సింగరేణి కార్మికులు, వారి కుటుంబాల సంక్షేమానికి తెలంగాణ ప్రభుత్వం కీలక నిర్ణయాలు తీసుకుంది. పెండింగ్‌లో ఉన్న డిపెండెంట్ ఉద్యోగాల ఆర్డర్లను 15 రోజుల్లో పూర్తి చేసి అందజేస్తామని ఉప ముఖ్యమంత్రి భట్టి విక్రమార్క ప్రకటించారు. సింగరేణి కార్మికుల మారుపేర్ల సమస్యలను మానవీయ కోణంలో పరిష్కరిస్తామని తెలిపారు. మెడికల్ ఇన్వాలిడేషన్ పరీక్షల కోసం ప్రతి ఏరియా ఆసుపత్రిలో నెలవారీ బోర్డు సమావేశాలు నిర్వహించాలని ఆదేశించారు.

కరోనా సహా ఇతర స్థానిక కారణాలతో ఉద్యోగాలు కోల్పోయిన కార్మికులకు వన్‌టైమ్ ఆప్షన్ కింద తిరిగి ఉద్యోగాలు కల్పించే అంశంపై చర్యలు తీసుకోనున్నట్లు వెల్లడించారు. సింగరేణి భూముల్లో అర్హులైన పేదలకు ఇళ్ల పట్టాల పంపిణీ ప్రక్రియను వేగవంతం చేయాలని అధికారులను ఆదేశించారు. జిల్లా కలెక్టర్లు, సింగరేణి అధికారులతో కూడిన కమిటీ నెల రోజుల్లో అర్హుల జాబితాను సిద్ధం చేయాలని సూచించారు. దసరా సందర్భంగా సింగరేణి కార్మికులు, ఉద్యోగులకు 34% లాభాల బోనస్‌ కింద ఒక్కొక్కరికి ₹1,53,912, కాంట్రాక్ట్ కార్మికులకు ఒక్కొక్కరికి ₹5,500 బోనస్ అందించాలని నిర్ణయించామని డిప్యూటీ సీఎం భట్టి తెలిపారు.

కార్మికులకు మెరుగైన నివాస సదుపాయాలు.!

సింగరేణి ప్రాంతాల్లో శిథిలావస్థకు చేరిన డి-టైప్ క్వార్టర్ల స్థానంలో అన్ని వసతులతో కొత్త నివాస సముదాయాలను నిర్మించాలని ప్రభుత్వం నిర్ణయించింది. కార్మికుల జీవన ప్రమాణాలను పెంచేలా నెహ్రూ పేరుతో హౌసింగ్ కాలనీల ఏర్పాటుకు చర్యలు తీసుకోవాలని ఆదేశించారు. సింగరేణి పరిధిలోని అన్ని కాలనీలను ఆధునీకరించి, మెరుగైన డ్రైనేజీ వ్యవస్థ, విద్యుదీకరణ, పారిశుద్ధ్యం, తాగునీటి సదుపాయాలు కల్పించాలని సూచించారు. కాలనీల్లో మురుగునీటి శుద్ధి కేంద్రాల నిర్వహణపైనా ప్రత్యేక దృష్టి సారించాలని తెలిపారు.

కార్పొరేట్ స్థాయిలో ఆసుపత్రులు.. ఉచిత క్యాన్సర్ పరీక్షలు.!

సింగరేణి ఏరియా ఆసుపత్రులను కార్పొరేట్ స్థాయిలో అభివృద్ధి చేయాలని భట్టి విక్రమార్క ఆదేశించారు. నిపుణులైన వైద్యులను నియమించడంతో పాటు కార్డియాక్, క్యాథ్ ల్యాబ్ సేవలను అందుబాటులోకి తీసుకొచ్చేందుకు చర్యలు చేపట్టాలని సూచించారు. సింగరేణి ప్రాంతంలోని గ్రామాల్లో ఉచిత క్యాన్సర్ స్క్రీనింగ్ పరీక్షలు నిర్వహించాలని నిర్ణయించారు. అలాగే ఎమ్మెల్యేల క్యాంపు కార్యాలయాలు, ప్రభుత్వ పాఠశాలల్లో ఆర్వో వాటర్ ప్లాంట్ల ఏర్పాటుకు చర్యలు తీసుకోవాలని తెలిపారు.

సింగరేణిలో సోలార్ విద్యుత్‌కు ప్రాధాన్యం.!

సింగరేణి పరిధిలోని పాఠశాలలు, కళాశాలలు, హాస్టళ్లు, ఆసుపత్రులు, ప్రభుత్వ భవనాలపై సోలార్ ప్యానెళ్లను ఏర్పాటు చేయాలని ప్రభుత్వం నిర్ణయించింది. వాణిజ్య అవసరాలకు వినియోగంలో ఉన్న ప్రాంతాలకు ఆటంకం కలగకుండా, ఖాళీ భూములు, ఓవర్‌బర్డెన్ (ఓబీ) గుట్టలపై సోలార్ ప్లాంట్ల ఏర్పాటుకు ప్రణాళికలు రూపొందించాలని అధికారులకు సూచించారు.

రామగుండంలో థర్మల్ విద్యుత్ కేంద్రానికి గ్రీన్ సిగ్నల్.!

ఎన్నికల్లో ఇచ్చిన హామీ అమలులో భాగంగా రామగుండంలో సింగరేణి ఆధ్వర్యంలో థర్మల్ విద్యుత్ కేంద్రం ఏర్పాటుకు ప్రభుత్వం గ్రీన్ సిగ్నల్ ఇచ్చింది. సింగరేణి కార్మికుల ఆదాయపన్నును సంస్థ నుంచే ప్రభుత్వానికి చెల్లించేలా ఆదేశాలు జారీ చేసినట్లు భట్టి విక్రమార్క వెల్లడించారు. సింగరేణి అధికారులకు సంబంధించిన పీఆర్‌పీ చెల్లింపులు చేపట్టాలని యాజమాన్యాన్ని ఆదేశించారు.

విద్య, వ్యవసాయం, కార్మికుల భద్రతకు చర్యలు.!

భూపాలపల్లిలో వ్యవసాయ పరిశోధనా కేంద్రం ఏర్పాటుకు అవసరమైన భూమి కేటాయింపుపై చర్యలు తీసుకోవాలని సూచించారు. సత్తుపల్లి, భూపాలపల్లి ప్రభుత్వ జూనియర్ కళాశాలల్లో మౌలిక వసతుల కల్పనకు నిధులు కేటాయించనున్నట్లు తెలిపారు. కార్మికులకు ప్రతి ఆరు నెలలకు ఒకసారి భద్రతా కిట్లను సక్రమంగా పంపిణీ చేయాలని ఆదేశించారు.సింగరేణి కార్మికుల సంక్షేమం, వైద్య సేవల మెరుగుదల, గృహ వసతులు, విద్యుత్ ఉత్పత్తి, పర్యావరణ పరిరక్షణకు ప్రాధాన్యం ఇస్తూ ప్రభుత్వం ఈ నిర్ణయాలు తీసుకున్నట్లు ఉప ముఖ్యమంత్రి భట్టి విక్రమార్క తెలిపారు.

[ Bhatti Vikramarka, Singareni Workers, Singareni Collieries, Telangana Government, Dependent Jobs, Pending Job Orders, Singareni Employees Welfare, Singareni Housing, Nehru Housing Colonies, Singareni Hospitals, Free Cancer Screening, Singareni Solar Power Plants, Ramagundam Thermal Power Plant, Singareni Workers Benefits ]