మాజీ ముఖ్యమంత్రి చంద్రబాబు అరెస్ట్ కు తెలంగాణ ముఖ్యమంత్రి కెసీఆర్ హస్తం ఉందా? ఈ అనుమానాలకు బలం చేకూర్చే విధంగా  వ్యవహరించింది ఇవ్వాళ తెలంగాణ సర్కార్. చంద్రబాబు అరెస్ట్ ను ఖండించిన కెటీఆర్, హరీష్ రావ్ లు ఐటీ ఉద్యోగులు పిలుపునిచ్చిన నిరసన కార్యక్రమానికి  సంఘీభావం తెలుపక పోగా పైగా తెలంగాణ ప్రభుత్వం అడుగడుగునా అవాంతరాలు కల్గించింది. కేంద్రంలో మోడీ ప్రభుత్వంతో కెసీఆర్ కుమ్ముక్కు అయినట్టు ఆరోపణలు ఎదుర్కొంటున్న సంగతి  తెలిసిందే. చంద్రబాబు అరెస్ట్ కు కేంద్ర సర్కారుతో వైఎస్ఆర్ ప్రభుత్వం కుమ్ముక్కు అయినట్లు ఆరోపణలున్నాయి. తెలంగాణలో కెసీఆర్ ప్రభుత్వం చంద్రబాబు అరెస్ట్ ను తొలుత ఖండించలేదు. ప్రజల్లో పెల్లుబికిన నిరసనకు తలొగ్గి కెటీఆర్  చంద్రబాబు అరెస్ట్ ను ఖండించారు. ఆంధ్ర ప్రదేశ్ రాజకీయాలు తెలంగాణలో ఎందుకు అని వ్యాఖ్యలు చేసిన తర్వాతే కెటీఆర్ తన స్ట్రాటజీ మార్చారు. లోకేష్ ట్వీట్ లో చంద్రబాబు ఆరోగ్యం మీద ఆందోళన చూసి తాను చలించిపోయానని ప్రకటించిన మరుసటి రోజే హైదరాబాద్ లో చంద్రబాబు అరెస్ట్ మీద నిరసన కార్యక్రమాలు జరిగాయి. అయినప్పటికీ లెట్స్ మెట్రో ఫర్ సీబీఎన్  అడ్డుకోవడానికి కెసీఆర్ ప్రభుత్వం పూనుకుంది. అయినప్పటికీ చంద్రబాబు అభిమానులు  ఈ కార్యక్రమం వి జయవంతం చేశారు. మియాపూర్ టు ఎల్బీనగర్ వరకు ఐటీ ఉద్యోగులు పెద్ద ఎత్తున నల్ల టీ షర్ట్ లు ధరించడంతో నల్ల ప్రవాహం పారినట్లు అనిపించింది. 

స్కిల్ డెవ‌ల‌ప్‌మెంట్ కేసులో అరెస్ట‌యి రాజమండ్రి సెంట్ర‌ల్ జైల్లో ఉన్న టీడీపీ అధినేత చంద్ర‌బాబుకు మద్ద‌తుగా హైద‌రాబాద్‌లోని టీడీపీ శ్రేణులు, అభిమానులు వినూత్న నిర‌స‌న‌కు పిలుపునిచ్చారు. `లెట్స్ మెట్రో ఫ‌ర్ సీబీఎన్` పేరుతో శ‌నివారం నిర‌స‌న కార్య‌క్ర‌మాన్ని చేప‌ట్టారు. హైద‌రాబాద్ మెట్రో రైల్ ఇందుకు వేదిక అయ్యింది. న‌ల్ల‌ టీష‌ర్టుల‌తో మియాపూర్ టు ఎల్బీన‌గ‌ర్‌ శ‌నివారం ఉద‌యం 10.30 నుంచి 11.30 గంట‌ల మ‌ధ్య ఎల్బీన‌గ‌ర్ వ‌ర‌కు న‌ల్ల టీష‌ర్టులు ధ‌రించి మెట్రోలో  టీడీపీ నాయ‌కులు, అభిమానులు ప్రయాణించారు. మియాపూర్ నుంచి ఎల్బీన‌గ‌ర్ వ‌ర‌కు  మెట్రో ఎక్కి తమ  నిర‌స‌న‌ తెలియజేశారు. మెట్రో ప్ర‌యాణికుల‌కు ఇబ్బంది క‌ల‌గ‌కుండా   ఆందోళన కారులు శాంతియుతంగా నిర‌స‌న  తెలిపారు.
 అయితే హైదరాబాద్ లో ఆకస్మికంగా మెట్రో రైళ్లను పోలీసులు ఆపేశారు.  మెట్రోస్టేషన్లలో బ్లాక్ టీషర్ట్స్ ధరించిన వారిని వెనక్కి తిప్పి పంపించారు.చంద్రబాబు అరెస్టుకు నిర‌స‌న‌గా ఇవ్వాళ  ఐటీ ఉద్యోగులు  పెద్ద సంఖ్యలో  కార్య‌క్ర‌మాలు చేప‌ట్టారు. శ‌నివారం సెల‌వు దినం కావ‌డంతో ఈ నిర‌స‌న‌లో ఐటీ ఉద్యోగులే ఎక్కువ మంది పాల్గొన్నారు.  హైదరాబాద్‌లో మెట్రో ఏర్పాటుకు చంద్రబాబు దార్శ‌నిక‌త కూడా కార‌ణ‌మ‌ని, అందుకే ఈ నిర‌స‌న‌ను ఎంచుకున్న‌ట్లు పార్టీ కార్య‌క‌ర్త‌లు చెబుతున్నారు.