తెలంగాణ రాష్ట్ర వ్యాప్తంగా వాతావరణంలో వేగంగా మార్పులు వస్తున్నాయి. పగటి పూట ఎండ ప్రభావం ఉన్నప్పటికీ, సూర్యాస్తమయం తర్వాత వాతావరణం ఒక్కసారిగా చల్లబడుతోంది. ముఖ్యంగా రాత్రి వేళల్లో చలి తీవ్రత క్రమంగా పెరుగుతుండటంతో ప్రజలు ఉన్ని దుస్తులను బయటికి తీయాల్సిన పరిస్థితి ఏర్పడుతోంది. రానున్న రెండు రోజుల పాటు ఉత్తర, పశ్చిమ తెలంగాణ జిల్లాల్లో రాత్రి ఉష్ణోగ్రతలు గణనీయంగా పడిపోయే అవకాశం ఉందని వాతావరణ నిపుణులు అంచనా వేస్తున్నారు. ఈ ప్రాంతాల్లో వీస్తున్న చల్లటి ఈదురుగాలుల కారణంగా సాధారణం కంటే తక్కువ ఉష్ణోగ్రతలు నమోదవుతున్నాయని అధికారులు తెలిపారు. 

ప్రధానంగా ఆదిలాబాద్, కొమురం భీం ఆసిఫాబాద్, నిర్మల్, నిజామాబాద్ అలాగే సంగారెడ్డి వంటి జిల్లాల్లో కనిష్ట ఉష్ణోగ్రతలు 13 డిగ్రీల సెల్సియస్‌ కంటే దిగువకు పడిపోయే సూచనలు కనిపిస్తున్నాయి. దీంతో ఈ జిల్లాల ప్రజలు చలికి గజగజ వణకాల్సి వస్తుందని వాతావరణ శాఖ హెచ్చరిస్తోంది. మరోవైపు గ్రేటర్ హైదరాబాద్ మున్సిపల్ కార్పొరేషన్ పరిధిలోని శివారు ప్రాంతాలు, అలాగే చెట్లు ఎక్కువగా ఉండే గ్రీన్ జోన్లలో రాత్రిపూట కనిష్ట ఉష్ణోగ్రతలు దాదాపు 15 డిగ్రీల సెల్సియస్‌కు చేరుకునే అవకాశం ఉంది. నగరవాసులు ఉదయం  రాత్రి వేళల్లో ఆహ్లాదకరమైన వాతావరణాన్ని ఆస్వాదిస్తూనే, చలిగాలుల పట్ల అప్రమత్తంగా ఉంటున్నారు. 

వాతావరణంలో వస్తున్న ఈ అకస్మాత్ మార్పుల వల్ల ఆరోగ్య సమస్యలు తలెత్తే ప్రమాదం ఉంది. ముఖ్యంగా చిన్నారులు, వృద్ధులు  శ్వాసకోశ సమస్యలు ఉన్నవారు రాత్రి సమయాల్లో తగిన జాగ్రత్తలు తీసుకోవాలని వైద్య నిపుణులు సూచిస్తున్నారు. సాయంత్రం వేళల్లో బయటికి వెళ్లేటప్పుడు తగిన రక్షణ దుస్తులు ధరించడం మంచిది.ఇదిలా ఉండగా, బంగాళాఖాతంలో ఏర్పడిన వాతావరణ అల్లకల్లోలం తుపాను కదలికల ప్రభావం కూడా రాష్ట్రంలోని వాతావరణ పరిస్థితులపై పడే అవకాశం ఉంది. 

దీనికి సంబంధించిన తుది నివేదికను వాతావరణ శాఖ త్వరలోనే విడుదల చేయనుంది. ఈ తుపాను ప్రభావం కారణంగా రానున్న రోజుల్లో చలి తీవ్రత మరింత పెరిగేలా కనిపిస్తోంది. రాష్ట్రంలో రానున్న రోజుల్లో ఉష్ణోగ్రతలు మరింత పడిపోయి శీతాకాలం ముందస్తుగానే తన ప్రభావాన్ని చూపించే అవకాశం ఉందని నిపుణులు అంచనా వేస్తున్నారు. ప్రజలు వాతావరణ శాఖ సూచనలను ఎప్పటికప్పుడు గమనిస్తూ అప్రమత్తంగా ఉండాలని అధికారులు కోరుతున్నారు.

[ Telangana weather, night temperatures drop, Hyderabad weather update, cold wave in Telangana, cyclone impact weather, Telugu One, Telugu News ]