వరుస సినిమాలతో తనకంటూ ప్రత్యేక గుర్తింపు తెచ్చుకుంటున్న నటి రితికా నాయక్‌కు మరో ఆసక్తికరమైన ప్రాజెక్ట్ దక్కింది. సందీప్ కిషన్ హీరోగా నటిస్తున్న ‘పవర్‌పేట’ సినిమాలో ఆమె పడమటవీధి జానకి పాత్రలో కనిపించనుంది. తాజాగా రితికా పుట్టినరోజు సందర్భంగా ఈ పాత్రకు సంబంధించిన గ్లింప్స్‌ను చిత్రబృందం విడుదల చేసింది.

ఈ గ్లింప్స్‌లో రితికా నాయక్ గ్లామర్, స్క్రీన్ ప్రెజెన్స్ ప్రత్యేక ఆకర్షణగా నిలుస్తున్నాయి. పడమటవీధి జానకి అనే పేరుతో ఆమె పాత్రను పరిచయం చేయడంతో సినిమాలో ఈ క్యారెక్టర్ ఎలా ఉండబోతోందనే ఆసక్తి మొదలైంది. రితికాకు పుట్టినరోజు శుభాకాంక్షలు తెలియజేస్తూ చిత్రబృందం ఈ వీడియోను విడుదల చేసింది.

ఇప్పటికే ‘అశోకవనంలో అర్జున కల్యాణం’, ‘మిరాయ్’, ‘కొరియన్ కనకరాజు’ వంటి సినిమాలతో ప్రేక్షకులకు దగ్గరైన రితికా.. ‘పవర్‌పేట’లో ఎలాంటి మ్యాజిక్ చేస్తుందనేది ఆసక్తికరంగా మారింది. ఈ సినిమాలో ఆమె పాత్రకు ప్రాధాన్యం ఉంటుందని గతంలో వచ్చిన వార్తలు కూడా అంచనాలను పెంచుతున్నాయి.

‘పవర్‌పేట’కు కృష్ణ చైతన్య దర్శకత్వం వహిస్తున్నారు. ‘రౌడీ ఫెలో’, ‘ఛల్ మోహన్ రంగ’, ‘గ్యాంగ్స్ ఆఫ్ గోదావరి’ చిత్రాలతో గుర్తింపు తెచ్చుకున్న ఆయన.. ఈసారి ప్రేమ, గౌరవం, రాజకీయాల నేపథ్యంలో కథను రూపొందిస్తున్నారు. సినిమా ప్రకటన సందర్భంగా విడుదల చేసిన పోస్టర్‌లో రక్తంతో తడిసిన చదరంగం బోర్డు కనిపించడం కథలో అధికార పోరు, వ్యూహాలు, సంఘర్షణలకు ప్రాధాన్యం ఉండొచ్చనే సంకేతాలిచ్చింది.

ఈ చిత్రంలో సందీప్ కిషన్ సేనాపతి రవి అనే పాత్రలో కనిపించనున్నారు. గతంలో విడుదలైన ఆయన గ్లింప్స్‌లో రఫ్ అండ్ ఇంటెన్స్ లుక్ ఆకట్టుకుంది. థియేటర్‌లో మొదటి రోజు మొదటి ఆట సందడి నేపథ్యంలో ఆయన ఎంట్రీని చూపిస్తూ పాత్ర స్వభావంపై ఆసక్తి పెంచారు.

70ఎంఎం ఎంటర్‌టైన్‌మెంట్స్‌ పతాకంపై విజయ్ చిల్లా, శశి దేవిరెడ్డి ఈ చిత్రాన్ని నిర్మిస్తున్నారు. మణిశర్మ సంగీతం అందిస్తుండగా, మధీ కెమెరా, శ్రీకర్ ప్రసాద్ ఎడిటింగ్ బాధ్యతలు నిర్వహిస్తున్నారు.

 

Powerpeta Ritika Nayak Birthday Glimpse

 

ఇది కూడా చదవండి: నారాయణమూర్తి సర్ప్రైజ్ ఎంట్రీ.. 'టెంపర్'ని కాదని ‘హుషారు 2’ చేయడానికి కారణమేంటి.?

 

 

 

[Powerpeta Ritika Nayak Glimpse, Ritika Nayak As Padamataveedhi Janaki, Ritika Nayak Birthday, Padamataveedhi Janaki, Ritika Nayak, Power Peta Movie, Sundeep Kishan, Krishna Chaitanya, Telugu Film News]