
ఒకప్పుడు గ్రామీణ ప్రాంత ప్రజలు సోమవారం వస్తే చాలు పక్కనే ఉన్న టౌన్ కి సరుకులు కొనడానికి రెడీ అయ్యే వాళ్ళు. ఆ టైంలో వాళ్ల ముఖాలు చూడాలి...దీపావళికి ఎక్స్ క్లూజివ్ గా తయారు చేసిన మతాబుల్లా వెలిగిపోతూ ఉంటాయి. అందుకు కారణం సినిమా చూడబోతున్నామని.
ఇది పచ్చి నిజం. గ్రామీణ ప్రాంతాల ప్రజలకి సినిమా అంటే కేవలం వినోదం మాత్రమే కాదు, అది ఒక పెద్ద పండుగ లాంటిది. వారానికి ఒకసారి తమ ఊరి నుంచి పక్కనే ఉన్న పట్టణానికి లేదా నగరానికి వెళ్లి ఇంటికి కావాల్సిన సరుకులు కొనుక్కోవడం అప్పట్లో ఒక ఆనవాయితీ. అలా సంతకు లేదా మార్కెట్కు వచ్చిన ప్రతి కుటుంబం, పని ముగించుకుని నేరుగా సినిమా థియేటర్ వైపు అడుగులు వేసేది. ఆ ఒక్క కారణంతోనే శుక్రవారం, శనివారం మాత్రమే కాదు, సాధారణ పని దినమైన సోమవారం కూడా థియేటర్ల ముందు 'హౌస్ఫుల్' బోర్డులు దర్శనమిచ్చేవి. ఆ రోజుల్లో సింగిల్ స్క్రీన్ థియేటర్ల వద్ద సందడి మామూలుగా ఉండేది కాదు.
కానీ, ఇప్పుడు పరిస్థితి పూర్తిగా మారిపోయింది. ఒకప్పుడు థియేటర్లను కళకళలాడించిన ఆ గ్రామీణ ప్రేక్షకులు ఇప్పుడు పట్టణాల వైపు రావడం బాగా తగ్గించేశారు. ఇంతకీ ఆ జనమంతా ఏమైపోయారు? వారు థియేటర్లకు దూరం కావడానికి అసలు కారణం ఎవరు? దీని వెనుక మారుతున్న సాంకేతికత, ఆర్థిక కారణాలు మరియు ప్రజల జీవనశైలిలో వచ్చిన పెను మార్పులు స్పష్టంగా కనిపిస్తున్నాయి.
.webp)
మొదటి ప్రధాన కారణం గ్రామాల్లోనే మారిన మార్కెట్ వ్యవస్థ. ఒకప్పుడు ఏ చిన్న వస్తువు కావాలన్నా పది, ఇరవై కిలోమీటర్ల దూరంలోని పట్టణానికి వెళ్లాల్సి వచ్చేది. కానీ నేడు ప్రతి పెద్ద గ్రామంలోనే సూపర్ మార్కెట్లు, అన్ని రకాల సరుకులు దొరికే దుకాణాలు వెలిశాయి. అంతేకాకుండా, ఆన్లైన్ షాపింగ్ యాప్లు మారుమూల పల్లెలకి కూడా డెలివరీ ఇస్తున్నాయి. సరుకుల కోసం నగరానికి వెళ్లే అవసరం లేకపోవడంతో, ఆ వంకతో సినిమా చూసే అలవాటు కూడా క్రమంగా కనుమరుగైంది.
ఇది కూడా చదవండి: సినిమా సూపర్...పెర్ఫార్మ్ పీక్... హిట్ బొమ్మ: కానీ కలెక్షన్లు ఎందుకు రావడం లేదు!
రెండవ అతిపెద్ద కారణం థియేటర్ల టికెట్ ధరలు మరియు ఖర్చులు. ఒక సామాన్య గ్రామీణ కుటుంబం నలుగురు సభ్యులతో కలిసి పట్టణానికి వచ్చి సినిమా చూడాలంటే, రవాణా ఖర్చులు, టికెట్ రేట్లు, ఇంటర్వెల్లో పాప్కార్న్, కూల్ డ్రింక్స్ అన్నీ కలిపి కనీసం రెండు వేల రూపాయలకు పైగా ఖర్చవుతోంది. రోజువారీ కూలీ లేదా వ్యవసాయ ఆదాయంపై ఆధారపడే కుటుంబాలకు ఒక్క సినిమా కోసం అంత పెద్ద మొత్తంలో ఖర్చు చేయడం భారంగా మారింది. అప్పట్లో పది, ఇరవై రూపాయల టికెట్తో కుటుంబమంతా సంతోషంగా సినిమా చూసి వెళ్లేవారు.
మూడవ అత్యంత కీలకమైన కారణం స్మార్ట్ఫోన్, ఓటీటీ విప్లవం. చౌకగా ఇంటర్నెట్ డేటా అందుబాటులోకి రావడంతో ప్రతి ఇంట్లో స్మార్ట్ టీవీలు, ప్రతి చేతిలో స్మార్ట్ఫోన్లు వచ్చేశాయి. థియేటర్లో సినిమా విడుదలైన కేవలం మూడు లేదా నాలుగు వారాలకే అది ఓటీటీ ప్లాట్ఫారమ్లలోకి వచ్చేస్తోంది. దీంతో ఇంటిల్లిపాదీ కూర్చుని తక్కువ ఖర్చుతో సినిమాని వీక్షిస్తున్నారు.
.webp)
అలాగే, సింగిల్ స్క్రీన్ థియేటర్లు మూతపడటం కూడా ఒక కారణం. పట్టణాల్లో పాత థియేటర్ల స్థానంలో ఖరీదైన మల్టీప్లెక్స్లు వచ్చాయి. ఆ వాతావరణానికి, అక్కడి ధరలకు సామాన్య గ్రామీణ ప్రేక్షకులు ఇమడలేకపోతున్నారు. దీనికి తోడు, నేటి సినిమాల్లో ఎక్కువగా నగర నేపథ్యం ఉన్న కథలే రావడం, పల్లెటూరి నేటివిటీకి దగ్గరగా ఉండే సినిమాలు తగ్గిపోవడం కూడా వారిని థియేటర్లకి దూరం చేసింది. చివరిగా మారిన కాలం, పెరిగిన ఖర్చులు, అందుబాటులోకి వచ్చిన డిజిటల్ వినోదమే ఆ పాత హౌస్ఫుల్ రోజులని మాయం చేశాయని చెప్పవచ్చు.
మీకు నచ్చవచ్చు:నితిన్ షాకింగ్ కామెంట్స్!
మీకు నచ్చవచ్చు:రాకాకి ఓం మూవీ గండం!
[Rural Audience, cinema, movie ticket prices, Tollywood]






