించినా, రాజ్యాధికారానికి నవమి అంత మంచి తిథి కాదు.  నవమి రోజు ప్రారంభించే పనుల్లో తరచూ ఆటంకాలు లేదా మధ్యలో విరామాలు వచ్చే అవకాశం ఉంటుందంటారు. ఇది సంకీర్ణ ప్రభుత్వం కాబట్టి, భాగస్వామ్య పక్షాల నుంచి ఎప్పుడూ ఏదో ఒక అసంతృప్తి వెలువడే ప్రమాదం ఉంది. ఇందుకు పరిహారమేంటో చూస్తే..  ఒకవేళ అభిజిత్ లగ్నంలో అంటే, మధ్యాహ్నం 12 గంటల ప్రాంతంలో.. ప్రమాణ స్వీకారం చేస్తే కొన్ని దోషాలు తొలగిపోయే అవకాశం ఉంటుందని చెబుతారు.

మే 10 ఆదివారం కావడం విజయ్‌కు ఒక రకంగా కలిసి వచ్చే అంశం. జ్యోతిషశాస్త్రంలో సూర్యుడు అధికారానికి, ప్రభుత్వానికి కారకుడు. ఆదివారం రోజు అధికారం చేపట్టడం వల్ల ఆయనకు వ్యక్తిగతంగా ఒక రకమైన తేజస్సు.. నిర్ణయాధికారం లభిస్తుంది. జాతక బలం చూస్తే విజయ్ జాతకంలో రవి, కుజుల ప్రభావం ఎక్కువగా ఉంటుంది. ఆయన పుట్టిన తేదీ.. జూన్ 22, మిథున రాశి/కర్కాటక లగ్నం ప్రకారం చూస్తే.. ఇది ఆయనకు ప్రజల్లో ఉండే ఇమేజ్‌ను కాపాడుతుంది. 

సంకీర్ణ ప్రభుత్వం వర్సెస్  జాతక బలం అంశం పరిశీలిస్తే.. సంకీర్ణ ప్రభుత్వాన్ని నడపడం అనేది ఓ సాహసం లాంటిదే. ఇందుకు శని, గురు గ్రహాల బలం చాలా అవసరం. ఇక సవాళ్లు ఎలా ఉంటాయో చూస్తే.. సంకీర్ణంలో భాగస్వాములు పదే పదే బ్లాక్ మెయిల్ చేసే సూచనలు కనిపిస్తున్నాయి. ముహూర్తంలో దోషం ఉంటే, ప్రభుత్వం పూర్తి కాలం అంటూ ఐదేళ్లు   సాగడంపై నీలినీడలు కమ్ముకునేలా ఉందని జ్యోతిష్య పండితులు అంటున్నారు.  విజయ్ జాతకంలో గజకేసరి యోగం వంటివి ఉంటే..  ఆయన తన వాగ్ధాటితో, ప్రజాకర్షణతో సంక్షోభాలను ఎదుర్కోగలరు. కానీ.. శని ప్రభావం ఎక్కువగా ఉంటే మాత్రం మిత్రపక్షాల వల్ల మానసిక ఒత్తిడి తప్పదు.

మే 2026 నాటికి గురువు మిథున రాశిలో, లేదా కర్కాటకంలోనో సంచరించే అవకాశం ఉంది. ఇది విజయ్‌కు రాజకీయంగా గౌరవాన్నిస్తుంది కానీ, రాహు, కేతువుల సంచారం వల్ల సొంత పార్టీలోనే అంతర్గత కుట్రలు లేదా నమ్మకద్రోహాలు జరిగే అవకాశం ఉంది. ఇక ముహూర్త బలం సంగతి చూస్తే..  ఉదయం 10 గంటల సమయం అనేది సాధారణంగా వృషభ లేదా మిథున లగ్నం అయ్యే అవకాశం ఉంటుంది. లగ్నంలో శుభ గ్రహాలు ఉంటేనే ఈ సంకీర్ణ ప్రభుత్వం సాఫీగా సాగుతుంది.

విజయ్ ఒక విక్రమార్కుడి లాగా పట్టుదలతో ఈ స్థాయికి వచ్చారు. అయితే..   సంకీర్ణ ప్రభుత్వం అనేది పూలపాన్పు కాదు. జ్యోతిష్య రీత్యా నవమి తిథిని ఎంచుకోవడం ఆయన ధైర్యానికి నిదర్శనమో లేక గ్రహబలంపై ఉన్న నమ్మకమో తెలియదు కానీ, ముహూర్త బలంతో పోలిస్తే ఆయన ప్రజా బలం, వ్యక్తిగత జాతక బలం మాత్రమే ఈ సంకీర్ణాన్ని నెట్టుకురావడానికి తోడ్పడాలి. శత్రువుల నుంచి.. ముఖ్యంగా పాత రాజకీయ శక్తుల నుంచి.. ఆయనకు నిరంతర సవాళ్లు ఎదురవుతూనే ఉంటాయి. దీనిని ఆయన తనదైన సినిమాటిక్ నాలెడ్జ్ తో హ్యాండిల్ చేస్తారా లేక  పోరాడుతూనే ఉంటారా అనేది తేలాల్సి ఉంది.