రేష‌న్ బియ్యం మాయం కేసులో వైసీపీ నేత‌, మాజీ మంత్రి పేర్నినాని అడ్డంగా దొరికిపోయినట్లే కనిపిస్తోంది. భారీ మొత్తంలో బియ్యం మాయం వెనుక పేర్ని నాని హ‌స్తం ఉన్న‌ట్లు పోలీసులు నిర్దార‌ణ‌కు వ‌చ్చారు. ఇదే విషయాన్ని పేర్నినాని కేసువిచారణ సందర్బంగా  ప్రభుత్వం తరపున అడ్వకేట్ జనరల్ దమ్మాలపాటి శ్రీనివాస్ కోర్టుకు తెలిపారు. బియ్యం మాయం కేసులో పేర్ని నాని ప్రమేయానికి సంబంధించి ప్రాథమిక ఆధారాలున్నాయని పేర్కొన్నారు. సాధారణంగా ఉద్యోగికి యజమాని ఖాతా నుంచి వేతనం సొమ్ములు వెడతాయనీ, కానీ  బియ్యం మాయం కేసులో మాత్రం గోదాము మేనేజన్ ఖాతా నుంచి పేర్ని నానికి సొమ్ములు బదిలీ అయ్యాయనీ, అది రేషన్ బియ్యాన్ని అక్రమంగా తరలించి అమ్మిన సొమ్మేననీ పోలీసుల విచారణలో తేలిందనీ అడ్వకేట్ జనరల్ కోర్టుకు తెలిపారు.  ఇరు పక్షాల వాదనలూ విన్న హైకోర్టు  తీర్పు రిజర్వ్ చేసింది. అయితే ఇప్పటికే పోలీసులకు తొందరపాటు చర్యలు వద్దంటూ ఇచ్చిన ఉత్తర్వ్యులను పొడిగించింది. 

అయితే ఈ కేసు విషయంలో పేర్ని నాని, ఆయన సతీమణి జయసుధ పూర్తిగా ఇరుక్కున్నట్లునని న్యాయ నిపుణులు అంటున్నారు. వైసీపీ హయాంలో పేర్ని నాని తన సతీమణి జయసుధ పేరిట గోదాములను నిర్మించి, వాటిని పౌరసరఫరాల శాఖకు అద్దెకు ఇచ్చారు. అయితే వైసీపీ ప్రభుత్వం పతనమై తెలుగుదేశం కూటమి సర్కార్ అధికార పగ్గాలు చేపట్టిన తరువాత పేర్ని నాని సతీమణికి చెందిన గోదాములలో రేషన్ బియ్యం పెద్ద ఎత్తున మాయం అయ్యిందని అధికారుల తనిఖీలలో బయటపడింది. దీంతో పౌరసరఫరాల శాఖ అధికారుల ఫిర్యాదు మేరకు పోలీసులు కేసునమోదు చేశారు. తొలుత పేర్ని జయసుధ,  గోడౌన్ మేనేజర్  మ‌న‌స తేజ్‌, పౌర‌స‌ర‌ఫ‌రాల అధికారి కోటిరెడ్డితో పాటు మ‌రో ఇద్ద‌రిపై పోలీసులు కేసులు న‌మోదు చేశారు. విచారణలో మాన‌స‌త్ తేజ్‌, కోటిరెడ్డితోపాటు మ‌రో ఇద్ద‌రి మ‌ధ్య దాదాపు పాతిక నుంచి 30 ల‌క్ష‌ల రూపాయల మేర లావాదేవీలు జ‌రిగిన‌ట్లు పోలీసుల విచారణలో తేలింది. అంతే కాకుండాపేర్ని నాని కుటుంబ స‌భ్యుల బ్యాంకు ఖాతాల‌కు కూడా మాన‌స్ తేజ్ బ్యాంకు ఖాతా నుంచి ల‌క్ష‌ల్లో లావాదేవీలు జ‌రిగిన‌ట్లు పోలీసులు గుర్తించారు. ఈ పరిస్థితిలో  తేడా వ‌చ్చిన రేష‌న్ బియ్యం మొత్తానికి డ‌బ్బులు చెల్లిస్తామ‌ని పేర్ని నాని కుటుంబం అధికారుల‌కు లేఖ రాసింది. రూ.3.37 కోట్ల‌కుపైగా విలువైన బియ్యం మాయ‌మైంద‌ని అధికారులు అంచ‌నాకు వ‌చ్చారు. తొలుత రూ.1.70కోట్లు చెల్లించాల‌ని సూచించ‌గా.. పేర్నినాని కుటుంబం ఆ మొత్తాన్ని చెల్లించింది. మూడు రోజుల కిందట మరో రూ.1.67 కోట్లు చెల్లించాల‌ని అధికారులు పేర్ని నాని కుటుంబానికి నోటీసులు ఇచ్చారు.

కాగా ఈ కేసులో ఏ1గా ఉన్న జ‌య‌సుధ కోర్టును ఆశ్రయించడంతో ఆమెకు ముందస్తు బెయిలు లభించింది. అయితే విచారణకు సహకరించాలని కోర్టు ఆదేశించింది. ఇక ఈ కేసులో ఏ2, ఏ3, ఏ4, ఏ5లుగా ఉన్న మాన‌స్ తేజ్‌, కోటిరెడ్డి, లారీ డ్రైవ‌ర్ మంగారావు, రైస్ మిల్ల‌ర్ ఆంజ‌నేయులును పోలీసులు అరెస్టు చేసి విచారించారు.  ఆ విచారణలో వీరు  గోదాములో బియ్యం మాయం వెనుక పేర్ని నాని ప్ర‌మేయం ఉంద‌ని  స్ప‌ష్టం చేశారు. దీంతో పోలీసులు పేర్ని నానిని ఈ కేసులో ఏ6గా చేర్చి ఎఫ్ఐఆర్ నమోదు చేశారు.  దీంతో ఆయ‌న ముంద‌స్తు బెయిల్ కోసం కోర్టుకు వెళ్లారు.    ఇప్పుడు కోర్టు తీర్పు రిజర్వ్ చేయడంతో రాజకీయ వర్గాలలో  నాని అరెస్టౌతారా, అవ్వరా అంటూ పెద్ద ఎత్తున చర్చ జరుగుతోంది. న్యాయ నిపుణులు మాత్రం రేషన్ బియ్యం మాయం కేసులో నాని పూర్తిగా ఇరుక్కున్నారన్న అభిప్రాయమే వ్యక్తం అవుతోంది.