నేటి ఆధునిక కాలంలో ఐదెంకల జీతం వస్తే జీవితం ఎంతో విలాసవంతంగా ఉంటుందని చాలా మంది భావిస్తారు. ముఖ్యంగా నెలకు దాదాపు రెండు లక్షల రూపాయల ఆదాయం ఉంటే, ఇక తిరుగుండదు అనుకుంటారు. కానీ, వాస్తవ పరిస్థితులు దానికి పూర్తి భిన్నంగా ఉన్నాయి. సంపాదన ఎంత ఎక్కువగా ఉన్నప్పటికీ, సరైన ఆర్థిక ప్రణాళిక లేకపోతే నెలాఖరుకు జేబు ఖాళీ అవ్వడం ఖాయమని ఒక యువ జంట ఉదంతం నిరూపిస్తోంది. నెలకు ఏకంగా రూ. 1.7 లక్షల నికర ఆదాయం సంపాదిస్తున్న ఒక సాఫ్ట్‌వేర్ దంపతులు, ప్రస్తుతం అప్పుల ఊబిలో కూరుకుపోయి, చేతిలో చిల్లిగవ్వ మిగలక పడుతున్న తిప్పలు సామాజిక మాధ్యమాల్లో తీవ్ర చర్చనీయాంశంగా మారాయి.

ఆ దంపతుల నెలవారీ బడ్జెట్ లెక్కలను నిశితంగా పరిశీలిస్తే, విచ్చలవిడి లోన్లు వారి ఆర్థిక పరిస్థితిని ఎంతలా దెబ్బతీశాయో స్పష్టంగా అర్థమవుతుంది. ఈ జంట తమ అవసరాల కోసం వ్యక్తిగత రుణం (Personal Loan), విద్యా రుణం (Education Loan), బైక్ లోన్, చివరికి మొబైల్ ఫోన్ కోసం కూడా రుణం తీసుకున్నారు. ఈ అన్ని అప్పులకు కలిపి వారు ప్రతి నెలా చెల్లిస్తున్న సమాన నెలవారీ వాయిదాల (EMI) మొత్తం అక్షరాలా రూ. 85,980 కి చేరుకుంది. అంటే, వారు కష్టపడి సంపాదిస్తున్న మొత్తం శాలరీలో సగానికి పైగా డబ్బులు  కేవలం అప్పులకే సరిపోతోంది.

రుణాల భారం ఇలా ఉంటే, రోజువారీ జీవన ప్రమాణాల కోసం చేసే ఖర్చులు కూడా భారీగానే ఉన్నాయి. ఇల్లు గడవడానికి అవసరమయ్యే ఫిక్స్‌డ్ ఖర్చులైన ఇంటి అద్దె, అపార్ట్‌మెంట్ నిర్వహణ రుసుము, నిత్యావసర సరుకులు, ఆఫీస్ ప్రయాణ ఖర్చులు, అత్యవసర వైద్య ఖర్చులు, ఇతర కరెంట్, ఇంటర్నెట్ వినియోగ బిల్లుల కోసం వీరు ప్రతి నెలా రూ. 53,500 వెచ్చిస్తున్నారు. ఇవి కాకుండా, వారి వ్యక్తిగత సరదాలు, వారాంతపు వినోదాలు, హోటల్ తిండ్లు, కుటుంబపరమైన ఇతర సామాజిక అవసరాల కోసం మరో రూ. 28,000 కేటాయించారు. ఇలా అన్ని రకాల ఖర్చులు, భారీ ఈఎంఐలు పోను, నెలాఖరుకు ఆ దంపతుల చేతిలో మిగులుతున్న నికర బ్యాలెన్స్ కేవలం రూ. 2,520 మాత్రమే.

రెండు లక్షల ఆదాయం ఉండి కూడా నెలాఖరుకు వచ్చేసరికి రూ. 3,000 కూడా మిగలకపోవడంతో విసిగిపోయిన ఆ జంట, తమ బడ్జెట్ సమస్య నుంచి ఎలా గట్టెక్కాలో తెలియక సామాజిక మాధ్యమ వేదికగా నెటిజన్లను సలహాలు కోరింది. దయచేసి మా సంసారాన్ని చక్కదిద్దేలా ఒక మంచి ఫైనాన్షియల్ ప్లాన్ చెప్పండి అంటూ వారు పెట్టిన పోస్ట్ ప్రస్తుతం నెట్టింట విపరీతంగా వైరల్ అవుతోంది. నేటి తరం ఐటీ ఉద్యోగులు, యువ దంపతులు ఎదుర్కొంటున్న మానసిక, ఆర్థిక ఒత్తిళ్లకు ఈ ఉదంతం ఒక చక్కని అద్దం పడుతోందని నిపుణులు అభిప్రాయపడుతున్నారు.

ఈ వైరల్ పోస్టుపై నెటిజన్లు రకరకాలుగా స్పందిస్తూ ఆ జంటకు విలువైన ఆర్థిక పాఠాలు చెప్తున్నారు. ఒక నెటిజన్ స్పందిస్తూ, "మీకు వచ్చిన సమస్య ఖర్చుల వల్ల కాదు బాబూ, మీరు విచక్షణారహితంగా తీసుకున్న లోన్ల వల్ల వచ్చింది. ముందుగా మీ బైక్ రుణం పూర్తయ్యే వరకు మరో 4 నెలలు ఓపిక పట్టండి. ఆ తర్వాత మిగిలే డబ్బుతో వెంటనే ఆ రూ. 12 వేల పర్సనల్ లోన్ మొత్తాన్ని క్లియర్ చేసేయండి" అని ఉచిత సలహా ఇచ్చారు. మరికొందరైతే, చేతిలో డబ్బుల్లేకపోయినా క్రెడిట్ కార్డులు, లోన్లు నమ్ముకుని రూ. 20,000 పెట్టి ఫోన్ కొనడం అవసరమా? 3 నెలలు పర్సనల్ ఖర్చులు తగ్గించుకుంటే ఫోన్ డబ్బులు మిగిలేవి కదా అని క్లాస్ పీకారు.

ఆర్థిక సూత్రాల ప్రకారం, ఏ కుటుంబంలోనైనా నెలవారీ ఈఎంఐల మొత్తం వారి మొత్తం ఆదాయంలో 30 శాతం నుండి 35 శాతం కంటే ఎక్కువ అస్సలు దాటకూడదు. కానీ ఇక్కడ ఏకంగా 50 శాతం దాటడమే మునకకు కారణమైంది. క్రెడిట్ సంస్కృతికి అలవాటు పడి, అనవసరపు విలాసాల కోసం అప్పులు చేయడం ఆపి, ప్రతి ఒక్కరూ కనీసం ఆరు నెలల అవసరాలకు సరిపడా అత్యవసర నిధిని (Emergency Fund) దాచుకోవడం ఎంతో ఉత్తమమని ఫైనాన్షియల్ ప్లానర్లు హెచ్చరిస్తున్నారు.