మూడోరోజు  ఉదయం  ఎనిమిది  గంటలకి డ్రైవర్ సుబ్బారావు వచ్చాడు. "అయ్యగారు మిమ్మల్ని తీసుకురమ్మంటున్నారమ్మా" అన్నాడు. ఆనాడు సుబ్బారావు అన్న మాటలు, రవణమ్మ గారన్న మాటలు  నేను మరచిపోలేదు. అందుకే ససేమిరా రానన్నాను. ఎంతో బతిమాలాడు. కానీ నేను  వెళ్ళలేదు. చివరికి  చేసేదేమీలేక  తిరిగి వెళ్ళిపోయాడు.
    కానీ మరో గంటలో  తిరిగివచ్చేశాడు. "మిమ్మల్ని తీసుకురాకుండా  హాస్పిటల్లో  అడుగుపెట్టద్దని  అయ్యగారు  కోపం పడుతున్నారమ్మా! అక్కడ నానా అల్లరిగా  వుంది. దయచేసి  మీరు రండమ్మా" అన్నాడు.
    "సరే. నువ్వెళ్ళు. నేను వస్తాలే" అన్నాను.
    "రండి. కార్లో వెళదాం" అన్నాడు.
    "ముందే చెప్పానుగా. ఇప్పట్లో  నీ కారు ఎక్కను. అరగంటలో  అక్కడుంటాను. వెళ్ళు" అని త్వరగా తయారై టాక్సీలో  వెళ్ళాను.
    ఆవిడగారు. శ్రీశ్రీగారి ముఖం  చాలా గంభీరంగా వుంది.
    "నన్ను  మర్చిపోయావేమిటి?" అని అడిగారు.
    "మరచిపోతే  ఎందుకొస్తాను" అని అంటూ వుంటే నా కళ్ళలో  నీళ్ళు తిరిగాయి.
    "నేను ముందే చెప్పాను  సరోజా! నాకోసం  దాని బాధ భరించక  తప్పదని. సరే. నువ్వంత బాధపడుతూ  రానక్కరలేదు. నా ఆరోగ్యం  తేరుకున్నాక  నేనే వస్తాలే. మరో రెండు  రోజులుండి  డాక్టర్ గారు ఇంటికి వెళ్ళిపోమన్నారు. పదిహేను  రోజులు పూర్తి రెస్ట్ లో వుండాలన్నారు. నువ్వు కూడా రెస్ట్ తీసుకో" అని చెప్పారు.
    "సరే. మిమ్మల్ని  చూశాను. మీరు బాగున్నారు. నేనిక వెళతాను. సెలవిప్పించండి" అన్నాను.
    "అంటే....మరి రావా?" అన్నారు.
    "చూడండి. నేనెక్కడికీ  పోను. మీరు బాగా  కోలుకున్నాక ఇంటికి  రండి" అన్నాను.
    "అదేమిటి సరోజా! ఇప్పుడేగా  వచ్చావు. కూర్చో" అంటూ, "ఫేస్ ఫుల్ గా వేద్దూ" అన్నారు. వేశాను.
    "నాకో సిగరెట్  అందిస్తావూ?" అని  అడిగారు. అగ్గిపెట్టెతో  సహా ఇచ్చాను.
    "ఏమైనా  మంచి మాటలు  చెపుదూ" అన్నారు.
    "సర్లేండి. నేనింకా  మిమ్మల్ని  ఆ మాట  అడుగుదామనుకుంటున్నాను. మనస్సు  అసలు బావుండడంలేదు. మీరు మీ గురించి చెప్పండి. నాకు కాస్త ఉత్సాహం వస్తుంది" అన్నాను.
    "ఫేస్ ఫుల్ గా తిప్పలేదా?" అన్నారు.
    "ఫుల్ గానే వుందండీ" అన్నాను.
    "సరిగ్గా  గాలి తగలడంలేదు. గాలి  తిని బతికేస్తానని  మా పెద్దబావ  అనేవాడు" అన్నారు.
    "గాలి తినడం ఏమిటండి బాబూ!" అని నవ్వాను.
    "ఊరికే  అంటున్నాలే! గాలి_ముఖ్యంగా  సముద్రపు గాలి అంటే నాకు  విపరీతమైన ఇష్టం. సముద్రపు ఒడ్డున  నిల్చొని  సూర్యోదయం చూడడమంటే చెప్పలేనంత  ఇష్టం. అలాగే కార్తీకమాసం  వెన్నెలంటే  సరదా. తూర్పున సూర్యుడు ఉదయించిన  సమయానికే నేను పుట్టానట. చైత్రశుద్ధ షష్టినాడు  పుట్టానని  మా పెద్దబావ, శ్రీరామనవమి రోజున పుట్టానని మా అమ్మమ్మ అంటూ వుండేవారు. నా ఏణ్ణర్ధమప్పుడే  మా అమ్మ చనిపోయింది. నాకు అన్నలూ అక్కలూ తమ్ముళ్ళూ చెల్లెళ్ళూ ఎవ్వరూలేరు. నేను మాతృప్రేమకీ, సోదర సోదరీ ప్రేమకీ దూరంగా  బ్రతికాను. అందువల్లనే  ప్రేమంటే  ఒక అపనమ్మకం  నాలో చిన్నప్పటి నుండీ  వర్ధిల్లుతూ  వచ్చింది. మా నాన్న మాత్రం నన్ను అతి గారాబంగా  పెంచాడు" అన్నారు.
    "అదేమిటండీ_తండ్రి  గురించి చెప్తూ  'పెంచాడు' అంటున్నారే" అన్నాను.
    "అందులోనే  ఎంతో ఆప్యాయత  వుంది సరోజా! మా నాన్నని 'నువ్వు' అని పిలిస్తేనే ఎంతో బాగా అనిపించేది. అప్పుడప్పుడూ  'నాన్నా' అని పిలిచినా, 'బాబా' అనే ఎక్కువగా  పిలిచేవాణ్ని" అని చెప్పారు.
    "ఏవండీ  నాకో సందేహం. మీకు శ్రీనివాసరావని పేరు ఎవరు, ఎందుకు పెట్టారండీ" అని అడిగాను.
    "మంచి ప్రశ్నే వేశావు. మా నాన్నే పెట్టాడీ పేరు. ఆయనకి పి.టి. శ్రీనివాసయ్యంగారిమీద  వున్న అపార గౌరవమే  అందుకు కారణం అనిపిస్తుంది నాకు. అతను  అనేక విద్యలలో  అఖండమైన ప్రజ్ఞాశాలిట" అని చెప్పారు.
    "మీ ఇంటిపేరు అసలు 'శ్రీ రంగం' వారేనా?" అని అడిగాను.
    "కాదు సరోజా, మా నాన్న అసలు పేరు పూడిపెద్ది  వెంకటరమణ. మా నాన్న  శ్రీరంగం సూర్యనారాయణగారి దత్తపుత్రుడిగా  మారడంవల్ల ఇంటి పేరు కూడా  'శ్రీరంగం' అని మారింది.
    అందరూ తల్లిచాటు  బిడ్డలయితే  నేను తండ్రిచాటు  బిడ్డగా  పెరిగాను. మా అమ్మకి నాకన్నా  ముందుగా ఒక కొడుకు పుట్టి, పురిట్లోనే  పోయాడట. మా అమ్మ చనిపోయిన తర్వాత  మా నాన్న  మళ్ళీ పెళ్ళి చేసుకున్నాడు. నా రెండో తల్లి పేరు సుభద్ర. గొప్ప తాశీల్దారుగారి  అమ్మాయి. ఆవిడ తొలి చూలులో  కొడుకును కన్నది. వాడు ఏడాదికో, ఏణ్ణర్ధానికో  చనిపోయాడట. ఆవిడ  పాలు కూడా తాగి నేను జీవించాను" అని ఆయన చెబుతూంటే_    
    "అదేమిటి? 'ఆవిడ పాలుకూడా' అని అంటున్నారేమిట"ని  అడిగాను.
    "అవును సరోజా! నా చిన్నతనంలో  మా అమ్మ చనిపోవటంవల్ల అయిదో ఏడు వచ్చేదాకా  ఎందరమ్మలో  నాకు చనుబాలిచ్చి  బతికించారు. నా పినతల్లి  నన్నెంతో  గారాబంగా  పెంచింది ఆమెకూడా  నాకు దక్కలేదు. 1924వ సంవత్సరంలో  చనిపోయింది" అని వివరించారు.
    "ఇంతకీ  మీ పుట్టిన తేదీ నికరంగా  ఏదంటారు?" అని అడిగాను.
    "నాకీ పుట్టిన తేదీల పట్టింపులు, పుట్టినరోజు  పండుగ వేడుకలు, చాదస్తాలు లేవు సరోజా! ఎప్పుడు పుడితే ఏం? అయినా  నువ్వు అడుగుతున్నావు కనుక చెప్తాను. 2_1_1910వ తేదీ నా పుట్టినరోజుగా  చెలామణి అవుతోంది. కానీ  ఆరోజు  నేను పుట్టలేదు. దాని వెనుకాల  ఓ చిన్న కథే వుంది.
    1910 ఏప్రిల్ లో శ్రీరామనవమి రోజున  పుట్టానని  అమ్మమ్మ అంటూండేదని  చెప్పానుగా! నా స్కూల్ రిజిష్టర్ కోసం మా నాన్న రాయించిన తేదీ 2_1_1910 అదే ఇప్పటికీ  ఖాయమైంది. ఏమైనా 1910లో పుట్టిన  విషయం యథార్ధం. పోతే  నెలల్లో తేడా.