ఆంధ్రప్రదేశ్ రాష్ట్రం భారీ వర్షాలు, వరదల్లో చిక్కుకున్న నేపథ్యంలో, సహాయ కార్యక్రమాల్లో నిమగ్నమై వున్న ముఖ్యమంత్రి నారా చంద్రబాబు నాయుడికి భారత ప్రధాని నరేంద్ర మోడీ ఫోన్ చేశారు. వరద పరిస్థితుల గురించి మోడీ సీఎం చంద్రబాబును అడిగి తెలుసుకున్నారు. కేంద్రం నుంచి అన్నివిధాలుగా సహకారం అందిస్తామని ఈ సందర్భంగా మోడీ హామీ ఇచ్చారు. ప్రభుత్వం చేపడుతున్న సహాయక కార్యక్రమాలను చంద్రబాబు ఈ సందర్భంగా ప్రధాని మోడీకి వివరించారు. ఆంధ్రప్రదేశ్ రాష్ట్రాన్ని వరదల నుంచి ఆదుకోవడానికి ఆయా కేంద్ర శాఖలకు ఆదేశాలు ఇచ్చామని ప్రధాని మోడీ ఈ సందర్భంగా చంద్రబాబుకు తెలిపారు. రాష్ట్రానికి అవసరమైన సాయం అందించాలని, అవసరమైన సామగ్రి పంపపడానికి కూడా ఆదేశాలు ఇచ్చామని చంద్రబాబుకు మోడీ తెలిపారు.  కేంద్ర సాయంపై ప్రధానికి చంద్రబాబు ఈ సందర్భంగా ధన్యవాదాలు తెలిపారు.