ఆ పిల్లాడు పరిగెడుతున్నాడు.. ఎక్కడికో .. ఎందుకో తెలియదు. కానీ, సారి ఆ పిల్లాడి సంకల్పం, గమ్యం తెలిసిన తర్వాత, దేశం కాదు, ప్రపంచం అతనికి సెల్యూట్ చేసింది. అవును, సోషల్ మీడియాలో దావానలంలా వ్యాపిస్తున్న ఉత్తరాఖండ్‌కు చెందిన 19 ఏళ్ల యువకుడి స్ఫూర్తిదాయకమైన వీడియో గురించే మనం ఇప్పుడు మాట్లాడుకుంటున్నాం.  ఇప్పడు దేశం మొత్తం ఆ వీడియో  చూస్తోంది. నిజానికి, దేశం మొత్తం ఆ యువకుడికి, సాల్యూట్ చేస్తోంది. అవును, అది అతిశయోక్తి కాదు. నిజం, ఓ వంక పొట్టకూటి కోసం ఉద్యోగం చేస్తూ మరోవంక సైన్యంలో చేరి దేశమాత సేవచేసే లక్ష్య సాధన కోసం రోజుకు పదికిలోమీటర్ల దూరం పరుగులు తీస్తున్న ఆ యువకుడితో కారులో వెళుతున్న చిత్రనిర్మాత వినోద్ కప్రీ సాగించిన సంభాషణ ఒక్క సారి చూసిన వారు మళ్ళీ మళ్ళీ చూస్తున్నారు. అందరికీ షేర్ చేస్తున్నారు. శభాష్ అంటున్నారు. సెల్యూట్ చేస్తున్నారు. 

నిజానికి, ఆ వీడియో వైరల్ అయ్యేవరకు, ఈ యువకుడు ఎవరో, ఎందుకు పరుగులు తీస్తున్నారో, ఎవరికీ తెలియదు. ఎవరు పట్టించుకోలేదు. అయితే ఎప్పుడైతే వినోద్ కప్రీ వీడియో షేర్ చేశారో, ఇక అక్కడి నుంచి ఆ యువకుడు దేశానికి కాదు, ప్రపంచం మొత్తానికి పరిచయం అయ్యాడు. అందరి దీవెనలు అందుకుంటున్నారు. ఇంతకీ, ఆ భరత మాత ముద్దు బిడ్డ ఎవరో తెలుసా,  ఉత్తరాఖండ్‌లోని అల్మోరాకు చెందిన ప్రదీప్ మెహ్రా. నిజానికి, ప్రదీప్ మెహ్రా  ఎప్పటి నుంచో రోజు అదే చేస్తున్నా, ఎవరికీ తెలియదు, కానీ ఇప్పుడు అతను రాత్రికి రాత్రి, దేశంలోనే కాదు, అంతర్జాతీయంగాను గుర్తింపు పొందాడు. ఎందరి గుండెల్లోనో గుడికట్టుకున్నాడు. సైన్యంలో చేరాలి, దేశమాత సేవ చేయలనే సంకల్పం, పట్టుదలతో  కోట్లాదిమంది మంది హృదయాలను గెలుచుకుంటున్నాడు.

అవార్డు గెలుచుకున్న చిత్రనిర్మాత వినోద్ కప్రీ ఆ యువకుడితో తాను మాట్లాడిన వీడియోను సోషల్ మీడియాలో షేర్ చేశారు. మెహ్రా నోయిడాలోని సెక్టార్ 16లోని తన ఆఫీస్ నుంచి బరోలాలోని తన ఇంటికి ప్రతిరోజూ 10 కి.మీ. పరిగెడుతున్నట్లు చెప్పాడు. ఆ ఇద్దరి మధ్య జరిగిన సంభాషణలో, ప్రదీప్ మెహ్రా  పరుగు తీస్తూనే తన పరుగు ఏ గమ్యం చేరటం కోసమో చెప్పుకొచ్చాడు. సైన్యంలో చేరేందుకే, ప్రతి రోజు తాను పనిచేసే కార్యాలయం నుంచి పది కిలో మీటర్ల దూరంలో ఉన్న ఇంటికి పరిగెడుతూ ప్రాక్టీసు చేస్తున్నానని చెప్పారు. వినోద్ కప్రీ, లిఫ్ట్ ఇస్తానని చెప్పినా,  ప్రదీప్ మెహ్రా  సున్నితంగా తిరస్కరించాడు. ఉదయం పరుగు ప్రాక్టీసు చేసేందుకు సమయం లేక పోవడం వలన, ఇలా ఆఫీసు నుంచి ఇంటికే వెళ్ళే సమయంలో చేస్తున్నాని చెప్పు కొచ్చాడు.  

అదలా ఉంటే, ఇప్పుడు ప్రదీప్ మెహ్రా  స్పూర్తి దాయక, కథలో మరో మెరుపు మెరిసింది.    లెఫ్టినెంట్ జనరల్ సతీష్ దువా (రిటైర్డ్) యువకుడి వీడియోను ట్వీట్ చేశారు.సహాయం చేసేందుకు  ముందుకొచ్చారు. ఆయన సంబందిత అధికారులతో మాట్లాడి, రిక్రూట్‌మెంట్ పరీక్షల్లో ఉత్తీర్ణత సాధించడంలో అతనికి సహాయపడటానికి, అవసరమైన శిక్షణ ఇప్పించేందుకు ఏర్పాటు చేశారు.ఈ విషయాన్ని దువా’ట్వీట్’ చేశారు.ప్రదీప్ మెహ్రా కోరుకున్న గమ్యాన్ని చేరుకోవాలని మనం అందరం కూడా, అతనికి బెస్ట్ ఆఫ్ లక్’ అందాం.. అతన్ని కన్న మాతృమూర్తికి పాదాభివందనం చేద్దాం. జై హింద్ ..జై భారత్ .. భారత్ మాతాకీ జై.