యూపీలోని గోరఖ్ పూర్ లో ఉన్న ఒక రైల్వే హాస్పిటల్ కు చెందిన మరుగుదొడ్లకు తాజాగా వేసిన రంగు తీవ్ర వివాదానికి దారి తీసింది. అక్కడి గోడలపై ఎరుపు, ఆకుపచ్చ రంగు టైల్స్‌ ను ఉపయోగించడంపై అఖిలేష్ యాదవ్ కు చెందిన సమాజ్‌వాదీ పార్టీ( SP) ఫైర్ అయింది. తమ పార్టీ జెండా రంగులను పోలి ఉన్నరంగులతో టైల్స్‌ వేయడమంటే తమను తమ పార్టీని అవమానించడమేనంటూ మండిపడింది. ఆ రంగులను వెంటనే తొలగించాలని.. ఒక వేళ రంగులను మార్చకపోతే తాము ఆందోళన ఉధృతం  చేస్తామని హెచ్చరించింది. అక్కడి రైల్వే ఆస్పత్రిలోని మరుగుదొడ్ల గోడలకు 4 నెలల క్రితమే ఈ రంగులని వేసినప్పటికీ.. ఇటీవల దీనికి సంబంధించిన ఫోటోలు సోషల్ మీడియాలో వైరల్ గా మారడంతో.. సమాజ్‌వాదీ పార్టీ తీవ్రంగా స్పందించింది.