డీఎంకే  శాసనసభాపక్ష నేతగా ఆ పార్టీ యువజన విభాగం కార్యదర్శి, ఎమ్మెల్యే, మాజీ ఉపముఖ్యమంత్రి ఉదయనిధి స్టాలిన్‌ ఏకగ్రీవంగా ఎన్నికయ్యారు. శాసనసభ్యుల ప్రమాణస్వీకారానికి ఒకరోజు ముందు అంటే నిన్న డీఎంకే ఈ మేరకు ప్రకటన విడుదల చేసింది. ఇక  డీఎంకే శాసన సభాపక్ష  ఉపనేతగా పార్టీ సీనియర్ నాయకుడు   కేఎన్ నెహ్రూ, పార్టీ విప్‌గా ఈవీ వేలు నియమితులయ్యారు.

 అంతకు ముందు  డీఎంకే అధ్యక్షుడు, మాజీ ముఖ్యమంత్రి ఎంకే స్టాలిన్ అధ్యక్షతన ఎమ్మెల్యేల  సమావేశం జరిగింది. కూటమిని వీడిన కాంగ్రెస్‌ను విమర్శిస్తూ  ఈ సమావేశం తీర్మానం చేసింది.  భవిష్యత్తులో పార్టీకి సంబంధించి అన్ని రాజకీయ నిర్ణయాలు తీసుకునే అధికారాన్ని స్టాలిన్‌కు అప్పగిస్తూ మరో తీర్మానాన్ని ఆమోదించింది. ఈరోజు నుంచి అసెంబ్లీ సమావేశాలు ప్రారంభం కానుండటంతో, ప్రతిపక్షంలో ఉన్న డీఎంకే తమ శాసనసభాపక్ష కార్యవర్గాన్ని ప్రకటించింది.