టీడీపీ సోషల్ మీడియాలో మాజీ ముఖ్యమంత్రి వైఎస్ జగన్‌మోహన్ రెడ్డిని అనుకరిస్తూ వీడియోలు చేసి గుర్తింపు పొందిన ఆర్టిస్ట్ సునీల్ తాజాగా క్షమాపణలు చెప్పారు. ఇటీవల ఆయన రూపొందించిన కొన్ని వీడియోలు, ముఖ్యంగా జగన్ సతీమణి వైఎస్ భారతి రెడ్డిని ఉద్దేశించి చేసిన వ్యంగ్య వీడియో సోషల్ మీడియాలో తీవ్ర చర్చకు దారితీసింది. ఈ వీడియోపై వైసీపీ నేతలు, కార్యకర్తలు తీవ్ర అభ్యంతరం వ్యక్తం చేయడంతో పాటు సునీల్‌పై విమర్శలు గుప్పించారు.

ఈ నేపథ్యంలో స్పందించిన సునీల్ సెల్ఫీ వీడియో విడుదల చేశారు. తన వీడియోల వల్ల మాజీ ముఖ్యమంత్రి జగన్‌తో పాటు ఆయన కుటుంబ సభ్యుల మనోభావాలు దెబ్బతిన్నట్లయితే క్షమించాలని కోరారు. ఎవరినీ వ్యక్తిగతంగా అవమానించే ఉద్దేశం తనకు లేదని, వినోదం కోసమే ఆ వీడియోలు చేశానని ఆయన తెలిపారు. అదేవిధంగా, ఇకపై వ్యక్తిగతంగా ఎవరినీ లక్ష్యంగా చేసుకుని ఇలాంటి వీడియోలు రూపొందించబోనని, భవిష్యత్తులో మరింత బాధ్యతతో వ్యవహరిస్తానని సునీల్ హామీ ఇచ్చారు. ఆయన విడుదల చేసిన క్షమాపణల వీడియో ప్రస్తుతం సోషల్ మీడియాలో వైరల్ అవుతోంది. దీనిపై నెటిజన్లు భిన్నాభిప్రాయాలు వ్యక్తం చేస్తున్నారు.