గుండు వల్ల పడని అటెండెన్స్.. కూలీ వేసిన మాస్ ప్లాన్‌తో చెక్..

సాంకేతిక పరిజ్ఞానం రోజురోజుకూ ఎంతగానో అభివృద్ధి చెందుతోంది. మనుషుల పనిని సులువు చేయడానికి సరికొత్త యాప్‌లు, ఏఐ టెక్నాలజీలు అందుబాటులోకి వస్తున్నాయి. అయితే, ఒక్కోసారి ఈ అధునాతన సాంకేతికత సామాన్యులను చిత్రవిచిత్రమైన కష్టాల్లోకి నెట్టేస్తుంటుంది. సరిగ్గా ఇలాంటి వింత సంఘటనే తెలంగాణలో చోటుచేసుకుంది. 

ప్రభుత్వ టెక్నాలజీ ఒక సాధారణ ఉపాధీ కూలీని ముప్పతిప్పలు పెట్టగా, ఆ కూలీ వేసిన ఒక క్రేజీ మాస్ ప్లాన్ ప్రస్తుతం సోషల్ మీడియాలో విపరీతంగా వైరల్ అవుతోంది. టెక్నాలజీ కంటే సామాన్యుడి సమయస్ఫూర్తి, జుగాడ్ ఐడియాలే తోపు అంటూ నెటిజన్లు ఆ కూలీ ఐడియాకు ఫిదా అయిపోతున్నారు.

తెలంగాణలోని మహబూబాబాద్ జిల్లా, ఇనుగుర్తి మండలం, కొమటిపల్లి గ్రామానికి చెందిన మాల్యాల శ్రీనివాస్ అనే వ్యక్తి ప్రతిరోజూ ఉపాధి హామీ  పనులకు వెళ్తుంటాడు. అయితే, కేంద్ర ప్రభుత్వం ఉపాధి హామీ పథకం కూలీల హాజరును పక్కాగా నమోదు చేయడానికి సరికొత్తగా ఫేస్ రికగ్నిషన్ యాప్ టెక్నాలజీని ప్రవేశపెట్టింది. 

ఈ విధానం ప్రకారం ప్రతి కూలీ తన ముఖాన్ని యాప్ కెమెరా ముందు చూపిస్తేనే అటెండెన్స్ పడుతుంది. శ్రీనివాస్ కూడా రోజూలాగే పనికి వెళ్లాడు. కానీ, ఇటీవల అతను తన తలకు గుండు చేయించుకున్నాడు. ఇదే అతనికి పెద్ద సమస్యగా మారింది. ఉపాధి పనుల వద్ద ఫీల్డ్ అసిస్టెంట్ హాజరు నమోదు చేసే సమయంలో ఫేస్ రికగ్నిషన్ యాప్ శ్రీనివాస్ ముఖాన్ని గుర్తించడానికి ససేమిరా నిరాకరించింది.

గతంలో శ్రీనివాస్‌కు తలపై నిండుగా జుట్టు ఉన్నప్పటి ముఖచిత్రం ప్రభుత్వ రికార్డుల్లో నమోదై ఉంది. కానీ, ఇప్పుడు పూర్తిగా గుండుతో ఉన్న శ్రీనివాస్ ముఖాన్ని చూసి, ఆ యాప్ మ్యాచ్ కాలేదంటూ పదే పదే రిజెక్ట్  చేసింది. ఫీల్డ్ అసిస్టెంట్ ఎంత ప్రయత్నించినా, వేర్వేరు యాంగిల్స్ లో కెమెరా పెట్టినా యాప్ మాత్రం మొండికేసింది. అక్కడ హాజరు పడకపోతే ఆ రోజు కూలి డబ్బులు రావని శ్రీనివాస్ తీవ్రంగా ఆందోళన చెందాడు. టెక్నాలజీ తెచ్చిన ఈ తంటా నుంచి ఎలా బయటపడాలా అని ఆలోచిస్తున్న తరుణంలో, శ్రీనివాస్‌కు ఒక అద్భుతమైన, అత్యంత తెలివైన దేశీ ఐడియా వచ్చింది.

వెంటనే శ్రీనివాస్ పక్కనే నిలబడి ఉన్న ఒక మహిళా కూలీ దగ్గరకు వెళ్లాడు. ఆమెకున్న పొడవాటి జుట్టును తన తలపై విగ్‌ లాగా, జుట్టు ఉన్నట్లుగా వెనుక నుంచి అడ్డం పెట్టుకున్నాడు. అలా తలపై జుట్టు భ్రమ కల్పించి, మెల్లగా యాప్ కెమెరా ముందుకు వచ్చి నిలబడ్డాడు. ఆశ్చర్యకరంగా, మరుక్షణమే ఆ ఫేస్ రికగ్నిషన్ యాప్ శ్రీనివాస్ ముఖాన్ని గుర్తుపట్టి హాజరును 'సక్సెస్' అంటూ నమోదు చేసేసింది. 

అత్యాధునిక టెక్నాలజీని ఒక సాదాసీదా కూలీ తన గృహోపకరణ ఐడియాతో బురిడీ కొట్టించడంతో అక్కడున్న తోటి కూలీలంతా ఒక్కసారిగా అవాక్కయ్యారు. ఆ తర్వాత అందరూ గొల్లున నవ్వుకున్నారు. ఈ వింత సంఘటనకు సంబంధించిన వీడియో, ఫోటోలు ప్రస్తుతం ఇంటర్నెట్‌లో విపరీతంగా హల్‌చల్ చేస్తున్నాయి. "మన భారతదేశంలో ఉన్న జుగాడ్ ఐడియాల ముందు ఏ టెక్నాలజీ అయినా బేజారు కావాల్సిందే" అంటూ సోషల్ మీడియా యూజర్లు ఈ వీడియోపై ఫన్నీ కామెంట్లు కురిపిస్తున్నారు.