‘ఆడపిల్ల ఇంట్లో ఉంటే ఆశీర్వాదాన్ని పొందినట్టే’, ‘ఆడబిడ్డ పుడితే అదృష్టం’అనే మాటలు ఊరకనే రాలేదు. ఇంట్లో ఆడపిల్ల ఉంటే ఆ కళ, సందడి, సంతోషం వెలకట్టలేనివి. ఆడపిల్ల ఇంట్లో ఉంటే ఆ అనుభూతి ఎలా ఉంటుందో ఆడపిల్లలు ఉన్నవారికే అర్థమవుతుంది. ఇక ఆడపిల్లను సరైన విలువలు, విద్యతో పెంచే తల్లిదండ్రులు మెరుగైన సమాజానికి బాటలు వేస్తున్నట్టేనని నిస్సందేహంగా చెప్పొచ్చు. అయితే, నాణేనికి మరోవైపు అన్నట్టుగా.. ఈ సమాజం ఆడపిల్లలకు  ఒక సమస్యల సుడిగుండమే అని చెప్పాలి. ఇంట్లో నుంచి బయట అడుగు పెట్టిన దగ్గర నుంచి తిరిగి లోపలికి వెళ్లే  అనేక సవాళ్లు ఎదుర్కోవాల్సి వస్తోంది. ఈ పరిస్థితులను అధిగమించేందుకు బాలికలకు కొన్ని ప్రత్యేక హక్కులు ఏర్పాటు చేశారు. ఈ హక్కులను గుర్తించడం, సవాళ్లను అధిగమించడంపై అవగాహన కల్పించడమే ధ్యేయంగా ప్రపంచవ్యాప్తంగా ప్రతి ఏడాది అక్టోబర్ 11న ‘అంతర్జాతీయ బాలికల దినోత్సవాన్ని’ నిర్వహిస్తారు. ఈ మేరకు డిసెంబర్ 19, 2011న జరిగిన ఐక్యరాజ్య సమితి జనరల్ అసెంబ్లీ ప్రకటన చేసింది. ఈ అంతర్జాతీయ బాలికల దినోత్సవం సందర్భంగా బాలికల దినోత్సవం చరిత్ర, విశేషాలను గమనిద్దాం...

చరిత్ర ఏం చెబుతోంది...

బాలికలపై లైంగిక దాడులు, అఘాయిత్యాలను నియంత్రించి, వారి హక్కులపై అవగాహన కల్పించడం కోసం ఐక్యరాజ్యసమితి అంతర్జాతీయ బాలికల దినోత్సవాన్ని ప్రకటించింది. మహిళల ఆత్మగౌరవం రక్షణ కోసం పోరాడిన ఉద్యమకారుడు, అమెరికన్ పౌరహక్కుల కార్యకర్త ఎలానార్ రూజ్‌వెల్డ్ పుట్టిన రోజయిన అక్టోబర్ 11న ఈ దినోత్సవాన్ని నిర్వహించాలని ఐరాస నిర్ణయించింది. ఈ మేరకు 19 డిసెంబర్ 2011న జరిగిన ఐరాస సర్వసభ్య సమావేశంలో తీర్మానం జరిగింది. అక్టోబర్ 11, 2012న తొలి అంతర్జాతీయ బాలిక దినోత్సవాన్ని నిర్వహించాలని ఆమోదించారు. ఈ తీర్మానానికి అనుకూలంగా సభ్యదేశాలు పెద్ద సంఖ్యలో ఓటు వేశాయి. విద్య, పోషణ, చట్టపరమైన హక్కులు, వైద్య సంరక్షణ, రక్షణ, హింస, బలవంతపు బాల్య వివాహాలు వంటి విషయాల్లో బాలికలు ఎదుర్కొంటున్న ఇబ్బందులు, లింగ అసమానతలపై అవగాహన కల్పించడమే ముఖ్యొద్దేశ్యంగా ఇది సాగుతుంది. ఇక బాలికలు, యువతులు వారివారి రంగాల్లో సాధించిన అభివృద్ధిని ప్రతిబింబించేలా కార్యక్రమాలను చేపడతారు. ప్రపంచవ్యాప్తంగా అనేక దేశాలు వివిధ కార్యక్రమాల ద్వారా బాలిక అభ్యున్నతికి తోడ్పాటునందించే ప్రయత్నం చేస్తాయి. భారతదేశంలో కూడా పెద్ద ఎత్తున కార్యక్రమాలు జరుగుతుంటాయి. నారీశక్తి అని, మహిళా రిజర్వేషన్లు అని ఎన్ని అడుగులు ముందుకు వేసినా కొందరు మహిళలు ఇంకా వెనుకబడే ఉన్నారు.

2023 థీమ్ ఏంటంటే...

అంతర్జాతీయ బాలికల దినోత్సవాన్ని ప్రతి ఏడాది ఒక ప్రత్యేకమైన థీమ్‌తో వేడుకలు నిర్వహిస్తుంటారు. ‘‘బాలికల హక్కుల్లో పెట్టుబడి: మన నాయకత్వం, మన సంక్షేమం’’ 2023 థీమ్‌‌గా ఐక్యరాజ్యసమితి ప్రకటించింది. బాలికలకు రక్షణ, విద్య, ఆరోగ్యంగా జీవించే హక్కులపై అవగాహన కల్పించడమే ఈ థీమ్ ముఖ్య ఉద్దేశ్యం. బాలికల హక్కులు కేవలం చిన్నవయసులోనే కాదు.. మహిళగా రూపాంతరం చెందే వరకు సంరక్షణ కల్పించాల్సిన అవసరం ఉందని ఈ ఏడాది థీమ్ చాటి చెబుతోంది. బాలికల సాధికారతకు మరిన్ని అడుగులు వేయాలని చెబుతోంది. బాలికలకు మరిన్ని అవకాశాలు కల్పించడం, కేవలం జెండర్ ఆధారంగా బాలికలు చవిచూస్తున్న లింగ అసమానత్వంపై అవగాహనను పెంపొందించడం సమాజంలో ప్రతి ఒక్కరి బాధ్యత. ఆడపిల్లల సాధికారత పట్ల అవగాహన పొందడం, కల్పించడం, వీలైనంత మేర తోడ్పాటునందిస్తే అంతర్జాతీయ బాలికల దినోత్సవానికి గొప్ప గౌరవమిచ్చినట్టవుతుంది. మీ చుట్టుపక్కల బాలికల పరిస్థితి గమనించి సానుకూలంగా స్పందిస్తే మీ వంతు బాధ్యత నిర్వహించినట్టే!

                                      *నిశ్శబ్ద.