విశ్వమందిరము
తెలుగు గగనాన విశ్వమందిరములోన
ప్రభవ మందెను విశ్వ ప్రభాకరుండు;
కటిక చీకటి దొంతరల్ కరగిపోయె
మురిసినవి దీనజన మనస్సరసిజములు.
తెలుగు నగరాన విశ్వమందిరములోన
వినపడెను విశ్వమోహన వేణుగీతి;
పొంగి పొరలెను యమునా తరంగ పంక్తి
నవ్వి నటనం బొనర్చె బృందావనంబు.
తెలుగు వనమందు విశ్వమందిరము నందు
పల్లవించెను విశ్వకల్పద్రుమంబు;
నీడ నిచ్చును భవతాప పీడితులకు
ఫలము లొసగు భక్తులకు కావలసినన్ని.
తెలుగు పథమందు విశ్వమందిరము ముందు
వెడలినది విశ్వసంక్షేమ విజయరథము;
కంచు జయభేరి "ధణధణ" మంచు మ్రోగె
జనత జేజేలు పలికి ముందునకు సాగె.
తెలుగు పొలమందు విశ్వమందిరము నందు
దర్శనంబిచ్చె విశ్వ సుదర్శనంబు;
సమసిపోవుత! ధూర్త దుర్జన భయంబు;
సంగతం బౌత! సాధు సజ్జన జయంబు.
విశ్వయోగి దారి వేదాంత జయభేరి
విశ్వయోగి వాణి వేదవాణి
విశ్వయోగి పల్కు వేదసుధల్ చిల్కు
విశ్వయోగి వాక్కు వేదవాక్కు.
అగాధ గాథం భగవత్ప్రబోధం
పురాణనాథం భువనైకనాథం
అనాథనాథం కరుణాసనాథం
శ్రీ షిర్డినాథం శిరసా నమామి.
*
సౌందర్య సార సర్వస్వం
మందస్మిత మనోహరం
వందారు జన మందారం
వందే సాయి మహేశ్వరమ్.
