ఇక అసెంబ్లీలో అడుగు పెట్టేది లేదని ఏపీ బీజేపీ ఎమ్మెల్యే,మాజీ మంత్రి కామినేని శ్రీనివాస్‌ వ్యాఖ్యానించారు. ఇదే నా చివరి ప్రసంగం అంటూ భావోద్వేగానికి లోనయ్యారు. ఏపీ అసెంబ్లీ సమావేశాల సందర్బంగా ఆయన సభలో ప్రసంగించారు. వచ్చే ఎన్నికల్లో పోటీ చేయనని స్పష్టం చేశారు. 2014 ఎన్నికల్లో పొత్తు ఉండటం వల్లే పోటీ చేశానని చెప్పుకొచ్చారు. నాడు సిట్టింగ్‌ ఎమ్మెల్యేను కాదని కైకలూరు స్థానాన్ని బీజేపీకి ఇచ్చారని...అయితే ఒకసారి కామినేనికి అవకాశం ఇవ్వాలని 2014లో టీడీపీ నేతలకు వెంకయ్యనాయుడు చెప్పారని గుర్తు చేశారు. ప్రజాసేవ కోసం రాజకీయాల్లో ఉంటానని..పోటీ చేయనని కామినేని తేల్చిచెప్పారు. ఈ సందర్బంగా సహచర ఎమ్మెల్యేలకు ధన్యవాదాలు తెలిపారు. కామినేని పొత్తులో భాగంగా చంద్రబాబు కేబినెట్ లో చోటు సంపాదించారు. నాలుగేళ్లపాటు వైద్య, ఆరోగ్య మంత్రిగా పనిచేశారు. తర్వాత ఎన్డీఏ నుంచి టీడీపీ వైదొలగడంతో.. ఇక్కడ ఏపీలో కూడా బీజేపీ మంత్రులుగా ఉన్న కామినేని, మాణిక్యాలరావులు పదవులకు రాజీనామా చేశారు. ఆ తర్వాత కామినేని టీడీపీలో చేరతారనే ప్రచారం జరిగినా.. ఆయన మాత్రం ఎన్నికలకు దూరంగా ఉంటున్నట్లు ప్రకటించారు.