స్టాక్ మార్కెట్లో పెట్టుబడి పెట్టేటప్పుడు రిస్క్ తగ్గించుకోవడానికి చాలామంది ఇన్వెస్టర్లు ఎంచుకునే ప్రధాన మార్గం డైవర్సిఫికేషన్. ఇందుకోసం వేర్వేరు కేటగిరీలకు చెందిన మ్యూచువల్ ఫండ్స్, అంటే ఫ్లెక్సీ క్యాప్, లార్జ్ & మిడ్ క్యాప్, మల్టీ క్యాప్ మరియు లార్జ్ క్యాప్ ఫండ్లలో డబ్బులు ఇన్వెస్ట్ చేస్తుంటారు. వేర్వేరు పేర్లు, విభిన్న కేటగిరీలు ఉన్న ఫండ్లలో పెట్టుబడి పెడితే తమ పోర్ట్‌ఫోలియో సురక్షితంగా డైవర్సిఫై అవుతుందని, వేర్వేరు కంపెనీల స్టాక్స్ లభిస్తాయని సాధారణంగా అందరూ భావిస్తారు. అయితే, వ్యాల్యూ రీసెర్చ్ నిర్వహించిన ఒక తాజా విశ్లేషణ ఇన్వెస్టర్లకు కన్నువిప్పు కలిగించే దిగ్భ్రాంతికరమైన విషయాలను బయటపెట్టింది. మీరు వేర్వేరు కేటగిరీలకు చెందిన ఫండ్లలో ఇన్వెస్ట్ చేసినప్పటికీ, అవి అంతర్గతంగా ఒకే రకమైన స్టాక్లలో భారీగా పెట్టుబడి పెడుతున్నాయని ఈ అధ్యయనం ద్వారా స్పష్టమైంది. దీనివల్ల డైవర్సిఫికేషన్ దేవుడు ఎరుగు, ఒకే రకమైన రిస్క్‌కు ఇన్వెస్టర్లు గురవుతున్నారు.

ఈ అధ్యయనం ప్రకారం, బ్యాంక్ ఆఫ్ ఇండియా (BOI) అసెట్ మేనేజ్‌మెంట్ కంపెనీకి చెందిన BOI లార్జ్ & మిడ్ క్యాప్ ఫండ్ మరియు BOI మల్టీ క్యాప్ ఫండ్ల మధ్య ఏకంగా 79.4 శాతం పోర్ట్‌ఫోలియో ఓవర్‌లాప్ ఉంది. అంటే ఈ రెండు ఫండ్లు వేర్వేరు కేటగిరీలకు చెందినవి అయినప్పటికీ, వాటిలో దాదాపు 80 శాతం స్టాక్స్ ఒకే రకంగా ఉన్నాయి. కేవలం ఒకే మ్యూచువల్ ఫండ్ హౌస్ మాత్రమే కాదు, పరిశ్రమలోని అనేక ప్రముఖ ఫండ్ హౌస్‌లలోనూ ఇదే తరహా ధోరణి కనిపిస్తోంది. ఉదాహరణకు కెనరా రోబెకో ఫ్లెక్సీ క్యాప్ ఫండ్ మరియు కెనరా రోబెకో లార్జ్ క్యాప్ ఫండ్ల మధ్య 74.9 శాతం ఓవర్‌లాప్ ఉండగా, హెలియోస్ ఫ్లెక్సీ క్యాప్ ఫండ్ మరియు హెలియోస్ లార్జ్ & మిడ్ క్యాప్ ఫండ్ల మధ్య 74.3 శాతం పోర్ట్‌ఫోలియో ఓవర్‌లాప్ నమోదైంది. అలాగే బరోడా బిఎన్‌పి ఫ్లెక్సీ క్యాప్ ఫండ్ మరియు బరోడా బిఎన్‌పి లార్జ్ & మిడ్ క్యాప్ ఫండ్ మధ్య 74.2 శాతం, జియోబ్లాక్‌రాక్ ఫ్లెక్సీ క్యాప్ ఫండ్ మరియు జియోబ్లాక్‌రాక్ లార్జ్ క్యాప్ ఫండ్ల మధ్య 70.9 శాతం, యాక్సిస్ లార్జ్ & మిడ్ క్యాప్ ఫండ్ మరియు యాక్సిస్ మల్టీ క్యాప్ ఫండ్ మధ్య 68.4 శాతం పోర్ట్‌ఫోలియో పోలికలు ఉన్నాయి.

సెబీ నిబంధనల ప్రకారం ప్రతీ ఫండ్ కేటగిరీకి ప్రత్యేక విధివిధానాలు, పెట్టుబడి నిబంధనలు ఉంటాయి. ఫ్లెక్సీ క్యాప్ ఫండ్లు ఎలాంటి పరిమితులు లేకుండా లార్జ్, మిడ్ మరియు స్మాల్ క్యాప్ స్టాక్స్ లో స్వేచ్ఛగా ఇన్వెస్ట్ చేయవచ్చు. లార్జ్ & మిడ్ క్యాప్ ఫండ్లు లార్జ్ క్యాప్ లలో కనీసం 35 శాతం, మిడ్ క్యాప్ లలో కనీసం 35 శాతం ఇన్వెస్ట్ చేయాల్సి ఉంటుంది. అలాగే మల్టీ క్యాప్ ఫండ్లు లార్జ్, మిడ్ మరియు స్మాల్ క్యాప్ లలో కనీసం 25 శాతం చొప్పున కేటాయించాలి. అయితే మిగిలిన శాతాన్ని ఫండ్ మేనేజర్లు తమ ఇష్టానుసారంగా కేటాయించే అవకాశం ఉండటంతో, వేర్వేరు కేటగిరీల ఫండ్లు కూడా మార్కెట్లో ప్రజాదరణ పొందిన ఒకే రకమైన లార్జ్ క్యాప్, మిడ్ క్యాప్ కంపెనీల స్టాక్లను కొనుగోలు చేస్తున్నాయి.

different fund categories same stocks overlap,equity mutual fund portfolio overlap study