చెన్నై నగరం ఆదివారం ఉదయం నుంచి రాజకీయ, సినీ వర్గాల కదలికలతో కిక్కిరిసింది. తమిళనాడు రాజకీయాల్లో కొత్త అధ్యాయానికి నాంది పలికేలా నగరంలోని  జవహర్ లాల్ నెహ్రూ స్టేడియం వద్ద భారీ ఏర్పాట్లు జరిగాయి.తమిళ సినీ నటి  త్రిష కృష్ణన్  స్టేడియానికి చేరుకుని ప్రత్యేక ఆకర్షణగా నిలిచారు. అక్కడికి చేరుకున్న ఆమె, విజయ్ కుటుంబ సభ్యులను ఆత్మీయంగా పలకరించారు. ఈ సందర్భంగా అభిమానులు పెద్ద సంఖ్యలో స్టేడియం వద్దకు తరలివచ్చారు.

ఇదే సమయంలో, తమిళగ వెట్రి కళగం (TVK) అధినేత విజయ్ ఫార్మల్ లుక్‌లో స్టేడియానికి చేరుకోవడం అక్కడి వాతావరణాన్ని మరింత ఉత్సాహభరితంగా మార్చింది. కొద్దిసేపట్లోనే ఆయన తమిళనాడు ముఖ్యమంత్రిగా ప్రమాణ స్వీకారం చేయనున్న నేపథ్యంలో పార్టీ కార్యకర్తల్లో ఆనందం వ్యక్తమైంది. ఈ కార్యక్రమానికి జాతీయ స్థాయి ప్రాధాన్యం కూడా ఏర్పడింది. 

లోక్‌సభలో ప్రతిపక్ష నేత, కాంగ్రెస్ అగ్రనేత రాహుల్ గాంధీ చెన్నై చేరుకుని వేడుకకు హాజరుకానున్నట్లు పార్టీ వర్గాలు తెలిపాయి. ఆయనకు చెన్నై విమానాశ్రయంలో పార్టీ నేతలు ఘన స్వాగతం పలికారు. విజయ్ ప్రమాణ స్వీకార వేడుకపై దేశవ్యాప్తంగా రాజకీయ వర్గాలు దృష్టి సారించాయి. ఈ కార్యక్రమం తమిళనాడు రాజకీయాల్లో కొత్త మార్పులకు దారితీయనున్నదని చర్చలు జోరుగా సాగుతున్నాయి.