వీసీ జానయ్యపై లైంగిక వేధింపుల ఆరోపణలు.. గవర్నర్‌కు మహిళా ప్రొఫెసర్ ఫిర్యాదు.!

ప్రొఫెసర్ జయశంకర్ వ్యవసాయ విశ్వవిద్యాలయంలో వివాదం రోజురోజుకూ ముదురుతోంది. వైస్ ఛాన్సలర్ అల్డాస్ జానయ్యపై ఓ మహిళా ప్రొఫెసర్ చేసిన లైంగిక వేధింపుల ఆరోపణలు తీవ్ర కలకలం రేపుతున్నాయి. ఈ వ్యవహారంపై ఇప్పటికే డీజీపీ, ఉమెన్ సేఫ్టీ వింగ్‌కు ఫిర్యాదు చేసిన బాధితురాలు.. తాజాగా రాష్ట్ర గవర్నర్‌కు కూడా లేఖ రాశారు. వీసీపై చర్యలు తీసుకోవాలని కోరారు. మరోవైపు, తనపై వస్తున్న ఆరోపణలను వీసీ జానయ్య తీవ్రంగా ఖండించారు. వీటి వెనుక కుట్ర ఉందంటూ డీజీపీకి ఫిర్యాదు చేయడం ఇప్పుడు చర్చనీయాంశంగా మారింది.

తనపై వస్తున్న ఆరోపణల్లో వాస్తవం లేదని వీసీ జానయ్య స్పష్టం చేశారు. విశ్వవిద్యాలయంలో పరిపాలనాపరమైన సంస్కరణలు చేపడుతున్న నేపథ్యంలో కొందరు తనను వ్యక్తిగతంగా లక్ష్యంగా చేసుకుని దుష్ప్రచారం చేస్తున్నారని ఆరోపించారు. ముఖ్యంగా ఓ మహిళా ప్రొఫెసర్ బదిలీ వ్యవహారమే ఈ వివాదానికి కారణమని పేర్కొన్నారు. బదిలీ నిర్ణయంపై అసంతృప్తితోనే తనపై ఆరోపణలు చేస్తున్నారని ఆయన వాదిస్తున్నారు.

ఈ వ్యవహారంపై సమగ్రంగా, నిష్పక్షపాతంగా విచారణ జరపాలని కోరుతూ డీజీపీ సీవీ ఆనంద్‌కు వీసీ జానయ్య లేఖ సమర్పించారు. సంబంధిత మహిళా ప్రొఫెసర్ గత కొన్ని నెలలుగా ఎవరెవరితో మాట్లాడారనే అంశాన్ని సాంకేతిక ఆధారాలతో పరిశీలించాలని కోరారు. కాల్ డేటా రికార్డులు, ఆడియో, వీడియో సంభాషణలను విశ్లేషించి వాస్తవాలను వెలికితీయాలని తన లేఖలో పేర్కొన్నారు. అయితే, ఈ ఆరోపణలు, ప్రత్యారోపణలపై పోలీసుల విచారణలోనే అసలు విషయాలు తేలాల్సి ఉంది.

మరోవైపు, విశ్వవిద్యాలయంలో మహిళా ప్రొఫెసర్ల ఆందోళనలు కొనసాగుతున్నాయి. వీసీకి వ్యతిరేకంగా మాట్లాడితే బదిలీలతో ఇబ్బందులకు గురిచేస్తున్నారంటూ కొందరు మహిళా ప్రొఫెసర్లు ఆవేదన వ్యక్తం చేస్తున్నారు. గత ఏడాదిన్నర కాలంలో సుమారు 1,150 మంది ఉద్యోగులను బదిలీ చేసినట్లు ఆరోపణలు వినిపిస్తున్నాయి. అసిస్టెంట్ ప్రొఫెసర్ చేపట్టిన నిరసనలకు మహిళా సంఘాలు, రాజకీయ నాయకులు మద్దతు తెలుపుతున్నారు.

ఈ వివాదంపై బీఆర్ఎస్ నేతలు కూడా స్పందించారు. ఎమ్మెల్యేలు సబితా ఇంద్రారెడ్డి, సునీత లక్ష్మారెడ్డి, మాజీ మంత్రి సత్యవతి రాథోడ్ బాధిత మహిళా ప్రొఫెసర్లను పరామర్శించారు. నిరసన తెలుపుతున్న ప్రొఫెసర్లు, విద్యార్థులకు సంఘీభావం ప్రకటించారు. మహిళా ప్రొఫెసర్లపై వేధింపులకు పాల్పడినట్లు ఆరోపణలు ఎదుర్కొంటున్న వీసీ జానయ్యపై ప్రభుత్వం తక్షణమే చర్యలు తీసుకోవాలని డిమాండ్ చేశారు.

ఒకవైపు మహిళా ప్రొఫెసర్ ఫిర్యాదులు, మరోవైపు వీసీ జానయ్య ఎదురుదాడి.. ఇంకోవైపు విశ్వవిద్యాలయంలో ఆందోళనలు.. వెరసి ఈ వ్యవహారం తెలంగాణలో విద్యా, రాజకీయ వర్గాల్లో తీవ్ర చర్చకు దారితీసింది. గవర్నర్‌కు అందిన ఫిర్యాదుపై ఎలాంటి స్పందన వస్తుంది? డీజీపీకి వీసీ చేసిన ఫిర్యాదుపై పోలీసులు ఎలా స్పందిస్తారు? విచారణలో ఎలాంటి అంశాలు వెలుగులోకి వస్తాయి? అన్నది ఇప్పుడు ఆసక్తికరంగా మారింది.

ఇది కూడా చదవండి: ఇంటర్నెట్ లేకున్నా వాతావరణ సమాచారం.. హైదరాబాద్ కుర్రోడి అద్భుత ఆవిష్కరణ.!

[ Prof Jayashankar Agricultural University VC Janaiah, Professor Aldas Janaiah, DGP CV Anand, Telangana Agriculture University, Sexual Harassment Allegations, Telangana News, Telugu News ]