తెలుగులో ఒకట్రెండు సినిమాలు చేసిన మలయాళీ హీరోయిన్ భావన చాలా మందికి తెలియకపోవచ్చు. కాని, రీసెంట్ గా జరిగిన కిడ్నాప్ వ్యవహారంతో ఆమె ఇప్పుడు అందరికీ తెలిసిపోయింది. కేరళ, తమిళనాడు, కర్ణాటకలో అయితే ఆమె మంచి ఫాలోయింగ్ వున్న స్టార్. కాబట్టి అక్కడ భావన గురించి అందరూ ఆసక్తిగా చర్చించుకుంటున్నారు. అయితే, ఆమెను కరుడుగట్టన నేరస్థులు కిడ్నాప్ చేసే ప్రయత్నం చేయటం, కార్ లో లైంగిక దాడి చేయటం, ఫోటోలు, వీడియోలు తీసుకోవటం అత్యంత దుర్మార్గమైన చర్య. వారికి కఠిన శిక్షలు పడాల్సిందే. కాని, భావన పై దాడి వెనుక చాలా స్క్రీన్ ప్లే వుంది. మొత్తం కేరళ సినిమా ఇండస్ట్రీ ఎంతగా నేరమయం అయిపోయిందో విప్పి చెప్పే నేపథ్యం వుంది...

మనకు తమిళ ఇండస్ట్రీ గురించి తెలిసినంత కూడా మల్లూవుడ్ గురించి తెలియదు. కాని, మంచి కథాంశాలతో జాతీయ అవార్డులు పొందే చిత్రాలు వాళ్లు చేస్తుంటారు. కాని, పైకి కనిపించే కళాత్మక విలువలు ఇండస్ట్రీ లోపల వుండవని చాలా మంది చెబుతుంటారు. అసలు మలయాళీ సినిమా రంగంలోని ఒక వర్గమే తమ చుట్టూ అల్లుకుపోయిన నేరమయ పరిస్థితుల గురించి ఆందోళనగా, ఆవేదనగా చెబుతుంటుంది. ఇండస్ట్రీ ఇన్ సైడర్స్ చెప్పే దాని ప్రకారం భావన కిడ్నాప్ ఆమె మాజీ డ్రైవర్ చేసిన ఒక ఆకతాయి పని మాత్రమే కాదు. అందులో ఒక టాప్ హీరో ఇన్వాల్స్ అయి వుండొచ్చని అంటున్నారు! అతనే దిలీప్!

దిలీప్ కేరళ సినిమా రంగంలో మంచి పేరున్న అగ్ర నటుడు. అయితే, ఆయనకు... భావనకు మధ్య గొడవలున్నాయి. అందుక్కారణం భావన అతడి వివాహేతర సంబంధాన్ని భార్య ముందు బట్టబయలు చేయటమేనట! దిలీప్ మాజీ భార్య మలయాళీ హీరోయిన్ మంజు వారియర్. అయితే దిలీప్ మంజుతో విడాకులు తీసుకోక ముందే మరో హీరోయిన్ కావ్య మాధవన్ తో రిలేషన్ షిప్ పెట్టుకున్నాడు. ఈ విషయం గ్రహించిన భావన స్నేహితురాలు మంజు వారియర్ కి చెప్పిందట. దాంతో దిలీప్, మంజు విడిపోవాల్సి వచ్చింది. అప్పట్నుంచీ కక్ష పెంచుకున్న దిలీప్ తన పరపతి ఉపయోగించి భావనకు మలయాళ సినిమా ఆఫర్లు రాకుండా చేస్తున్నాడంటారు. ఆమె చేసేది లేక కన్నడ, తమిళ సినిమాలపై దృష్టి పెట్టింది.

దిలీప్ తన శక్తితో భావన మల్లూవుడ్ లో లేకుండా చేసినా కూడా ఈ మధ్యే ఆమె ఓ సినిమా సైన్ చేసింది. దాంతో రీఎంట్రీ ఇచ్చే ప్రయత్నంలో వుంది. ఇది నచ్చకే దిలీప్ తనకు దగ్గరి సంబంధాలు వున్న సునీల్ అనే క్రిమినల్ తో కలిసి భావన పరువు తీసే ప్రయత్నం చేశాడని అంటున్నారు కేరళ సినిమా వాళ్లు. సునీల్ గతంలో భావన వద్ద డ్రైవర్ గా పని చేశాడు. అయితే, అతను పైకి కనిపించినట్టుగా డ్రైవర్ మాత్రమే కాదట. దిలీప్ లాంటి సినిమా రంగపు పెద్ద పెద్ద వారితో దగ్గరి సంబంధాలున్న క్రిమినల్. గతంలో ఎన్నో కేసులు అతడిపై వున్నాయి కూడా. అయిదేళ్ల కింద ఇలాగే ఓ హీరోయిన్ తనని సునీల్ కిడ్నాప్ చేశాడని ఆరోపించింది కూడా. కాని, పోలీసులు కూడా పెద్దగా పట్టించుకోలేదు. అంత పలుకుబడి వున్న నేరగాడు సునీల్.

సునీల్ సంగతి అర్థమైన భావన అతడ్ని తొలగించింది. కాని, పోలీసుల కథనం ప్రకారం ఆమె తాజాగా నియమించుకున్న డ్రైవర్ మార్టిన్ కూడా సునీల్ మనిషేనట! సినిమా స్టైల్లో సాగిన ఈ వ్యవహారం సునీల్ గ్యాంగ్ మొత్తం కలిసి భావనపై దాడికి తెగబడేలా చేసింది. ఆమెను కార్ లో రెండు గంటలు హింసించిన ఉన్మాదులు అదృష్టం కొద్దీ వదిలేసి పారిపోయారు.

నిజంగా దిలీప్ అనే హీరోనే భావన కేసులో విలనా? ఇది ఖచ్చితంగా ఎవ్వరూ చెప్పలేరు. భావన కూడా పోలీసుల్ని ఆ కోణంలో కూడా దర్యాప్తు చేయమని కోరిందట. కాకపోతే, త్వరలో తాను కన్నడ ప్రొడ్యూసర్ ఒకాయన్ని పెళ్లాడబోతున్నాని భావన చెప్పిన వెంటనే ఈ దాడి జరగటం అనే సందేహాలకు తావిస్తోంది. కేవలం ఒక డ్రైవర్ స్థాయి వ్యక్తి ఎంతో పేరున్న టాప్ హీరోయిన్ పై స్వంత ధైర్యంతో దాడి చేస్తాడా? ఖచ్చితంగా వెనుక ఇండస్ట్రీ పెద్దలు వుండే వుంటారు. కాని, అది తేల్చాల్సింది కేరళ పోలీసులు. ఈ మధ్య అధికారంలోకి వచ్చిన కమ్యూనిస్టు ప్రభుత్వం పాలనలో దాడులు మరీ ఎక్కువైపోయాయని కూడా అంటున్నారు కేరళలో. మహిళల పట్ల అయితే దారుణంగా దాడులు జరుగుతున్నాయట. మరి ఇటువంటి పరిస్థితుల్లో ఓ పెద్ద హీరో విషయంలో నిజం నిగ్గుతేలుతుందని ఆశించటం... కాస్త విపరీత 'భావనే'!