వైసీపీ కీలక నేత,   మాజీ మంత్రి విడదల రజిని తన పాస్‌పోర్ట్‌ను పల్నాడు జిల్లాలోని నరసరావుపేట డీఎస్పీ కార్యాలయంలో అధికారులకు అప్పగించారు. హైకోర్టు  జారీ చేసిన స్పష్టమైన ఉత్తర్వులకు లోబడి ఆమె తన పాస్ పోర్టును సరండర్ చేశారు.  గతంలో   చిలకలూరిపేట పోలీస్ స్టేషన్‌లో విడదల రజినితో పాటు మరికొందరు వైసీపీ నాయకులపై ఎస్సీ, ఎస్టీ అట్రాసిటీ నిరోధక చట్టం కింద  కేసు నమోదైంది. తెలుగుదేశం పార్టీకి చెందిన స్థానిక నాయకుడు పిల్లి కోటి ఇచ్చిన లిఖితపూర్వక ఫిర్యాదు ఆధారంగా పోలీసులు ఈ కేసును నమోదు చేసి దర్యాప్తు చేపట్టారు. ఈ వివాదానికి సంబంధించిన చట్టపరమైన ప్రక్రియలో భాగంగానే న్యాయస్థానం విడదల రజినిని పాస్ పోర్టు సరెండర్ చేయాల్సిందిగా ఆదేశించింది.

ఈ కేసులో ముందస్తు బెయిల్  కోసం విడదల రజిని హైకోర్టును ఆశ్రయించారు. ఈ క్రమంలో ఆమె విదేశాలకు వెళ్లకుండా ఉండేందుకు తక్షణమే తన పాస్‌పోర్టును పోలీసులకు సమర్పించాలని హైకోర్టు స్పష్టం చేసింది. అదేవిధంగా దర్యాప్తునకు పూర్తిగా సహకరించాలని షరతులతో కూడిన ఆదేశాలు జారీ చేసింది. ఈ మేరకు ఉన్నత న్యాయస్థానం నిర్దేశించిన నిబంధనల ప్రకారం, మాజీ మంత్రి రజిని ప్రతి ఆదివారం చిలకలూరిపేట పోలీస్ స్టేషన్‌కు హాజరై రిజిస్టర్‌లో సంతకం చేయాల్సి ఉంటుంది.  కోర్టు ఆదేశాలను గౌరవిస్తూ ఆమె స్వయంగా నరసరావుపేటలోని డీఎస్పీ కార్యాలయానికి చేరుకుని, అక్కడ విధుల్లో ఉన్న డీఎస్పీ హనుమంతరావుకు  అధికారికంగా తన పాస్‌పోర్ట్‌ను సమర్పించారు.

ఈ పరిణామం పల్నాడు జిల్లా రాజకీయ వర్గాల్లో పెద్ద ఎత్తున చర్చకు దారితీసింది. ప్రతిపక్ష పార్టీకి చెందిన ఒక ప్రముఖ మహిళా నేత,  మాజీ మంత్రి ఈ రకమైన చట్టపరమైన చర్యలను ఎదుర్కోవాల్సి రావడం స్థానికంగా ప్రాధాన్యత సంతరించుకుంది. అయితే ఈ వ్యవహారంపై విడదల రజిని నేరుగా ఎలాంటి బహిరంగ ప్రకటనలు చేయనప్పటికీ, ఆమె తరపు న్యాయవాదులు,  పార్టీ వర్గాలు మాత్రం విడదల రజిని విచారణకు పూర్తిగా సహకరిస్తారని పేర్కొన్నారు.