విజయదశమి పర్వదినాన్ని పురస్కరించుకుని ఆంధ్రప్రదేశ్ ముఖ్యమంత్రి నారా చంద్రబాబు నాయుడు, తెలంగాణ ముఖ్యమంత్రి రేవంత్ రెడ్డి రాష్ట్ర ప్రజలకు దసరా శుభాకాంక్షలు తెలిపారు. చెడుపై మంచి, అధర్మంపై ధర్మం సాధించిన విజయానికి విజయదశమి ప్రతీకగా నిలుస్తుందని పేర్కొన్నారు. ఈ పండుగ ప్రజల జీవితాల్లో సుఖసంతోషాలు, శాంతి సౌభాగ్యాలు నింపాలని ఆకాంక్షించారు.

రైతులకు మేలు.. యువతకు ఉజ్వల భవిష్యత్తు: చంద్రబాబు.!

విజయదశమి సందర్భంగా ముఖ్యమంత్రి చంద్రబాబు ఒక ప్రకటన విడుదల చేశారు. రైతన్నల శ్రమకు తగిన ఫలితం అందించడం, మహిళలకు సాధికారత కల్పించడం, యువతకు ఉజ్వల భవిష్యత్తును అందించడం లక్ష్యంగా తమ ప్రభుత్వం చేస్తున్న కృషికి జగన్మాత ఆశీస్సులు లభించాలని ప్రార్థిస్తున్నట్లు తెలిపారు.

కనకదుర్గమ్మ ఆశీస్సులతో ఆంధ్రప్రదేశ్ అన్ని రంగాల్లో విజయాలు సాధిస్తూ అభివృద్ధి పథంలో ముందుకు సాగాలని ఆకాంక్షించారు. రాష్ట్రంలోని ప్రతి కుటుంబం సుఖసంతోషాలతో, ఆయురారోగ్యాలతో, శాంతి సౌభాగ్యాలతో వర్ధిల్లాలని మనస్ఫూర్తిగా కోరుకుంటున్నట్లు తన సందేశంలో పేర్కొన్నారు.

ధర్మమార్గంలో పయనిస్తే విజయమే: రేవంత్ రెడ్డి.!

తెలంగాణ ముఖ్యమంత్రి రేవంత్ రెడ్డి కూడా రాష్ట్ర ప్రజలకు విజయదశమి శుభాకాంక్షలు తెలిపారు. తెలంగాణ సంస్కృతి, సంప్రదాయాల్లో దసరా పండుగకు విశిష్టమైన స్థానం ఉందని పేర్కొన్నారు. సత్యం, ధర్మం, ధైర్యం, ఆత్మవిశ్వాసం, ప్రజల ఐకమత్యానికి విజయదశమి ప్రతీకగా నిలుస్తుందని వివరించారు.ఎన్ని కష్టనష్టాలు ఎదురైనా ఆత్మవిశ్వాసంతో, ధర్మమార్గంలో ముందుకు సాగితే అంతిమ విజయం సాధించవచ్చనే గొప్ప సందేశాన్ని ఈ పర్వదినం అందిస్తుందని సీఎం రేవంత్ రెడ్డి పేర్కొన్నారు.

ప్రతి ఇంటా సంతోషాలు వెల్లివిరియాలి.!

విజయదశమి పండుగ తెలంగాణ ప్రజల జీవితాల్లో కొత్త వెలుగులు నింపాలని రేవంత్ రెడ్డి ఆకాంక్షించారు. ప్రతి ఇంటా సంతోషాలు, ఐశ్వర్యం వెల్లివిరియాలని, లక్ష్మీదేవి, దుర్గాదేవి కరుణాకటాక్షాలు ప్రజలందరిపై ఉండాలని ప్రార్థించారు. తెలంగాణ రాష్ట్రం అన్ని రంగాల్లో సుభిక్షంగా, మరింత అభివృద్ధి పథంలో ముందుకు సాగాలని ఆకాంక్షించారు.ప్రజలంతా సంతోషంగా, సురక్షితంగా పండుగను జరుపుకోవాలని పిలుపునిచ్చారు. బతుకమ్మ సంబురాలు, జమ్మి ఆకు పూజలతో తెలంగాణలో పండుగ వాతావరణం నెలకొంది. పల్లెలు, పట్టణాలు అనే తేడా లేకుండా ప్రజలు సంప్రదాయబద్ధంగా, ఉత్సాహంగా విజయదశమి వేడుకల్లో పాల్గొంటున్నారు.

[ CM Chandrababu Naidu, CM Revanth Reddy, Vijayadashami Wishes, Dussehra Greetings, AP CM Chandrababu, Telangana CM Revanth Reddy, Dussehra 2026, Vijayadashami 2026, Telugu States News, Chandrababu Dussehra Message, Revanth Reddy Dussehra Message, TeluguOne News ]