అమ్మాయిలకు ఎలాంటి అబ్బాయిలు నచ్చుతారో ఈ మూవీ చూస్తే తెలుస్తుంది
on Oct 25, 2021
నాగశౌర్య, రీతూవర్మ జంటగా నటించిన లేటెస్ట్ మూవీ 'వరుడు కావలెను'. ఈ సినిమాతో లక్ష్మీ సౌజన్య దర్శకురాలిగా పరిచయమవుతున్నారు. పి.డి.వి.ప్రసాద్‌ సమర్పణలో సితార ఎంటర్‌టైన్‌మెంట్స్‌ పతాకంపై సూర్యదేవర నాగవంశీ నిర్మించిన ఈ సినిమా ఈ నెల 29న థియేటర్‌లలో విడుదల కానుంది. ఈ నేపథ్యంలో డైరెక్టర్ లక్ష్మీ సౌజన్య సోమవారం మీడియాతో ముచ్చటించారు. ఈ సందర్భంగా ఆమె పలు ఆసక్తికర విషయాలను పంచుకున్నారు.
*నేను పుట్టింది కర్నూలు జిల్లాలో అయినా పెరిగిందంతా గుంటూరు జిల్లా నరసరావు పేట. మా నాన్న మ్యాథ్స్ లెక్చరర్. 11 ఏళ్లకే పదో తరగతి ఎగ్జామ్ రాశాను.
*చిన్నప్పటి నుంచి గుంపులో కలిసిపోవడం కాకుండా నలుగురిలో ఒకరిలా ఉండటం ఇష్టం. అందుకే సినిమా ఇండస్ట్రీ నాకు కరెక్ట్ అనిపించింది. ఇంట్లో పెళ్లి చేస్తానంటే వద్దని వారించి, పద్దెనిమిదేళ్ల వయసులో హైదరాబాద్ వచ్చేశాను.
*తేజ, శేఖర్ కమ్ముల, కృష్ణవంశీ, ఆర్కా మీడియా, ప్రకాష్ కోవెలమూడి దగ్గర పలు సినిమాలకు అసిస్టెంట్ డైరెక్టర్‌‌గా వర్క్ చేశాను. ఇండస్ట్రీలో 15 ఏళ్ల జర్నీ తర్వాత ఈ సినిమాతో డైరెక్టర్ గా ఇంట్రడ్యూస్ అవుతున్నాను. సినిమా మేకింగ్‌లో నా ఇండివిడ్యువాలిటీ నాకుంది.
*2017లో చినబాబు గారికి ఈ కథ చెప్పాను. స్టోరీ ఆయనకి నచ్చిడంతో ఈ సినిమా మొదలైంది. ప్యాండమిక్ వల్ల రెండేళ్లు ఆలస్యమైంది. హారిక హాసిని క్రియేషన్స్ లాంటి పెద్ద బ్యానర్ లో నా లాంటి కొత్త డైరెక్టర్ కి అవకాశం రావడమే అదృష్టంగా భావిస్తున్నాను. చినబాబు గారు ఈ సినిమాలో ఓ పార్ట్ కాదు.. ఆయన సపోర్టే ఈ సినిమా. ఈ సినిమా విషయంలో నన్నెంతో గైడ్ చేశారు. నా దృష్టిలో ఈ సినిమాకు ఆయనే హీరో. లైఫ్ అంతా ఆయనకు రుణపడి ఉంటాను.
*నా చుట్టూ ఉన్న వ్యక్తుల జీవితాల నుంచే కథలు రాసుకుంటాను. రియల్ లైఫ్ లో సెల్ఫ్ రెస్పెక్ట్ ఉన్న ఒక అమ్మాయిని చూసి ఈ సినిమా కాన్సెప్ట్ అనుకున్నాను. బేసిగ్గా నాలోనూ ఆ క్వాలిటీస్ ఉన్నాయి. ఫస్ట్ మూవీతోనే అన్ని వర్గాల ప్రేక్షకులను ఆకట్టుకోవాలని ఫ్యామిలీ సబ్జెక్ట్ ఎంచుకున్నాను. ఒక సెల్ఫ్ రెస్పెక్ట్ ఉన్న అమ్మాయి ప్రేమించాలంటే ఆ అబ్బాయిలో చాలా క్వాలిటీస్ ఉండాలి. అవన్నీ నాగశౌర్యలో ఉన్నాయనిపించింది. ఫస్ట్ నుంచి హీరోగా నాగశౌర్యనే అనుకున్నాను.
*ఇందులో హీరోయిన్ క్యారెక్టర్ పేరు భూమి. పేరుకు తగ్గట్టే భూమికి ఉన్న అన్ని క్వాలిటీస్ ఉన్న అమ్మాయి. సెల్ఫ్ రెస్పెక్ట్ ఎక్కువ. ఒకరిపై ఆధారపడదు. ఎవరినీ ఇబ్బంది పెట్టడు. అందుకే పర్యావరణానికి ఇబ్బంది లేని ఎకో ఫ్రెండ్లీ బిజినెస్ చేస్తుంది. అలాంటి అమ్మాయి ప్రేమించాలంటే తన కంటే ఆ అబ్బాయిలోనే ఎక్కువ క్వాలిటీస్ ఉండాలి.
*ఈసినిమాలో హీరో పేరు ఆకాష్. పేరుకు తగ్గట్టే ఆకాశమంత విశాల హృదయం ఉన్న వ్యక్తి. తను ఓ ఆర్కిటెక్ట్. తన ప్రొఫెషన్ లాగే లైఫ్‌ను కూడా అందంగా డిజైన్ చేసుకుంటాడు.
*ఇప్పుడున్న అమ్మాయిలందరికీ కనెక్ట్ అయ్యే సినిమా. అబ్బాయిలకూ కనెక్ట్ అవుతుంది. ఎలా ఉంటే అమ్మాయిలకు అబ్బాయిలు నచ్చుతారనేది ఈ సినిమా చూసి ఫాలో అవ్వొచ్చు.
*మన అందరి జీవితాల్లో ఆల్రెడీ చాలా ట్విస్టులు, ఫజిల్స్ ఉంటాయి. మళ్లీ సినిమాల్లో కూడా ఎందుకు. ప్రకృతి ఎంత ఆహ్లాదంగా ఉంటుందో ఈ సినిమా కూడా అంత ప్లజంట్‌గా ఉంటుంది. కళ్లకు అందంగా, చెవులకు వినసొంపుగా ఉంటూ, థియేటర్‌‌లో ప్రశాంతంగా ఆనందంగా నవ్వుతూ చూసే సినిమా.
*ఐడెంటిటీ కోసం మనమంతా చాలా తాపత్రయపడతాం. ఈ ఐడియాతో ఆధార్ కార్డ్ నేపథ్యంలో నెక్స్ట్ మూవీకి కథ రాసుకున్నాను.
*డైరెక్షన్ అంటే ఎంతో బాధ్యత గల వృత్తి. మనల్ని చూసి చాలామంది స్ఫూర్తి పొందుతుంటారు. వాళ్లెవరినీ తప్పుదోవ పట్టించకూడదు. అందుకే నేను ఏ సినిమా చేసినా ప్రేక్షకులను హ్యాపీగా నవ్వించడమో, ఏ మంచి విషయమో నేర్పించడమో ఉండేలా చూసుకుంటాను.
Also Read
Latest News
Video-Gossips
TeluguOne Service
Customer Service
Live Help 24/7Customer Care
Send your Queries to
