భారత క్రికెట్ జట్టు హెడ్ కోచ్ గౌతమ్ గంభీర్ భవిష్యత్తుపై గత కొన్ని రోజులుగా సోషల్ మీడియా మరియు క్రికెట్ వర్గాల్లో తీవ్రమైన చర్చ నడుస్తోంది. ఇటీవల పరిమిత ఓవర్ల క్రికెట్‌లో ఐర్లాండ్, ఇంగ్లాండ్ పర్యటనల్లో ఆశించిన స్థాయిలో రాణించలేకపోవడం, అలాగే సుదీర్ఘ ఫార్మాట్‌లో న్యూజిలాండ్, సౌతాఫ్రికా చేతుల్లో సొంతగడ్డపై ఎదురైన అనూహ్యమైన ఓటములు అభిమానులను తీవ్రంగా నిరాశపరిచాయి. వైట్ బాల్, రెడ్ బాల్ రెండింటిలోనూ జట్టు ప్రదర్శన గ్రాఫ్ పడిపోవడంతో గంభీర్‌ను హెడ్ కోచ్ పదవి నుంచి తొలగిస్తారనే ప్రచారం ఊపందుకుంది. వరల్డ్ టెస్ట్ ఛాంపియన్ షిప్ (WTC) 2025-27 సైకిల్‌లో 2027 ఫైనల్ రేసులో భారత్ నిలవాలంటే రాబోయే ప్రతీ మ్యాచ్ అత్యంత కీలకంగా మారింది. అయితే ఇలాంటి క్లిష్ట సమయంలో భారత క్రికెట్ నియంత్రణ మం‌డలి (బిసిసిఐ) గంభీర్ విషయంలో ఒక స్పష్టమైన నిర్ణయానికి వచ్చినట్లు నివేదికలు చెబుతున్నాయి. ప్రస్తుతం గంభీర్ కోచింగ్ పదవికి ఎలాంటి ప్రమాదం లేదని, ఆయన బాధ్యత సురక్షితంగానే ఉందని బిసిసిఐ విశ్వసనీయ వర్గాలు స్పష్టం చేస్తున్నాయి.

గౌతమ్ గంభీర్‌ను పదవి నుండి తప్పించకపోవడానికి బిసిసిఐ ప్రధానంగా రెండు ముఖ్యమైన కారణాలను విశ్లేషించింది. మొదటిది, భారత టెస్ట్ జట్టు ప్రస్తుతం అత్యంత కీలకమైన 'ట్రాన్సిషన్ ఫేజ్' లేదా మార్పు దశలో ఉంది. సుదీర్ఘ కాలం పాటు జట్టును ముందుండి నడిపించిన విరాట్ కోహ్లీ, రోహిత్ శర్మ, రవిచంద్రన్ అశ్విన్ వంటి సీనియర్ దిగ్గజ ఆటగాళ్లు ఇటీవల టెస్ట్ క్రికెట్‌కు గుడ్ బై చెప్పారు. వీరి నిష్క్రమణతో టెస్ట్ జట్టులో ఏర్పడిన లోటును పూడ్చడం రాత్రికి రాత్రే సాధ్యమయ్యే పని కాదు. కొత్త కెప్టెన్ శుభ్‌మన్ గిల్ నాయకత్వంలో రూపుదిద్దుకుంటున్న యువ భారత్ నిలదొక్కుకోవడానికి కొంత సమయం పడుతుందని బిసిసిఐ పెద్దలు గుర్తించారు. ఈ మార్పుల సమయంలో కోచ్‌ను మార్చడం జట్టు స్థిరత్వాన్ని దెబ్బతీస్తుందని బోర్డు భావిస్తోంది.

రెండో ప్రధాన కారణం, తుది జట్టును తీవ్రంగా వేధిస్తున్న ఆటగాళ్ల గాయాల సమస్య. ముఖ్యంగా సౌతాఫ్రికాతో జరిగిన కీలక టెస్ట్ సిరీస్ మధ్యలో కెప్టెన్ శుభ్‌మన్ గిల్ గాయపడటం సిరీస్ ఫలితాన్ని తలకిందులు చేసింది. గిల్ అందుబాటులో ఉండి ఉంటే ఆ ఫలితాలు వేరేలా ఉండేవి. రాబోయే శ్రీలంక 2 టెస్టుల పర్యటనకు కూడా గాయాల సమస్య వెంటాడుతోంది. స్టార్ పేసర్ జస్‌ప్రీత్ బుమ్రా, యువ టాప్ ఆర్డర్ బ్యాటర్ సాయి సుదర్శన్, ఆల్‌రౌండర్ వాషింగ్టన్ సుందర్ వంటి కీలక ఆటగాళ్లు గాయాల కారణంగా దూరమయ్యారు. ఈ అస్థిరమైన పరిణామాలు కోచ్ పనితీరును నేరుగా ప్రభావితం చేశాయని బిసిసిఐ అంచనా వేసింది.

gautam gambhir india head coach future wtc 2027,bcci decision on gautam gambhir head coach