సాఫ్ట్‌వేర్ ఉద్యోగాలు వేస్ట్..

నేటి యువతలో అత్యధికులు సాఫ్ట్‌వేర్ ఇంజనీరింగ్ చదవడం, రేయింబగళ్లు కోడింగ్ చేస్తూ వీసా కోసం ఏళ్ల తరబడి వేచి చూడటం సర్వసాధారణం అయిపోయింది. కానీ, ప్రస్తుతం అమెరికాలో ఒక కొత్త ట్రెండ్ నడుస్తోంది. ఐటీ ఉద్యోగాల కంటే కూడా మన సాంప్రదాయ హిందూ పురోహితుల వృత్తికి అక్కడ విపరీతమైన డిమాండ్ పెరుగుతోంది. అమెరికాలో ఉండే పంతుళ్లకు ఉన్న క్రేజ్ మరియు వారు సంపాదించే షాకింగ్ ఆదాయం గురించి ఒక యువతి సోషల్ మీడియాలో షేర్ చేసిన వీడియో ప్రస్తుతం నెట్టింట తెగ వైరల్ అవుతోంది. ఈ వివరాలు చూసి సాఫ్ట్‌వేర్ ఉద్యోగులు సైతం ముక్కున వేలేసుకుంటున్నారు.

అమెరికాలో ఉండే హిందూ పూజారులు ఒక చిన్న పూజకు ఎంత వసూలు చేస్తారో తెలుసా అంటూ యూఎస్ బేస్డ్ ఇండియన్ కంటెంట్ క్రియేటర్, బ్లాగర్ సారికా యాదవ్ ఇన్‌స్టాగ్రామ్‌లో షేర్ చేసిన ఒక రీల్ ఇప్పుడు సోషల్ మీడియాను షేక్ చేస్తోంది. ఆమె తన వీడియోలో వెల్లడించిన లెక్కల ప్రకారం, అమెరికాలో ఒక సాధారణ చిన్న సత్యనారాయణ స్వామి వ్రతం ఇంట్లో జరిపించాలంటే పూజారులు కనీసం 29 వేల రూపాయల నుండి 33 వేల రూపాయల వరకూ (భారత కరెన్సీలో) ఛార్జ్ చేస్తారట. కేవలం పూజారి ఫీజే కాకుండా, ఏదైనా టెంపుల్స్ ద్వారా మనం పండిట్‌జీలను బుక్ చేసుకుంటే అదనంగా మరో 10 వేల రూపాయల నుండి 15 వేల రూపాయల వరకూ సర్వీస్ ఛార్జీల రూపంలో దేవాలయాలకు చెల్లించాల్సి ఉంటుందని ఆమె వివరించింది. కొన్నిసార్లు భక్తులే స్వయంగా పూజా సామాగ్రి తెచ్చుకుంటే సరిపోతుంది, ఒకవేళ సామాగ్రి కూడా పండితులే తీసుకువస్తే దానికి అదనంగా డబ్బులు చెల్లించాల్సి ఉంటుందని స్పష్టం చేసింది.

అమెరికాలో ఉన్న భారతీయ కమ్యూనిటీ రోజురోజుకూ విస్తరిస్తుండటంతో, అక్కడ పూజారులకు ఏడాది పొడవునా ఫుల్ డిమాండ్ ఉంటోందని సారిక తెలిపింది. కొత్త ఇళ్ల గృహప్రవేశాలు, ధనత్రయోదశి పూజలు, శ్రావణ మాసం వ్రతాలు, నోములు, అంతెందుకు కొత్తగా ఏదైనా కారు లేదా వాహనం కొన్నా సరే పూజలు చేయించడానికి పండిట్ జీలు అసలు ఖాళీ ఉండరని చెప్పుకొచ్చింది. చాలామంది పూజారులు ప్రత్యేకంగా మతపరమైన వృత్తుల కోసం కేటాయించిన 'R-1' వీసా కేటగిరీ ద్వారా అమెరికాకు వస్తుంటారని, ప్రస్తుతం వాళ్లకు ఉన్నంత డిమాండ్ మరే ఇతర ప్రొఫెషన్‌కు లేదని వీడియోలో వెల్లడించింది.

ఈ వీడియో విపరీతంగా వైరల్ కావడంతో నెటిజన్లు క్రేజీ కామెంట్స్‌తో విరుచుకుపడుతున్నారు. ఇక సాఫ్ట్‌వేర్ ఇంజనీరింగ్ ఉద్యోగాలు వదిలేసి, పూజలు నేర్చుకుని అమెరికా వెళ్లడమే బెటర్ అంటూ కొందరు సరదాగా కామెంట్లు పెడుతున్నారు. కార్పొరేట్ ఉద్యోగాల టెన్షన్స్ కంటే ఇదే ఎంతో ప్రశాంతమైన వృత్తి అని మరికొందరు అభిప్రాయపడుతున్నారు. అయితే, డాలర్లలో సంపాదనను రూపాయిల్లోకి మార్చి చూడటం కరెక్ట్ కాదని, అమెరికాలో ఉండే ద్రవ్యోల్బణం, అక్కడి జీవన ప్రమాణాల ప్రకారం 300 డాలర్లు అనేది చాలా సాధారణమైన మొత్తమని కొందరు నెటిజన్లు గుర్తుచేస్తున్నారు. ఏది ఏమైనప్పటికీ, మన సంస్కృతిని విదేశాల్లో కాపాడుకుంటూ, పూజారులు అక్కడ సముచిత స్థానాన్ని సంపాదించుకోవడం గర్వించదగ్గ విషయమే.