గుంటూరు జైల్లో వున్న బాపట్ల వైసీపీ మాజీ ఎంపీ నందిగం సురేష్ భుజం, ఛాతీ నొప్పిగా వుందని అనడంతో జైలు అధికారులు ఆయన్ని గుంటూరు జనరల్ ఆస్పత్రికి తరలించారు. భుజం విపరీతంగా నొప్పి పుట్టడంతోపాటు ఛాతీలో కూడా నొప్పిగా వుందని, హార్టెటాక్ కావచ్చన్న అనుమానంగా వుందని నందిగం సురేష్ చెప్పడంతో జైలు అధికారులు అప్రమత్తమయ్యారు. నందిగం సురేష్‌కి ఆస్పత్రిలో వైద్య పరీక్షలు జరుగుతున్నాయి. అయితే జైలు అధికారులు మాత్రం ఇది హార్టెటాక్ కాకపోవచ్చని, నందిగం సురేష్‌ని అరెస్టు చేసిన సమయంలో కూడా ఆయనకు భుజం నొప్పి వుందని అంటున్నారు. వైసీపీ అధికారంలో వుండగా అప్పటి ప్రతిపక్ష నాయకుడు చంద్రబాబు ఇంటి మీద దాడి చేసిన కేసుతోపాటు మరియమ్మ అనే మహిళను హత్య చేసిన కేసులో నిందితుడైన నందిగం సురేష్ రిమాండ్‌లో వున్నారు. నందిగం సురేష్‌ది  హృదయ సంబంధ అనారోగ్యం కాదని నిర్ధారించుకున్న తర్వాత ఆయన్ని తిరిగి జైలుకు తరలిస్తామని అధికారులు చెబుతున్నారు.