అర్ధరాత్రి వేళలో విజయవాడలోని సింగ్ నగర్‌కి బోటులో వెళ్ళి ముంపులో వున్న ప్రజలను పరామర్శించిన చంద్రబాబు, అర్ధరాత్రి వేళలోనే విజయవాడ నగరంలోని కృష్ణలంక ముంపు ప్రాంతాల్లో పర్యటనకు బయల్దేరి వెళ్ళారు. కృష్ణలంకలో రక్షణ గోడకు సమాంతరంగా వరద నీరు ప్రవహిస్తోంది. ఆందోళన చెందాల్సిన అవసరం లేదని, అందరికీ సురక్షిత ప్రాంతాలకు తరలిస్తామని చంద్రబాబు అక్కడి ప్రజలకు ధైర్యం చెప్పారు. అంతకుముందు విజయవాడ కలెక్టరేట్‌లో చంద్రబాబు అధికారులతో సమావేశమయ్యారు. వరద సహాయక చర్యలను ఈ సందర్భంగా చంద్రబాబు సమీక్షించారు. ప్రకాశం బ్యారేజ్ దగ్గర పదిన్నర లక్షల క్యూసెక్కుల వరద నీటి ప్రవాహం వుందని అధికారులు ముఖ్యమంత్రి చంద్రబాబుకు తెలిపారు. లోతట్టు ప్రాంతాల్లో వున్న ప్రజలను అప్రమత్తం చేయాలని చంద్రబాబు ఈ సందర్భంగా అధికారులకు సూచించారు. బుడమేరు బాధితులు కట్టుబట్టలతో వస్తున్నారని, వారికి దుస్తులతోపాటు దుప్పట్లు కూడా ఇవ్వాలని చంద్రబాబు అధికారులను ఆదేశించారు.