నవంబర్ శ్రీవారి ఆర్జిత సేవల ఆన్‌లైన్ కోటా విడుదల..!

వరుస సెలవులు రావడంతో తిరుమలగిరులు భక్తుల జనసందోహంతో కిటకిటలాడుతున్నాయి. కలియుగ వైకుంఠనాథుడైన శ్రీ వేంకటేశ్వర స్వామివారి దర్శనార్థం వివిధ ప్రాంతాల నుంచి భారీ సంఖ్యలో భక్తులు తిరుమలకు పోటెత్తారు.వైకుంఠం క్యూ కాంప్లెక్స్‌లోని అన్ని కంపార్ట్‌మెంట్లు భక్తులతో నిండిపోవడమే కాకుండా, క్యూలైన్లు బయటి వరకు విస్తరించాయి. టైమ్ స్లాట్ టోకెన్లు లేని సాధారణ భక్తులకు సర్వదర్శనం లభించడానికి ప్రస్తుతం సుమారు 22 గంటల సమయం పడుతోంది. క్యూలైన్లలో వేచి ఉన్న భక్తులకు ఎలాంటి ఇబ్బందులు తలెత్తకుండా తిరుమల తిరుపతి దేవస్థానం (టీటీడీ) అధికారులు నిరంతరం తాగునీరు, పాలు, అన్నప్రసాదాలను పంపిణీ చేస్తున్నారు.

నిన్న ఒక్కరోజే 90 వేల మంది దర్శనం..!

శనివారం ఒక్కరోజే రికార్డు స్థాయిలో 90,293 మంది భక్తులు శ్రీవారిని దర్శించుకుని మొక్కులు చెల్లించుకున్నారు. అందులో 53,090 మంది భక్తులు స్వామివారికి తలనీలాలు సమర్పించారు. నిన్న ఒక్కరోజే స్వామివారి హుండీ ద్వారా రూ. 3.81 కోట్ల ఆదాయం సమకూరినట్లు టీటీడీ అధికారులు వెల్లడించారు. రద్దీ తీవ్రంగా ఉన్నందున దర్శన సమయం మరికొంత పెరిగే అవకాశం ఉందని, వృద్ధులు, చిన్నపిల్లలతో వచ్చే భక్తులు తగిన జాగ్రత్తలు తీసుకోవాలని టీటీడీ విజ్ఞప్తి చేసింది.

నవంబర్ నెలకు సంబంధించిన వివిధ ఆర్జిత సేవలు, దర్శన టికెట్లతో పాటు అద్దె గదుల కోటా విడుదలకు ముహూర్తం ఖరారు చేసింది. ఈ క్రమంలోనే ప్రధాన ఆర్జిత సేవలైన సుప్రభాతం, తోమాల, అర్చన, అష్టదళ పాదపద్మారాధన టికెట్లకు సంబంధించి లక్కీ డిప్ కోటాను ఈ నెల 18వ తేదీన ఉదయం 10 గంటలకు ఆన్‌లైన్‌లో అందుబాటులో ఉంచనున్నారు. 

ఈ సేవలను పొందగోరే భక్తులు ఈ నెల 20వ తేదీ ఉదయం 10 గంటల వరకు తమ పేర్లను ఎలక్ట్రానిక్ డిప్ కోసం నమోదు చేసుకోవచ్చని అధికారులు వెల్లడించారు. లక్కీ డిప్‌లో టికెట్లు పొందిన వారు 20 నుండి 22వ తేదీ మధ్యాహ్నంలోగా నిర్ణీత రుసుము చెల్లించి దర్శన టికెట్లను ఖరారు చేసుకోవాల్సి ఉంటుంది.

ఇక వర్చువల్ సేవలతో పాటు ప్రత్యక్షంగా పాల్గొనే ఇతర ఆర్జిత సేవల కోటా ఈ నెల 21వ తేదీన విడతల వారీగా అందుబాటులోకి రానుంది. ఉదయం 10 గంటలకు కల్యాణోత్సవం, ఊంజల్ సేవ, ఆర్జిత బ్రహ్మోత్సవం, సహస్ర దీపాలంకార సేవ మరియు పవిత్రోత్సవాల టికెట్లు విడుదలవుతాయి. అదే రోజు మధ్యాహ్నం 3 గంటలకు వర్చువల్ సేవలు మరియు వాటికి సంబంధించిన దర్శన స్లాట్లను విడుదల చేయడానికి అధికారులు ఏర్పాట్లు చేశారు.భక్తులు ఎలాంటి దళారులను నమ్మకుండా కేవలం TTD Official Website ద్వారా మాత్రమే తమ టికెట్లను బుక్ చేసుకోవాలని దేవస్థానం యాజమాన్యం విజ్ఞప్తి చేస్తోంది.

Tirumala Heavy Rush, Tirumala Sarva Darshan Time, Srivari Hundi Income, TTD Updates, Tirupati News in Telugu