తెలంగాణ గ్రామీణ ప్రాంతాలలో  ఇంటింటికీ తాగునీటిని అందించాలన్న సత్సంకల్పంతో  ప్రారంభించిన మిషన్ భగీరథ పథకం.. క్షేత్రస్థాయిలో నిర్వహణ, పర్యవేక్షణ లోపం కారణంగా నిరుపయోగంగా మారుతోందన్న విమర్శలు వెల్లువెత్తుతున్నాయి. తాగునీటి అవసరాలు తీర్చడం అటుంచి, నీటి వృధా అవుతోందని అంటున్నారు.  వికారాబాద్ జిల్లా పరిధిలోని దోమ మండల పరిధిలోని శివారెడ్డి పల్లి గేట్ సమీపంలో మిషన్ భగీరథ ప్రధాన పైప్‌లైన్ పగిలి గత పది రోజులుగా తాగునీరు వృదాగా రోడ్ల పాలౌతున్నా అధికారులకు చీమకుట్టినట్లైనా లేదని జనం ఫైర్ అవుతున్నారు. పైప్ లైన్ పగిలి నీరు వృధా అవుతున్నా సంబంధిత అధికారులు ఇంత వరకూ ఆ వైపు కన్నెత్తి చూడకపోడం మిషన్ బగీరథ పట్ల వారికి ఉన్న అక్కరకు నిలువెత్తు నిదర్శనంగా నిలుస్తోందని నెటిజన్లే సెటైర్లు గుప్పిస్తున్నారు.  

ఒకవైపు మంచినీటి కొరతతో జనం అల్లల్లాడుతుంటే.. మరోవైపు పది రోజులుగా నీరు వృధాగా పారుతున్నా అధికారులు పట్టించుకోకపోవడాన్ని ప్రజలు విమర్శిస్తున్నారు.  శివారెడ్డి పల్లి గేట్ ప్రాంతంలో పైప్‌లైన్ లీకేజీ కారణంగా గ్రామంలోని పలు కాలనీ వాసులకు మంచినీటి సరఫరా నిలిచిపోయింది. తాగునీటి కోసం మహిళలు, గ్రామస్థులు కిలోమీటర్ల కొద్దీ దూరంలో ఉన్న వ్యవసాయ బావులు, బోర్‌వెళ్ల వద్దకు కాలినడకన వెళ్లి నీటిని తెచ్చుకోవాల్సి దుస్థితి ఏర్పడింది.  

  10 రోజులుగా పగిలిన బగీరథ పైప్ లైన్ గురించి వృధాగా పోతున్న నీటి గురించి  సంబంధిత అధికారులకు, స్థానిక పంచాయతీ సిబ్బందికి పలుమార్లు ఫిర్యాదు చేసినా వారు ఇసుమంతైనా స్పందించలేదని స్థానికులు ఆగ్రహం వ్యక్తం చేస్తున్నారు. 

మిషన్ భగీరథ ప్రాజెక్టు పనుల్లో నాణ్యతా ప్రమాణాలలోపం కారణంగానే పైప్ లైన్ లు తరచూ పగిలి లీకేజులు జరుగుతున్నాయన్న విమర్శలు కూడా వినవస్తున్నాయి.  ఇప్పటికైనా జిల్లా యంత్రాంగం, మిషన్ భగీరథ ఉన్నతాధికారులు తక్షణమే స్పందించాలని  శివారెడ్డి పల్లి గేట్ వద్ద పగిలిన పైప్‌లైన్‌కు   యుద్ధప్రాతిపదికన మరమ్మతులు చేపట్టి, నీటి వృధాను అరికట్టాలని స్థానికులు డిమాండ్ చేస్తున్నారు.  నిలిచిపోయిన తాగునీటి సరఫరాను త్వరితగతిన పునరుద్ధరించి, ప్రజల దాహార్తిని తీర్చాలని కోరుతున్నారు.  

Mission Bhagiratha pipe burst, Doma mandal water crisis, Shivareddypalli water leakage,  Mission Bhagiratha pipeline damage