ఆదివారం అర్ధరాత్రి దాటిన తర్వాత బ్యాంకాక్‌లోని ఒక లైవ్ మ్యూజిక్ పబ్‌లో జరిగిన ఘోర అగ్నిప్రమాదం యావత్ ప్రపంచాన్ని దిగ్భ్రాంతికి గురిచేసింది. సోయ్ లాట్ ప్రావో 1 రోడ్డు సమీపంలోని ప్రసిద్ధ ‘నా లాడ్‌ప్రావో’ పబ్‌లో వందలాది మంది యువతీ యువకులు సంగీత ప్రపంచంలో తేలిపోతున్న సమయంలో ఈ విషాదం చోటుచేసుకుంది. వేదికపై మ్యూజిక్ బ్యాండ్ ప్రదర్శన ఇస్తున్న సమయంలో అకస్మాత్తుగా స్టేజ్ సమీపంలోని సర్క్యూట్ బ్రేకర్ నుండి దట్టమైన పొగ రావడాన్ని అక్కడి కళాకారులు గమనించారు. ఆ మరుక్షణమే విద్యుత్ సరఫరా నిలిచిపోయి పబ్ మొత్తం అంధకారంలో మునిగిపోయింది. ఆ వెంటనే పెద్ద పేలుడు శబ్దం రావడంతో క్షణాల వ్యవధిలోనే మంటలు పైకప్పుకు అంటుకుని పబ్ అంతటా వ్యాపించాయి. అక్కడ ఉన్న సుమారు 300 మందికి పైగా జనం ప్రాణాలు కాపాడుకోవడానికి చీకట్లోనే ఒకరినొకరు నెట్టుకుంటూ పరుగు తీశారు.

ఈ ఘోర ప్రమాదంలో కనీసం 27 మంది అక్కడికక్కడే సజీవ దహనమవగా, మరో 63 మంది తీవ్రంగా గాయపడ్డారు. మరణించిన వారిలో 9 మంది పురుషులు, 18 మంది మహిళలు ఉన్నారు. గాయపడిన వారిలో 22 మంది పరిస్థితి అత్యంత విషమంగా ఉన్నట్లు థాయిలాండ్ అధికారులు ప్రకటించారు. ఈ విషాదంలో మంటల కంటే దట్టమైన కార్బన్ మోనాక్సైడ్ పొగ వల్లే ఎక్కువ మంది ప్రాణాలు కోల్పోయారు. మంటలు వ్యాపించిన వెంటనే పబ్ లోపల దట్టమైన పొగ అలుముకోవడంతో ఊపిరాడక చాలా మంది స్పృహ కోల్పోయారు. ప్రాణాలు కాపాడుకోవాలనే కంగారులో ఎటు వెళ్లాలో తెలియక, వెనుక వైపు ఉన్న టాయిలెట్ల వైపు పరుగులు తీసిన వారంతా అక్కడే ఊపిరాడక ప్రాణాలు విడిచారు. ఆ టాయిలెట్ల నుండి బయటకు వెళ్లేందుకు ఎలాంటి దారి లేకపోవడంతో అది వారికి మృత్యుకుహరంగా మారింది.

ప్రమాద సమాచారం అందిన 5 నిమిషాల్లోనే ఫైర్ సిబ్బంది సంఘటనా స్థలానికి చేరుకున్నప్పటికీ, అప్పటికే పబ్ మొత్తం మంటల్లో చిక్కుకుంది. లోపల చెల్లాచెదురుగా పడి ఉన్న కుర్చీలు, టేబుళ్లు రెస్క్యూ సిబ్బందికి పెద్ద ఆటంకంగా మారాయి. ఆక్సిజన్ మాస్కులు ధరించిన అగ్నిమాపక సిబ్బంది తీవ్రమైన వేడిని తట్టుకుంటూ లోపలికి వెళ్లి స్ట్రెచర్లపై బాధితులను బయటకు తీసుకువచ్చారు. పబ్ అధికారికంగా 4 ఎమర్జెన్సీ ఎగ్జిట్ (అత్యవసర ద్వారాలు) ఉన్నట్లు పేర్కొన్నప్పటికీ, ప్రమాద సమయంలో ఆ దారులు మూసివేసి ఉన్నాయా లేదా ఏవైనా వస్తువుల వల్ల బ్లాక్ అయ్యాయా అనే కోణంలో బ్యాంకాక్ గవర్నర్ చాడ్‌చార్ట్ సిట్టిపుంట్ దర్యాప్తుకు ఆదేశించారు. థాయిలాండ్ ప్రధాన మంత్రి అనుతిన్ చార్న్‌విరాకుల్ స్వయంగా ప్రమాద స్థలాన్ని సందర్శించి సహాయక చర్యలను పర్యవేక్షించారు. ఈ దారుణ ఘటన థాయిలాండ్‌లో 2009 నాటి శాంతికా క్లబ్ ప్రమాదాన్ని (67 మంది మృతి), 2022 నాటి మౌంటైన్ బి క్లబ్ ప్రమాదాన్ని (25 మంది మృతి) గుర్తుచేస్తూ నైట్‌క్లబ్‌ల భద్రతా ప్రమాణాలపై మళ్లీ పెను ప్రశ్నలను లేవనెత్తింది.

thailand nightclub fire accident news,bangkok pub fire kills twenty seven.