విభజన హామీల అమలు, ప్రత్యేక హోదా అంశాలపై కేంద్రం తీరును నిరసిస్తూ  నిన్న ఢిల్లీ వేదికగా ధర్మ పోరాట దీక్ష చేసిన ఏపీ ముఖ్యమంత్రి చంద్రబాబు.. ఈరోజు ఢిల్లీలో పాదయాత్ర నిర్వహిస్తున్నారు. రాష్ట్రపతి రాంనాథ్‌ కోవింద్‌ తో భేటీ అవ్వనున్న చంద్రబాబు..ఎంపీలు, పార్టీల నేతలతో కలిసి ఏపీ భవన్ నుంచి రాష్ట్రపతి భవన్‌ వరకు పాదయాత్రగా బయల్దేరారు. బాబు బృందం ఇవాళ మధ్యాహ్నం 12.30 గంటలకు కోవింద్‌ను కలిసి వినతి పత్రం సమర్పించనున్నారు. మొత్తం 18 డిమాండ్లతో కూడిన వినతి పత్రాన్ని ఆయనకు ఇవ్వనున్నారు. రాష్ట్రపతిని కలిసే బృందంలో ముఖ్యమంత్రితో పాటు కేంద్ర మాజీ మంత్రి అశోక్‌గజపతి రాజు, ఉప ముఖ్యమంత్రి చినరాజప్ప, మంత్రులు- కళా వెంకట్రావు, నక్కా ఆనంద్‌బాబు, అమరావతి ఉద్యోగుల ఐకాస ఛైర్మన్‌ బొప్పరాజు వెంకటేశ్వర్లు, ఆంధ్ర మేధావుల ఫోరం ఛైర్మన్‌ చలసాని శ్రీనివాసరావు, ఆంధ్రప్రదేశ్‌ సచివాలయ ఐకాస అధ్యక్షుడు యు.మురళీకృష్ణ, ఏపీయూడబ్ల్యూజే అధ్యక్షుడు ఐ.వి.సుబ్బారావు, ఏపీ ఏన్జీవోల సంఘం అధ్యక్షుడు చంద్రశేఖర్‌రెడ్డి, ఆంధ్రప్రదేశ్‌ సినీ పరిశ్రమ ప్రతినిధి శివాజీ ఉన్నారు. పాదయత్రకి ముందు ఇవాళ ఉదయం ఏపీ భవన్‌లో బాబుతో కేంద్ర మాజీ మంత్రి చిదంబరం భేటీ అయ్యారు. ప్రత్యేక హోదా, విభజన హామీల డిమాండ్లపై వీరిరువురూ చర్చించారు. చంద్రబాబు పోరాటానికి చిదంబరం సంఘీభావం తెలిపారు. నిన్న జరిగిన ధర్మ పోరాట దీక్షకి పలువురు జాతీయ స్థాయి నేతలు మద్దతు తెలిపిన సంగతి తెలిసిందే.