నిరుద్యోగులకు ఏపీ సర్కార్ గుడ్ న్యూస్ చెప్పింది.  రాష్ట్రవ్యాప్తంగా వివిధ శాఖల్లో ఖాళీగా ఉన్న ఉద్యోగాల భర్తీకి సంబంధించి త్వరలోనే  మెగా జాబ్ క్యాలెండర్  విడుదల చేయనుంది. ఈ విషయాన్ని  రాష్ట్ర పురపాలక, పట్టణాభివృద్ధి శాఖ మంత్రి  నారాయణ   నెల్లూరులో  మీడియా సమావేశంలో చెప్పారు.   ప్రభుత్వ శాఖల్లోని ఉద్యోగాల భర్తీకి సంబంధించిన ప్రతిపాదనలు, నియామక ప్రక్రియకు సంబంధించిన పనులు జరుగుతున్నాయన్న ఆయన రాష్ట్రంలో కూటమి ప్రభుత్వం అధికారంలోకి వచ్చిన నాటి నుండి యువతకు ఉపాధి, ఉద్యోగ అవకాశాలు కల్పించడమే ప్రధాన లక్ష్యంగా ముందుకు సాగుతోందన్నారు.  విద్యాశాఖ మంత్రి నారా లోకేష్ నేతృత్వంలో ఇప్పటికే 16 వేలకు  పైగా ఉపాధ్యాయ పోస్టుల భర్తీ ప్రక్రియ జరుగుతోందన్న ఆయన.. త్వరలోనే  మెగా జాబ్ క్యాలెండర్ విడుదల చేయనున్నట్లు తెలిపారు.  

మెగా డీఎస్సీలో అక్రమాలు అంటూ వైసీపీ చేస్తున్న విమర్శలను ఆయన ఖండించారు.  ఏళ్ల తరబడి పెండింగ్‌లో ఉన్న 16 వేల ఉపాధ్యాయ పోస్టులను భర్తీ చేస్తూ నిరుద్యోగుల జీవితాల్లో వెలుగులు నింపుతున్నందుకే లోకేష్ రాజీనామా చేయాలా అని నిలదీశారు. గత ప్రభుత్వ హయాంలో నిరుద్యోగులను  మోసం చేశారని, ఇప్పుడు తమ ప్రభుత్వం ఉద్యోగ ప్రకటనలు చేస్తుంటే ఓర్వలేక వైసీపీ  అనవసర రాద్ధాంతం చేస్తోందన్నారు. 

రాష్ట్రంలో జరుగుతున్న సంక్షేమ, అభివృద్ధి కార్యక్రమాల నుంచి ప్రజల దృష్టిని మళ్లించేందుకే వైసీపీ నేతలు ధర్నాలు, నిరసనల డ్రామాలు ఆడుతున్నారని నారాయణ దుయ్యబట్టారు. ఉత్తరాంధ్రలో అంతర్జాతీయ ప్రమాణాలతో శరవేగంగా రూపుదిద్దుకుంటున్న భోగాపురం విమానాశ్రయం వంటి ప్రతిష్టాత్మక ప్రాజెక్టు పురోగతిని చూసి విపక్షాలు తట్టుకోలేకపోతున్నాయన్న ఆయన.. ఆ పార్టీ నిరసన నిరసన కార్యక్రమాలకు ప్రజల నుంచే కాకుండా సొంత పార్టీ నాయకుల నుంచి కూడా   మద్దతు లభించడం లేదన్నారు.  

ప్రభుత్వం త్వరలోనే ప్రకటించబోయే మెగా జాబ్ క్యాలెండర్‌పై రాష్ట్రవ్యాప్తంగా ఉన్న లక్షలాది మంది నిరుద్యోగులు ఎంతో ఆశగా ఎదురుచూస్తున్నారు.  ఏయే శాఖల్లో ఎన్ని పోస్టులు భర్తీ చేయనున్నారు, నోటిఫికేషన్లు,  పరీక్షల తేదీలు ఎప్పుడు ఉంటాయి అనే  స్పష్టమైన విషయాలపై త్వరలోనే జాబ్ క్యాలండర్ ద్వారా స్పష్టత రానుంది.  కూటమి ప్రభుత్వం నిర్ణీత గడువులోగా పారదర్శక నియామక ప్రక్రియలు పూర్తి చేస్తుందని నిరుద్యోగ యువత ఆశాభావం వ్యక్తం చేస్తోంది.  

AP Mega Job Calendar, Minister P Narayana, Andhra Pradesh,  Government Jobs, Nara Lokesh Teacher Posts. AP Recruitment News