రాత్రి రెండో ఆట సినిమా చూసి
రత్తమ్మ యింటి ముందాగిన రిక్షాలోంచి
దిగిన జరీ కండువా పెద్దపులి జేబులోంచి పడిన
పర్సుతీసి జాగ్రత్త పెట్టి
అక్కడే వెయిట్ చేసి
తిరిగి ధోవతిని సరిచేసుకుంటూ తూలుతూ వచ్చే
పెద్దపులి చేతికి యిచ్చి
"థాంక్యూ" అనే పదాన్ని సంపాదించుకుని, సంతోషించుకుని
వీపుమీద మోసుకుని వెళిపోతాడు వీరేశ్వరరావు

ఆఫీసరు వస్తే సాల్యూట్ చేస్తుంది కుడిచెయ్యి
ఆకలేస్తే గబ గబ రాస్తుంది కుడిచెయ్యి
జేబులోంచి సెకండుహాండ్ సిగరెట్టు ముక్కల్ని తీస్తుంది కుడిచెయ్యి
అయితే ఇక ఎడమచెయ్యి ఉపయోగ మేమిటంటా?
నవ్వుకుంటూ ఎలక్ట్రిక్ స్తంభాన్ని ఆనుకుని షాక్ తగిలి
నిరుపయోగంగా చచ్చిపోతాడు వీరేశ్వర్రావు...
   
బ్లాక్ మార్కెట్ లో బియ్యం, బ్రాకెట్ల ఓపినింగులు, క్లోజింగులు
థియేటర్లో కొత్తసినిమా, కాఫీ హోటల్ రేడియోలా లతా
రోడ్డుమీద ఖరీదైన కార్లు, ఎన్నికల్లో నెగ్గినవాడి ఊరేగింపు
కేకలు, కోకలు, మూకలు ముసిరిన బజారు రోడ్డమ్మట
వీనులుండి వినలేక, కళ్ళుండి చూడక నిటార్గా నేరుగా
యోగీశ్వరుడిలా నడుస్తాడు జోగీశ్వరరావు
చిన్నప్పటి ఆదర్శాలు అహంకారాలు నశించి
గోడమీద గ్రూప్ ఫోటోలు, బియ్యే డిగ్రీలు కృశించి
నిత్యనైమిత్తిక మృద్ఛిత్తికల గుళ్ళు కట్టి
సంఘ గౌరవ దైవతముల్ని ప్రతిష్టించి
రసహీనమైన తమ జీవితాన్ని నివాళించి
నీడలమీటున పీడకలల చాటున నీరసంగా నుంచుని
చనిపోయిన కోర్కెల్ని పాతిపెట్టిన శ్మశానాల దాటుకుని
అలవాట్ల ఆచారాల రైలుపట్టాల మీదనే దొర్లుకుని, దొర్లుకుని
చిన్నప్పుడు తెలియకచేసిన తప్పుకు రోగాలు మిగుల్చుకుని
యౌవనంలో వృద్ధాప్యాన్ని తగుల్చుకుని
భయాల చాటున, ఏడుపుకొండల మాటున
గుమాస్తాలు టీచర్లు చిన్న చిన్న సంసారులు
కోటీశ్వరరావులు వీరేశ్వరరావులు గొంగళీ పురుగులు
లక్షలు లక్షలు