చంద్రబాబు అరెస్ట్ సమయంలో రోడ్డెక్కింది మేమే.. డిప్యూటీ సీఎం.! 

రాబోయే స్థానిక సంస్థల ఎన్నికల్లో కూటమి అభ్యర్థుల విజయానికి ప్రతి ఒక్కరూ సమష్టిగా కృషి చేయాలని ఉప ముఖ్యమంత్రి పవన్ కళ్యాణ్ పిలుపునిచ్చారు. ఓట్లు ఎన్ని వచ్చాయన్నది తాను పట్టించుకోలేదని, కేవలం అభివృద్ధే ప్రామాణికమని పవన్ కల్యాణ్ తేల్చిచెప్పారు. ఏజెన్సీలో రోడ్ల నిర్మాణం అభివృద్ధికి తొలిమెట్టు అని తెలిపారు. టీడీపీ, బీజేపీలతో కూడిన కూటమిలో ఇప్పటివరకు జనసేన పార్టీయే అత్యధికంగా త్యాగాలు చేసిందని పవన్ కల్యాణ్ సంచలన వ్యాఖ్యలు చేయడం రాజకీయ వర్గాల్లో చర్చనీయాంశమైంది. సీఎం చంద్రబాబు జైలుపాలైన క్లిష్ట సమయంలో జనసైనికులే ముందుండి పోరాడారని గుర్తుచేశారు. రాబోయే స్థానిక ఎన్నికల్లో పార్టీ నాయకులు మరింత పట్టు సాధించాలని ఆయన దిశానిర్దేశం చేశారు.

కూటమిలోని అన్ని పార్టీల నాయకులు సమన్వయంతో పనిచేస్తూ గ్రామాల అభివృద్ధిలో భాగస్వాములు కావాలని సూచించారు. పార్టీ, కూటమి కోసం కష్టపడిన నాయకులు, కార్యకర్తలు, వీరమహిళల త్యాగాలను గుర్తించి, పొత్తు ధర్మానికి అనుగుణంగా స్థానిక సంస్థల్లో సముచిత ప్రాతినిధ్యం కల్పించాలని స్పష్టం చేశారు. ఆదివారం పోలవరం జిల్లా రంపచోడవరం నియోజకవర్గంలోని కాకవాడలో అడవితల్లి బాట 2.0 కార్యక్రమాన్ని ప్రారంభించిన అనంతరం ఆయన మాట్లాడారు. 2024 ఎన్నికల్లో రాష్ట్ర భవిష్యత్తు కోసం కూటమి నాయకులు సమష్టిగా పోరాడారని, రాబోయే స్థానిక సంస్థల ఎన్నికలు కష్టపడిన నాయకులకు భరోసా కల్పించేలా ఉండాలని ఆకాంక్షించారు.

గిరిజనుల హక్కులు, సంస్కృతి, సంప్రదాయాలను పరిరక్షిస్తూ అభివృద్ధి ఫలాలను ప్రతి ఆవాసానికి అందించడమే ప్రభుత్వ లక్ష్యమన్నారు. 2019–2024 మధ్య గ్రామీణ రహదారులు, మౌలిక సదుపాయాల అభివృద్ధి నిర్లక్ష్యానికి గురయ్యాయని పవన్ కళ్యాణ్ విమర్శించారు. ప్రజల అవసరాలకు ఖర్చు చేయాల్సిన నిధులను గత వైసీపీ ప్రభుత్వం ప్రభుత్వ భవనాలకు పార్టీ రంగులు వేయడం, వాటిని తొలగించి మళ్లీ రంగులు వేయడం వంటి పనుల కోసం ఖర్చు చేసిందని ఆరోపించారు. ఆ నిధులను అభివృద్ధికి వినియోగించి ఉంటే అనేక గ్రామాలకు మెరుగైన రహదారులు అందేవని అన్నారు. ప్రతిపక్ష మద్దతు ఉన్న పంచాయతీలకు కూడా అవసరమైన నిధులు అందేలా చర్యలు తీసుకున్నామని తెలిపారు. ఏ పార్టీకి లాభం కలగాలన్నది కాకుండా వ్యవస్థ బలోపేతం, గ్రామాల అభివృద్ధి, ప్రజల జీవన ప్రమాణాల మెరుగుదలే తమ లక్ష్యమని స్పష్టం చేశారు. 

[ Deputy CM Pawan Kalyan, Mata-Manti program, Polavaram District Rampachodavaram, Election of local bodies, Tribal Communities, Andhra Pradesh Politics, Tamarind Tree Meeting, Indigenous Welfare, TeluguOne News, Rampachodavaram, Tribal Welfare Andhra Pradesh, Rakota Village ]