సాధారణంగా సినిమా హిట్ అయిన తర్వాత దర్శకులకు ఖరీదైన కార్లు, ఇతర బహుమతులు ఇవ్వడం చూస్తుంటాం. కొందరు నటులు షూటింగ్ పూర్తయిన తర్వాత కూడా చిత్రబృందానికి సర్‌ప్రైజ్ గిఫ్ట్స్ ఇస్తుంటారు. కానీ తమిళ స్టార్ శివకార్తికేయన్ మాత్రం కాస్త భిన్నంగా ఆలోచించారు. సినిమా షూటింగ్ ఇంకా కొనసాగుతుండగానే తన దర్శకుడికి ఖరీదైన గిఫ్ట్ ఇచ్చి సర్‌ప్రైజ్ చేశారు.
శివకార్తికేయన్ ప్రస్తుతం తన 27వ సినిమా (SK27)లో నటిస్తున్నారు. 'పార్కింగ్' సినిమాతో జాతీయ అవార్డులు అందుకున్న దర్శకుడు రామ్‌కుమార్ బాలకృష్ణన్ ఈ చిత్రాన్ని తెరకెక్కిస్తున్నారు. తాజాగా ఈ సినిమా మొదటి షెడ్యూల్ పూర్తయింది. ఈ సందర్భంగా దర్శకుడు రామ్‌కుమార్‌కు శివకార్తికేయన్ ఐఫోన్ 18 ప్రో మ్యాక్స్‌ను గిఫ్ట్‌గా అందించారు.
ఈ విషయాన్ని స్వయంగా దర్శకుడు సోషల్ మీడియా ద్వారా వెల్లడించారు. శివకార్తికేయన్ ఇచ్చిన గిఫ్ట్ ఫొటోలను ఎక్స్‌లో షేర్ చేస్తూ.. 'శివకార్తికేయన్ అన్న నుంచి ఎంతో ప్రేమతో కూడిన సర్‌ప్రైజ్ అందింది. ఈ గిఫ్ట్‌కు ధన్యవాదాలు. ఇది నాకు ఎంతో ప్రత్యేకం' అంటూ తన సంతోషాన్ని వ్యక్తం చేశారు. ప్రస్తుతం ఈ పోస్ట్ సోషల్ మీడియాలో వైరల్ అవుతోంది. సినిమా ఇంకా సెట్స్‌పై ఉండగానే దర్శకుడికి గిఫ్ట్ ఇవ్వడంపై అభిమానులు శివకార్తికేయన్‌ను ప్రశంసిస్తున్నారు.
ఇక ఈ SK27 సినిమా విషయానికి వస్తే.. ఇది ఒక యాక్షన్ ఎంటర్‌టైనర్‌గా తెరకెక్కుతోంది. ఇందులో శివకార్తికేయన్ సరసన కయాదు లోహర్ నటిస్తున్నారు. సాయి అభ్యంకర్ సంగీతం అందిస్తున్నారు. సత్యజ్యోతి ఫిలింస్ ఈ చిత్రాన్ని నిర్మిస్తోంది. 'పార్కింగ్'తో దర్శకుడిగా మంచి గుర్తింపు తెచ్చుకున్న రామ్‌కుమార్.. ఇప్పుడు శివకార్తికేయన్‌తో ఎలాంటి కథను తెరకెక్కిస్తున్నారనే ఆసక్తి నెలకొంది.
ఇది కూడా చదవండి: బత్తా మూవీ రివ్యూ.. విజయ్ సేతుపతి కొత్త సినిమా ఎలా ఉందంటే.?
[Sivakarthikeyan Gift to Director, iPhone 18 Pro Max, Ramkumar Balakrishnan, Sivakarthikeyan, SK27 Movie, Kayadu Lohar, Sai Abhyankkar, Parking Movie, Telugu Film News]
