అవును, మోదీని రాజీనామా చేయమంటోంది విపక్షం. నెటిజన్లు సైతం 'రిజైన్ మోదీ' హ్యాష్ టాగ్ తో పెద్ద ఎత్తున సోషల్ మీడియాలో డిమాండ్ చేస్తున్నారు. ఉక్రెయిన్ పై రష్యా దాడిలో భారతీయ విద్యార్థి చనిపోవడంతో ప్రధాని మోదీపై పెద్ద ఎత్తున విమర్శలు వస్తున్నాయి. ప్రత్యేక విమానాలు పంపించి.. వార్ జోన్ లో చిక్కుకుపోయినా వేలాది మంది ఇండియన్స్ ను హుటాహుటినా తరలిస్తున్నా.. ఇప్పటికే ఆలస్యం అయిపోయింది. ఓ ప్రాణం పోయాక.. ఇన్ని విమర్శలు వచ్చాక.. చేతులు కాలాక ఆకులు పట్టుకుంటే లాభం ఏముందని మండిపడుతున్నారు. ప్రధానిగా మోదీ అనర్హుడని.. రాజీనామా చేయాలంటూ తెగ ట్రోల్స్ నడుస్తున్నాయి. 

ఆపరేషన్ గంగ పేరుతో భారత ప్రభుత్వం ఉక్రెయిన్ లో చిక్కుకుపోయిన విద్యార్థులను వెనక్కి తీసుకొస్తోంది. మంగళవారం ఆరు విమానాలతో 1377 మందిని స్వదేశానికి తరలించింది. ఆ ఆపరేషన్ ఇంకా కొనసాగుతోంది. అయితే.. యుద్ధం ప్రారంభమై వారం గడుస్తుండగా.. ఇప్పుడు నిద్రలేచారా? అంటూ మోదీ సర్కారుపై విమర్శలు వస్తున్నాయి. మిగతా దేశాలు వార్ బెల్ మోగక ముందే.. తమ దేశస్తులను తీసుకెళితే.. మోదీ ప్రభుత్వం మాత్రం ఓ ప్రాణం పోయాక కానీ.. బాధ్యత గుర్తు రాలేదని మండిపడుతున్నారంతా. ఉక్రెయిన్ వార్ అనే కాదు.. గతంలో ఫస్ట్ వేవ్ కరోనా టైమ్ లోనూ మోదీ తన అసమర్థతను ఇలానే చాటుకున్నారని గుర్తి చేస్తున్నారు. 

2020 తొలినాళ్లలో పరిస్థితి విషమించాక గానీ.. దేశంలోకి విదేశీ విమానాల రాకపై నిషేధం విధించలేదు కేంద్రం. అప్పటికే పెద్ద సంఖ్యలో కరోనా బాధితులు భారత్ లో దిగిపోయారు. దేశ నలుమూలలా వైరస్ ను వ్యాపింపజేశారు. ఇక, ముందస్తు ప్రిపరేషన్ లేకుండా లాక్ డౌన్ విధించడం.. వలస కూలీలతో కేంద్రం వ్యవహరించిన తీరు తీవ్ర అబాసు పాలైంది. ఆ తర్వాత వ్యాక్సిన్ విషయంలోనూ ఇలాంటి వైఫల్యమే. ప్రయోగ దశలో కొవిడ్ టీకా తయారీ సంస్థలను ప్రోత్సహించకపోవడం.. ఒక్క రూపాయి కూడా ఆర్థిక సాయం అందజేయకపోవడంపై విమర్శలు వచ్చాయి. ఆ తర్వాత కూడా పౌరులకు ఉచితంగా వ్యాక్సిన్ అందించేందుకు మోదీ ప్రభుత్వం మొదట్లో తిధి-వారాలు లెక్కపెడుతూ కూర్చొంది. సుప్రీంకోర్టు మొట్టికాయలు వేశాక కానీ.. పౌరులందరికీ ఉచిత వ్యాక్సిన్ ఇస్తామని ప్రకటించింది. ఇప్పుడు ఉక్రెయిన్ నుంచి భారతీయులను రప్పించే విధానంలోనూ మోదీ గవర్నమెంట్ అట్టర్ ఫ్లాప్ అనే చర్చ నడుస్తోంది. 

పెద్ద నోట్ల రద్దు, బ్లాక్ మనీ రప్పించడం.. ఇలా అనేక అంశాల్లో మోదీ అపరిపక్వత స్పష్టం అవుతోందని అంటున్నారు. త్రిబుల్ తలాఖ్ రద్దు.. ఆర్టికల్ 370 రద్దు.. సర్జికల్ స్ట్రైక్స్ చేసినంత మాత్రాన గొప్ప ప్రధాని అయిపోరని.. దేశమంటే మట్టి కాదోయ్.. మనుషులని.. ఆ దేశ ప్రజలకు మోదీ ఏం చేశారో చెప్పాలంటూ.. సోషల్ మీడియాలో పోస్టులపై పోస్టులు పెడుతున్నారు. కరోనా కాలంలో, ఉక్రెయిన్ వార్ లో భారతీయులను ఆదుకోవడంలో ఘోరంగా విఫలమైన మోదీ.. ప్రధాని పదవిలో ఉండేందుకు యోగ్యుడు కాడంటూ.. రిజైన్ మోదీ అంటూ.. నెటిజన్లు హోరెత్తిస్తున్నారు. అయితే, ఈ టాపిక్ ను పక్కదారి పట్టించేందుకు.. మోదీని అసలైన హీరోగా ప్రొజెక్ట్ చేసేందుకు.. మరో దేశభక్తి పాయింట్ కోసం వెతుకుతోంది కమలం పార్టీ. ఇక ఎప్పటిలానే.. భారత్ మాతాకీ జై.. మోదీకీ జైజై.. అని త్వరలోనే జనాలతో అనిపించే ఎత్తుగడ వేస్తోంది కమలదళం.