రాష్ట్రంలోని 18 అసెంబ్లీ, ఒక పార్లమెంటు స్థానాల్లో జూన్ 12న ఉప ఎన్నికలు జరగనున్నాయి. ఇప్పటి వరకూ అన్ని పార్టీల నేతలు స్వయంగా ఇతర పార్టీలపై నేరుగా బురదజల్లే ప్రయత్నాలు చేశారు. అదీ ప్రచార సమయంలో మాత్రమే. కానీ, కొందరు తెలివైన వ్యక్తులు ఈ ఎస్ ఎంఎస్ లను కూడా ప్రచారానికి వాడుకుంటున్నారు.ఇలా ప్రచారంలో ఓట్లు అభ్యర్థించటంతో సరిపెట్టకుండా ప్రత్యర్థుల పై ఆరోపణలు గుప్పిస్తూ ప్రచారం చేస్తున్నారు. ఫలానా అభ్యర్థికి మీరు ఓటు వేస్తే నియోజకవర్గానికి నష్టం జరుగుతుందని హెచ్చరిస్తున్నారు. ఇలా వ్యక్తిగత ఆరోపణలకు టెక్నాలజీని వినియోగించే వారందరిపైనా చర్య తీసుకోవాలని ఇసి నిర్ణయించుకుంది. దానిలో భాగంగానే ఇటీవల గుంటూరులో వెలుగులోకి వచ్చిన ఈ నెగిటీవ్ ప్రచార ఎస్ ఎంఎస్ లపై చర్య తీసుకోవాలని పోలీసులను కోరింది. ఎన్నికల ప్రధానాధికారి భన్వర్ లాల్ ఈ ఎస్ ఎంఎస్ లపై మండిపడి పోలీసులు ఎలాగైనా ఈ కేసును చేధించాలని ఆదేశించారు. కోడ్ ఎవరు ఉల్లంఘించినా ఉపేక్షించొద్దని పోలీసులకు తెలిపారు. దీంతో గుంటూరు జిల్లా ఎస్పీ కూడా స్పందించి ఎవరికైనా ఇటువంటి ఎస్ ఎంఎస్ లు వస్తే తనకు తెలియజేయాలని కోరారు.